نوبەل سىيلىعىن العان تۋىندىلار اۋدارىلسا كەرەمەت بولار ەدى. قانشا كىتاپ قازاق تىلىنە اۋدارىلىپ باسىلدى؟
استانا. قازاقپارات - كەيىنگى كەزدە قازاق تىلىنە اۋدارىلعان الەمدىك بەستسەللەر كىتاپتار سانى ارتتى. ولاردىڭ ساپاسى تۋرالى وقىرماندار نە دەيدى؟ كەيىنگى 3 جىلدا قازاق تىلىنە قانشا كىتاپ اۋدارىلدى؟ ەلىمىزدە قانشا باسپا بار؟ جەكەلەگەن باسپالاردان شىققان كىتاپتار باقىلانا ما؟ مەملەكەت تاراپىنان شەت ءتىلدى كىتاپتاردى قازاق تىلىنە اۋدارۋ ءۇشىن قانشا قارجى بولىنگەن؟
استانا. قازاقپارات - كەيىنگى كەزدە قازاق تىلىنە اۋدارىلعان الەمدىك بەستسەللەر كىتاپتار سانى ارتتى. ولاردىڭ ساپاسى تۋرالى وقىرماندار نە دەيدى؟ كەيىنگى 3 جىلدا قازاق تىلىنە قانشا كىتاپ اۋدارىلدى؟ ەلىمىزدە قانشا باسپا بار؟ جەكەلەگەن باسپالاردان شىققان كىتاپتار باقىلانا ما؟ مەملەكەت تاراپىنان شەت ءتىلدى كىتاپتاردى قازاق تىلىنە اۋدارۋ ءۇشىن قانشا قارجى بولىنگەن؟
Massaget.kz بۇل سۇراقتار اياسىندا وقىرماندارمەن سۇحباتتاسىپ، مادەنيەت جانە اقپارات مينيسترلىگىنىڭ ارحيۆ، قۇجاتتاما جانە كىتاپ ءىسى كوميتەتىنە ساۋال جولدادى.
تەك قازاقشاعا اۋدارىلعان كىتاپتاردى وقيتىن وقىرمان قاتارى از ەمەس. ولاردىڭ ايتۋىنشا، قازىر قازاق تىلىنە اۋدارىلعان الەمدىك بەستسەللەر اجەپتاۋىر كوبەيگەن.
«كوبەيگەنى كادىمگىدەي سەزىلەدى، بۇرىنعىعا قاراعاندا كوپ الەمدىك كىتاپتار قازىر قولجەتىمدى. ءبىراق، ارينە، «قاپ» دەيتىن كەز بار ءالى دە، ويتكەنى كەي اۋدارمالار ماعىنانى ءبارىبىر تولىق جەتكىزە المايدى نەمەسە اۋدارمانىڭ ساپاسى تومەن. كەي كىتاپتار ءساتسىز اۋدارىلعان، سول سەبەپتى وقىرمانداردىڭ كوڭىلى قالىپ، ولاردى وقىعىسى كەلمەي قالادى»، - دەيدى ايبەرگەن نۇرالى.
ونىڭ ايتۋىنشا، شەتەلدىك كىتاپتار قازاق تىلىنە مەيلىنشە كوپ اۋدارىلعانى دۇرىس.
«ساندى ويلاپ، ساپانى ۇمىتپاۋ كەرەك. نوبەل سىيلىعىن العان قانشا كىتاپ بار، سولاردى ساپالى اۋدارسا، نۇر ۇستىنە نۇر بولادى»، - دەيدى ول.
كەيىنگى 3 جىلدا قازاق تىلىنە قانشا كىتاپ اۋدارىلدى؟
كوميتەت وكىلدەرىنىڭ ايتۋىنشا، «اۋدارما ادەبيەتى» ءتۇرى بويىنشا مەملەكەتتىك تاپسىرىسپەن كەيىنگى 3 جىلدا جالپى تارالىمى 24 مىڭ دانا بولاتىن كىتاپ باسىپ شىعارىلعان.
