نوبەل سىيلىعىنىڭ لاۋرەاتى ۇزاق ءومىر ءسۇرۋدىڭ 3 سىرىن ايتتى
استانا. قازاقپارات - 72 جاستاعى ۆەنكي راماكريشنان عىلىمداعى قارتايۋ ماسەلەلەرىن زەرتتەپ كەلەدى. كەمبريدج ۋنيۆەرسيتەتىنىڭ ميكروبيولوگى، ريبوسومالار سالاسىنداعى زەرتتەۋلەرى ءۇشىن نوبەل سىيلىعىنىڭ لاۋرەاتى جانە الەمدەگى ەڭ كونە عىلىمي اكادەميا - كورولدىك قوعامنىڭ بۇرىنعى پرەزيدەنتى قارتايۋدىڭ الدىن الۋعا قاتىستى ماڭىزدى كەڭەستەرىن ءبولىستى.
راماكريشناننىڭ «نەلىكتەن ءبىز ولەمىز؟» اتتى جاڭا كىتابىندا قارتايۋعا قاتىستى 300 مىڭنان استام عىلىمي ماقالانىڭ سوڭعى ون جىلدا جارىق كورگەنى جانە 700-دەن استام ستارتاپتىڭ بۇل زەرتتەۋلەرگە ميللياردتاعان دوللار ينۆەستيسيا سالعانى جازىلعان.
عالىم قارتايۋ سەبەپتەرىن زەرتتەۋدە ناقتى عىلىمي جەتىستىكتەر بولعانىن ايتادى. الايدا قارتايۋعا قارسى دارىلەردى جاساپ شىعارۋ نەمەسە ونى ەمدەۋگە ارنالعان ادىستەردى ىسكە قوسۋ ءالى كۇنگە دەيىن مۇمكىن بولماي وتىر.
2020 -جىلى قارتايۋدىڭ الدىن الۋعا ارنالعان ادىستەر نارىعى 25,1 ميلليارد دوللارعا باعالانعان، ال 2030 -جىلعا قاراي بۇل كورسەتكىش 44,2 ميلليارد دوللارعا جەتۋى مۇمكىن. ءبىراق كوپتەگەن بيوحاكينگ ادىستەرى، مىسالى، وزونوتەراپيا نەمەسە NAD+ سياقتى ۇزاق ءومىر سۇرۋگە ارنالعان قوسپالار، قاتاڭ كلينيكالىق سىناقتاردان وتپەيدى جانە دەنساۋلىققا پايداسى دالەلدەنبەگەن.
راماكريشنان ۇزاق ءومىر ءسۇرۋ ءۇشىن ءۇش قاراپايىم كەڭەس ۇسىنادى:
1. قورەكتىك تاعامدى قالىپتى مولشەردە تۇتىنۋ.
2. كۇن سايىن ۆەلوسيپەد تەبۋ.
3. كۇنىنە 8 ساعات ۇيىقتاۋ.
عالىمنىڭ پىكىرىنشە، عىلىم مەن زەرتتەۋلەرگە نەگىزدەلگەن دەرەكتەرگە سۇيەنۋ ماڭىزدى. ول ۇزاق ءومىر سۇرۋگە قاتىستى تىم ارتىق ناسيحاتتالعان يدەيالاردى سىناسا دا، قارتايۋ تۋرالى زەرتتەۋلەردىڭ پايدالى ەكەنىن ايتىپ ءوتتى.
مەن ۇزاق ءومىر سۇرۋگە باعىتتالعان عىلىمعا قارسى ەمەسپىن، ءبىراق بۇل سالادا پايدا تابۋدى كوزدەيتىن كومپانيالار كوپ، - دەيدى راماكريشنان.
