نوتر-دام: «عاسىر قۇرىلىسى» قالاي ءجۇرىپ جاتىر؟

собор
Фото: Euronews

پاريج حانىمىنىڭ سوبورىن رەستاۆراتسيالاۋ جۇمىسى جالعاسىپ جاتىر. ورتتەن قيراعان عيباداتحانانىڭ قاڭقا شاتىرىن قالپىنا كەلتىرۋ اياقتالدى.

بۇل تۋرالى Kazinform اگەنتتىگى Euronews ارناسىنا سىلتەمە جاساپ حابارلايدى.

پاريج حانىمى سوبورىنىڭ اپسيدىنە ۇلكەن گۇل شوعى قويىلدى. ءداستۇر بويىنشا، عيباداتحانانىڭ قاڭقالىق شاتىرىن قالپىنا كەلتىرۋ ءۇشىن جۇمىس ىستەگەن اعاش ۇستالارى رەستاۆراتسيانىڭ وسى ماڭىزدى كەزەڭى اياقتالعانىن حابارلادى.

فرانسۋز استاناسىنىڭ سيمۆولى - نوتر-دام جەرگىلىكتى تۇرعىندار مەن قوناقتارعا ءوزىنىڭ بۇرىنعى ءسان-سالتاناتىمەن قايتا اشىلاتىن ءسات جاقىنداپ قالدى.

بەس جىل بۇرىن عيماراتقا ورتتەن قاتتى زاقىم كەلگەن ەدى.

كورىكتى جەرلەردى قالپىنا كەلتىرۋگە فرانسۋز جانە شەتەلدىك ماماندار تارتىلدى.

ولاردىڭ اراسىندا ميننەسوتادان كەلگەن شەبەر، اعاش كونسترۋكتسياسىن جاساۋعا ماماندانعان پيتەر حەنريكسون بار، ول بىرنەشە اي بويى شەبەرحانادا ورتاعاسىرلىق ادىستەردى قولدانىپ جۇمىس ىستەدى.

«مەن مۇنىڭ ءبارىن بۇرىن كورگەن ەدىم، ءبىراق ول قازىر باسقاشا كورىنەدى. ءبىر جاعىنان، ونىڭ بۇرىنعىداي ءدال كورىنەتىنىن ءبىلۋ قىزىق. جۇمىس تۇگەل قولمەن جاسالدى، سونىڭ ءبارى دە ورتكە دەيىنگى سياقتى كورىنۋى ءۇشىن كوپ كوڭىل ءبولىندى»، - دەيدى ميننەسوتالىق اعاش ۇستاسى پيتەر حەنريكسون.

«وسى كەرەمەت تاريحي ەسكەرتكىشپەن جۇمىس ىستەگەنىمنەن بولەك، باسقا ماماندىق وكىلدەرىمەن تىزە قوسىپ ءبىر جوبادا جۇمىس ىستەۋ - مەن ءۇشىن ەرەكشە تاجىريبە. مۇندا مۇسىنشىلەردىڭ، تاس قالاۋشىلاردىڭ، تاس كەسۋشىلەردىڭ، اينەكتى قالپىنا كەلتىرەتىن مامانداردىڭ نىساندى قالپىنا كەلتىرۋ جۇمىسىن قالاي ىستەيتىنىن كورۋ كەرەمەت! بۇل - قالا ىشىندەگى بۇكىل قالا»، - دەيدى نيۋ-يوركتەن كەلگەن اعاش ۇستاسى حەنك كۇمىس.

سوڭعى بىرنەشە ايدا «عاسىر قۇرىلىسىندا» ايتارلىقتاي ىلگەرىلەۋ بايقالدى.

ەگەر قالپىنا كەلتىرۋ جۇمىسى وسى قارقىنىنان تايماسا، وندا سوبور بيلىك جوسپارلاعان كۇنى - 2024-جىلدىڭ 8- جەلتوقسانىندا اشىلادى.

سوڭعى جاڭالىقتار