نيۋ-يورك تۇرعىندارى تۇرمىستىق زورلىق-زومبىلىقتى قىلمىس دەپ سانايتىن زاڭعا قولداۋ ءبىلدىردى

استانا. KAZINFORM - نيۋ-يوركتە قازاقستانداعى ايەل قۇقىعى مەن تۇرمىستىق زورلىق-زومبىلىقتى قىلمىس دەپ سانايتىن زاڭدى قولداۋعا ارنالعان ميتينگ ءوتتى.

نيۋ-يوركتەگى تايمس-سكۆەرگە بۇكىل تمد ەلدەرىنىڭ ماسەلەسىنە اينالعان تۇرمىستىق زورلىق-زومبىلىق تاقىرىبىنا بەي-جاي قارامايتىن وتانداستارىمىز، سونداي-اق ا ق ش، رەسەي، بەلارۋس، قىرعىزستان، تاجىكستان، تۇرىكمەنستان جانە وزبەكستان ازاماتتارىنان 100گە جۋىق ادام جينالدى.

نيۋ-يوركتەگى شارانى ۇيىمداستىرۋشىلار - ايەلدەر قۇقىعىن قورعاۋشى وتانداستارىمىز: دينارا جانپەيىسوۆا مەن اسەل دارىبايەۆا.

دينارا جانپەيىسوۆا نيۋ-يوركتەگى ميتينگتىڭ ماقساتىن ايتتى. وسىلايشا، نارازىلىق بىلدىرۋشىلەر قازاقستاندا تۇرمىستىق زورلىق-زومبىلىقتى قىلمىستىق جاۋاپقا تارتۋ تۋرالى زاڭنىڭ قابىلدانۋىن قولداپ، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتان زاڭعا ەشقانداي وزگەرىس ەنگىزبەي، قول قويۋىن سۇرايدى.

جيىنعا قاتىسۋشىلار تۇرمىستىق زورلىق-زومبىلىقتان قازا تاپقان سالتانات نۇكەنوۆاعا قاتىستى سوتتىڭ ءادىل شەشىمىن تالاپ ەتتى.

بۇعان قوسا، نارازىلىق بىلدىرۋشىلەر 30 دان استام ايەلدىڭ ولىمىنە قاتىستى قىلمىستىق ءىستى قايتا قاراۋدى تالاپ ەتىپ وتىر.

ءدال قازىر سان-فرانسيسكودا، ميلان، پاريج، بارسەلونا جانە لوندون سياقتى ەۋروپا قالالارىندا جوعارىدا اتالعان ماقساتقا ۇقساس ميتينگىلەر وتۋدە.