ەنتوني بلينكەن دوحاداعى كەلىسسوزدەردە گازاداعى اتىستى توقتاتۋعا تىرىسىپ جاتىر

Энтони
Фото: Америка дауысы

استانا. KAZINFORM – ا ق ش مەملەكەتتىك حاتشىسى ەنتوني بلينكەننىڭ ايتۋىنشا، حاماس توبىنىڭ جەتەكشىلەرى گازاداعى سوعىس قيمىلدارىن توقتاتۋدى كوزدەيتىن، كەپىلگە الىنعاندار بويىنشا ۇسىنىسقا جاۋاپ بەردى، دەپ حابارلايدى «امەريكا داۋىسى» راديوسى.

مەملەكەتتىك حاتشى ەنتوني بلينكەن سەيسەنبىدە جاساعان مالىمدەمەسى بويىنشا، حاماس جەتەكشىلەرى گازاداعى سوعىس ءىس-قيمىلدارىن ۋاقىتشا توقتاتۋدى كوزدەيتىن، كەپىلگە الىنعاندار تۋرالى كەلىسىمگە جازباشا جاۋاپ بەردى. ونىڭ ايتۋىنشا، قۇراما شتاتتار حاماس-تىڭ جاۋابىن قارقىندى تۇردە زەرتتەپ جاتىر جانە ونى سارسەنبى كۇنى يزرايلدەگى ارىپتەستەرىمەن تالقىلايدى.

دوحاداعى باسپا ءسوز ءماسليحاتىندا بلينكەن تىلشىلەرگە حاماس-تىڭ ۇسىنىسقا بەرگەن جاۋابى يزرايلگە جەتكىزىلگەنىن ايتتى.

«ءبىز كەپلگە الىنعاندار تۋرالى تەك جاڭارتىلعان ەمەس، كەڭەيتىلگەن كەپىل كەلىسىمىمەن جانە ول اكەلەتىن بارلىق ارتىقشىلىقتارمەن العا جىلجۋ ءۇشىن كەلىسىمگە قول جەتكىزۋگە تىرىسامىز»، - دەدى ول.

بلينكەن سەيسەنبىدە مىسىر جانە كاتار كوشباسشىلارىمەن گازادا جاڭا ۋاقىتشا اتىستى توقتاتۋ جانە پالەستينالىق بەيبىت تۇرعىندارعا كوبىرەك گۋمانيتارلىق كومەك كورسەتۋ تۋرالى تاباندى ۇندەۋلەر اياسىندا كەلىسسوزدەر جۇرگىزدى.

امەريكا قۇراما شتاتتارى، مىسىر جانە كاتار قازىرگى كەزدە قاراستىرىلىپ جاتقان اتىستى توقتاتۋ تۋرالى ۇسىنىستى جاساۋعا كومەكتەستى، وعان شايقاستاردى بىرنەشە اپتاعا توقتاتۋ جانە گازادا حاماس ۇستاعان كەپىلگە الىنعانداردى بوساتۋ كىرەدى.

بلينكەن دوحادا كاتار ءامىرى شەيح تاميم بەن حاماد ءال تانيمەن جانە كاتار پرەمەر- ءمينيسترى موحاممەد بەن ابدۋلراحمان ءال تانيمەن كەلىسسوزدەر جۇرگىزدى.

ءال تاني تىلشىلەرگە حاماس-تان كەپىلگە الىنعاندار بويىنشا كەلىسىمىنىڭ جالپى قۇرىلىمىنا قاتىستى جاۋاپ الىنعانىن ايتتى. وندا كەيبىر ەسكەرتۋلەر بار، ءبىراق العاندا وڭ جاۋاپ الىنعان.

كاتار پرەمەر-ءمينيسترى وپتيميستىك كوزقاراسىن ءبىلدىرىپ، اتىستى ۇزاق ۋاقىتقا توقتاتۋدىڭ ورنىنا كەپىلگە الىنعانداردى بوساتۋ «جاقىندا» ناتيجە اكەلەتىنىنە ۇمىتتەنەتىنىن ايتتى، ءبىراق بۇل تۋرالى ەگجەي- تەگجەيلى ايتۋدان باس تارتتى.

بۇعان دەيىن بلينكەن كايردە مىسىر پرەزيدەنتى ابدەل- فاتتاح ەس-سيسيمەن كەزدەستى.

قاراشانىڭ سوڭىندا جاسالعان بۇعان دەيىنگى اتىستى ۋاقىتشا توقتاتۋ كەلىسىمى ءبىر اپتاعا سوزىلدى، سونىڭ ارقاسىندا گازا سەكتورىنداعى 100 دەن استام كەپىلگە الىنعان جانە يزرايلدە ۇستالعان 240 پالەستينالىق تۇتقىن بوساتىلعان.

ەسكە سالا كەتسەك، ەنتوني بلينكەن جاقىندا ساۋد ارابياسىنا كەلگەن بولاتىن. جاقىن ارادا ول تاياۋ شىعىستاعى تاعى بىرنەشە ەلگە بارادى. بۇل حاماس-تىڭ يزرايلگە شابۋىلى جانە وعان جاۋاپ رەتىندە «تەمىر قىلىشتار» وپەراتسياسى باستالعاننان بەرى ا ق ش مەملەكەتتىك حاتشىسىنىڭ تاياۋ شىعىسقا جاساعان بەسىنشى ساپارى.

سوڭعى جاڭالىقتار