نەسيە تاريحىنا نە اسەر ەتەدى جانە ونى قالاي جاقسارتۋعا بولادى؟

استانا. KAZINFORM - نەسيە تاريحى - بۇل قارىز الۋشىنىڭ قارىزدىق مىندەتتەمەلەرى تۋرالى اقپارات. ونىڭ ماڭىزدىلىعىنا قاراماستان، كەيبىر ازاماتتار وعان ۇلكەن ءمان بەرمەيدى، تەك نەسيە راسىمدەگەندە بانك نەمەسە م ق ۇ- نان باس تارتقانعا دەيىن قارامايدى.

ەگەر نەسيە تاريحى بۇزىلعان بولسا، وندا جاعدايدى تۇزەۋگە تىرىسقان ءجون. مۇنداي جاعدايدا ەشبىر دەلدالدىڭ قىزمەتىنە جۇگىنبەۋ كەرەك. جەكە كرەديتتىك ەسەپكە قاتىستى ءارقاشان ەستە ساقتالۋى ءتيىس ماڭىزدى نيۋانستاردى وسى ماتەريالدان وقىپ بىلە الاسىزدار، - دەپ حابارلايدى Fingramota.kz.

نەسيە تاريحى دەگەنىمىز نە؟

سىزگە تۇسىنىكتى بولۋ ءۇشىن مىسالمەن ءتۇسىندىرىپ كورەيىك: مىسالى، ءسىز - بانكسىز جانە سىزدەن نەسيە العىسى كەلەتىن ادام تۋرالى ەشتەڭە بىلمەيسىز. ول سىزگە قۇجاتپەن كەلەدى، ال ول كوفە توگىلگەن نەمەسە جىرتىلعان بولۋى مۇمكىن. مۇنداي قارىز الۋشىعا سەنەسىز بە؟ ارينە، جوق. ەكىنشى قارىز الۋشى ءمىنسىز قۇجاتپەن كەلەدى، وندا ول بۇرىن قانداي نەسيەلەر العانى كورسەتىلگەن، ولاردى ۋاقىتىندا جاپقانى، نەسيە بويىنشا مەرزىمىنەن كەشىكتىرمەگەنى، سوت ىستەرىنە قاتىسپاعانى جانە بانكروتتىق پروتسەدۋراسىن قولدانباعانى تۋرالى اقپارات بار. بۇل قۇجات - جەكە نەسيەلىك ەسەپ، ياعني نەسيەلىك تاريح - بارلىق قارىز الۋشىلاردا بولاتىن وزىندىك قارجىلىق قۇجاتتاما.

نەسيە تاريحىنا سۇيەنىپ، بانكتەر تاۋەكەل دەڭگەيىن باعالايدى - ءسىزدىڭ قارجىلىق جاۋاپكەرشىلىگىڭىزدى جانە سەنىمدىلىگىڭىزدى انىقتايدى. مىسالى، ءسىز بۇعان دەيىن بەلگىلى ءبىر سوماعا بانك قارىزىن راسىمدەگەنسىز نەمەسە تەحنيكا العانسىز جانە اي سايىنعى تولەمدى ۋاقىتىندا تولەپ، نەسيەنى مەرزىمىنەن بۇرىن جاپقانسىز، بۇل اقپارات ءسىزدىڭ نەسيەلىك تاريحىڭىزعا تۇسەدى جانە ءسىز بانكتەر ءۇشىن جاۋاپتى قارىز الۋشى بولاسىز. ءبىراز ۋاقىتتان كەيىن باسقا بانكتە تاعى ءبىر نەسيە الۋعا شەشىم قابىلدادىڭىز، ول ءسىزدىڭ نەسيە تاريحىڭىزدى تالدايدى جانە ۇلكەنىرەك سوماعا نەسيە بەرۋدى ماقۇلدايدى.

ايتا كەتەيىك، نەسيە ۇزارتىلعاندا، پرولونگاتسيا دا كرەديتتىك تاريحقا اسەر ەتەدى. بيىل قىركۇيەكتەن باستاپ نەسيە تاريحىنا بانكتىك قارىزدار مەن ميكرونەسيەلەر بويىنشا مەرزىمى وتكەن بەرەشەكتى رەتتەۋ تۋرالى مالىمەتتەر دە ەنگىزىلدى (سوڭعى تولەم، سوما جانە ت. ب.).