«ولار مەملەكەتتىك كىتاپحانالارعا تاراتىلدى. ولاردىڭ ىشىندە بالالار ادەبيەتى، كوميكس جانە كوركەم ادەبيەت بار. ال بيىل جىل اياعىنا دەيىن 23 مىڭ دانا كىتاپ تاراتۋ جوسپارلانعان»، - دەلىنگەن جاۋاپتا.
شەتەلدىك كىتاپتار قانداي باعدارلاما بويىنشا قازاقشاعا اۋدارىلىپ جاتىر؟
كوميتەت مالىمەتىنشە، كىتاپتار «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ، باسىپ شىعارۋ جانە تاراتۋ» باعدارلاماسى بويىنشا اۋدارىلىپ جاتىر.
«مادەنيەت جانە ونەر سالاسىنداعى باسەكەلەستىكتى جوعارىلاتۋ، قازاقستاندىق مادەني مۇرانى ساقتاۋ، زەردەلەۋ مەن ناسيحاتتاۋ جانە مۇراعات ءىسىنىڭ ىسكە اسىرىلۋ تيىمدىلىگىن ارتتىرۋ» رەسپۋبليكالىق بيۋدجەتتىك باعدارلاما اياسىندا جارىق كورگەن ادەبيەتتەر رەسپۋبليكالىق، وبلىستىق، اۋداندىق مەملەكەتتىك كىتاپحانالارعا قايتارىمسىز تەگىن تاراتىلىپ، ەلەكترون نۇسقاسى (PDF) قازاقستاندىق ۇلتتىق ەلەكترون كىتاپحانا پورتالىنا جۇكتەلەدى.
ەلىمىزدە قانشا باسپا بار؟ جەكەلەگەن باسپالاردان شىققان كىتاپتار باقىلانا ما؟
«ەلىمىزدە ۇلتتىق ستاتيستيكا بيۋروسىنىڭ دەرەكتەرى بويىنشا 271 باسپا جۇمىس ىستەيدى. كىتاپ شىعارۋدىڭ نەگىزگى كاسىپورىندارى - جەكە بيزنەس سۋبەكتىلەرى»، - دەلىنگەن جاۋاپتا.
الايدا كوميتەت قۇزىرىندا جەكەلەگەن باسپالاردان شىققان كىتاپتاردى باقىلاۋ قۇقىعى جوق. كوميتەت مالىمەتىنشە، باقىلاۋدى باسقا ورگان جۇرگىزەدى، ءبىراق قاي ورگان ەكەنى ايتىلمادى.
مەملەكەتتىك تاپسىرىسپەن باسىلاتىن قوعامدىق ماڭىزى بار ادەبيەتتەر ءتىزىمى قانداي؟
. بالالار جانە جاسوسپىرىمدەرگە ارنالعان ادەبيەت؛
. تانىمدىق ادەبيەت؛
. كوركەم ادەبيەت؛
. قوعامدىق- ساياسي ادەبيەت؛
. عىلىمي- كوپشىلىك ادەبيەت؛
. اۋدارما ادەبيەت؛
. مادەنيەت جانە ونەر تۋرالى ادەبيەت، ونىڭ ىشىندە نوتالىق ادەبيەت؛
. ەنسيكلوپەديالىق جانە انىقتامالىق ادەبيەت؛
. مەرەيتويلار مەن اتاۋلى كۇندەرگە ارنالعان ادەبيەت.
مەملەكەت تاراپىنان شەت ءتىلدى كىتاپتاردى قازاق تىلىنە اۋدارۋ ءۇشىن قانشا قارجى بولىنگەن؟
قوعامدىق ماڭىزى بار ادەبيەتتەر باسىلماس بۇرىن ىرىكتەۋدىڭ ءۇش كەزەڭىنەن تۇراتىن كوميسسيادان (تاۋەلسىز، ساراپتامالىق، ۆەدومستۆوارالىق) وتەدى. وڭ دەپ تانىلعان كىتاپتار رەسپۋبليكالىق بيۋدجەت تاراپىنان باسىلىپ، ەلىمىزدەگى مەملەكەتتىك كىتاپحانالارعا تاراتىلادى.
الايدا رەسمي جاۋاپتا وعان قانشا قارجى بولىنگەنى تۋرالى ناقتى جاۋاپ جوق.