كرەديتتىك تاريحتى قايدان الۋعا بولادى؟

نەسيە تاريحىن قازاقستاننىڭ مەملەكەتتىك كرەديتتىك بيۋروسىنان نەمەسە ءبىرىنشى كرەديتتىك بيۋرودان الۋعا بولادى، وندا قازاقستاندىقتاردىڭ جەكە كرەديتتىك ەسەپتەرى ساقتالادى، سونداي-اق ەلەكتروندى ۇكىمەت پورتالىنان (eGov.kz) الۋعا بولادى. ول ءۇشىن ءوتىنىش تولتىرىپ، ونى ە ت س ق ارقىلى قول قويۋ كەرەك. ناتيجە ءسىزدىڭ «جەكە كابينەتىڭىزدە» پايدا بولادى.

كرەديتتىك ەسەپتى «قازپوشتا» بولىمشەلەرىندە ءوتىنىش جازىپ، الۋعا بولادى

ايتا كەتەيىك، بانكتەر مەن م ق ۇ كليەنتتەردىڭ نەسيە شارتىنا وتىنىشتەرى تۋرالى اقپاراتتى ناقتى ۋاقىت رەجيمىندە نەسيەلىك بيۋروعا بەرۋگە مىندەتتى. مالىمەتتەردە قارىز الۋشىنىڭ ج س ن، بانكتىك قارىزدىڭ نەمەسە ميكرونەسيەنىڭ سوماسى مەن ماقساتى كورسەتىلەدى. بۇل قارجىلىق رەتتەۋشى قابىلداعان جاڭاشىلدىقتاردىڭ ءبىرى، ول كرەديتورلارعا ازاماتتاردىڭ ءارتۇرلى بانكتەر مەن م ق ۇ- عا ءبىر ۋاقىتتا ءوتىنىش بەرگەنى تۋرالى اقپاراتتى الۋعا مۇمكىندىك بەرەدى.

كرەديتتىك تاريحتى جويۋعا بولا ما؟

قازاقستان رەسپۋبليكاسىنداعى «كرەديتتىك بيۋرولار جانە كرەديتتىك تاريحتاردى قالىپتاستىرۋ تۋرالى» زاڭىنا سايكەس، كرەديتتىك بيۋرو ازاماتتىڭ كرەديتتىك تاريحى تۋرالى اقپاراتتى ونى العان كۇننەن باستاپ بەس جىل بويى ساقتاۋعا كەپىلدىك بەرەدى جانە قامتاماسىز ەتەدى. بۇل رەتتە قارىز الۋشىلاردىڭ نەسيەلىك تاريحىن جويۋعا بولمايدى. دەمەك، نەسيەلىك ەسەپتەگى كەشىكتىرۋلەر تۋرالى اقپاراتتى جويۋ مۇمكىن ەمەس، تەك نەسيەلىك تاريحتاعى تەحنيكالىق قاتەلەردى تۇزەتۋگە بولادى.

بۇل قالاي جاسالادى؟

ءتىپتى، XXI عاسىردا دا تەحنيكالىق قاتەلەردەن ەشكىم قورعالماعان، كەز كەلگەن جۇيەدە ساتسىزدىك بولۋى مۇمكىن. قالاي بولعاندا دا، سيرەك بولسا دا، كەيدە كرەديتتىك ەسەپتە قاتە اقپارات پايدا بولادى. مىسالى، تولەنگەن تولەم بويىنشا اعىمداعى كەشىكتىرۋ نەمەسە جابىق كەلىسىمشارت بويىنشا بەرەشەك تۋرالى جازبا پايدا بولۋى مۇمكىن. نەمەسە ەگەر ءسىزدىڭ كەلىسىمشارتىڭىز «رەابيليتاتسيالانعان» مارتەبەسىنە جاتاتىن بولسا، نەسيەلىك تاريحتا بۇل مارتەبە بەرىلمەۋى مۇمكىن، ت. س. س.

ەگەر سىزدە قاتە اقپارات شىعىپ تۇرسا، ونى دەرەۋ بانككە نەمەسە م ق ۇ- عا حابارلاڭىز جانە راستايتىن قۇجاتتاردى قوسا بەرىڭىز.