نەسيە الۋ: 2025 -جىلدان باستاپ قانداي وزگەرىستەر بولادى؟
استانا. قازقپارات - 2024-جىلى 6613727 قازاقستاندىق نەسيە العان. 2024-جىلى قازاقستاندىقتاردىڭ بەرەشەگى 2023-جىلمەن سالىستىرعاندا %22,2 عا ارتقان. ال 2025-جىلى نەسيە الۋدا قانداي وزگەرىستەر بولماق؟
تولىعىراق Massaget.kz ماتەريالىندا.
جىلدان جىلعا نەسيە الاتىن قازاقستاندىقتار كوبەيىپ بارادى
قارجى نارىعىن رەتتەۋ جانە دامىتۋ اگەنتتىگىنىڭ Massaget.kz سۇراۋىنا بەرگەن مالىمەتى بويىنشا 2024-جىلى قازاقستاندىقتاردىڭ بانكتەر الدىنداعى بەرەشەگى 34,9 تريلليون تەڭگەنى قۇرادى. كورسەتىلگەن سومادان 20,3 تريلليون تەڭگە جەكە تۇلعالاردىڭ بەرەشەگىنە جانە 14,6 تريلليون تەڭگە زاڭدى تۇلعالاردىڭ ۇلەسىنە تيەسىلى. 2024-جىلى 6613727 قارىز الۋشىعا نەسيە بەرىلگەن.
ال 2023-جىلى قازاقستاندىقتاردىڭ بانكتەر الدىنداعى بەرەشەگى 28,6 تريلليون تەڭگە بولدى. ياعني 2024-جىلى قازاقستاندىقتاردىڭ بەرەشەگى 2023-جىلمەن سالىستىرعاندا %22,2 عا وسكەن.
نەسيە الۋعا بايلانىستى قانداي وزگەرىستەر كۇشىنە ەندى؟
قازىرگى تاڭدا نەسيە الۋ قيىن ەمەس، ونى ونلاين رەجيمدە الۋعا بولادى جانە مۇنداي نەسيەلەر ءاردايىم دەرلىك ماقۇلدانادى. ءبىراق قارىزدى قايتارۋ الدەقايدا قيىن. نەسيە الۋ كەزىندەگى تاۋەكەلدەردى ازايتۋ ءۇشىن قانداي شارالار قولدانىلىپ جاتىر؟
قارجى نارىعىن رەتتەۋ جانە دامىتۋ اگەنتتىگىنىڭ ايتۋىنشا، 2024-جىلى ازاماتتارعا كرەديت بەرۋمەن بايلانىستى ءبىرقاتار وزگەرىستەر قابىلداندى:
2025-جىلدىڭ 1-قاڭتارىنان باستاپ ونلاين ميكروقارىزداردى راسىمدەۋ كەزىندە بيومەتريالىق سايكەستەندىرۋ مەن ەلەكتروندىق سيفرلىق قولتاڭبانى (ە ت س ق) ءبىر مەزگىلدە قولدانۋ مىندەتتى؛
ەكىنشى دەڭگەيدەگى بانكتەردىڭ، بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمداردىڭ، ميكروقارجىلىق قىزمەتتى جۇزەگە اسىراتىن ۇيىمداردىڭ (كرەديتور) جەكە تۇلعاعا جۇبايىنىڭ كەلىسىمىنسىز بانكتىك قارىز نەمەسە ميكروكرەديت بەرۋىنە تىيىم سالۋ ەنگىزىلدى؛
90 كۇنگە مەرزىم وتكەننەن كەيىن كرەديتورلارعا بارلىق قولدانىستاعى، ونىڭ ىشىندە بۇرىن جاسالعان تۇتىنۋشىلىق كرەديتتەرگە سىياقى ەسەپتەۋگە تىيىم سالۋ بەلگىلەندى.
كرەديتورلاردىڭ ازاماتتاردىڭ كرەديتتەرى بويىنشا اسكەري قىزمەت كەزەڭىنە جانە قىزمەتتەن كەيىن 2 ايعا ولار بويىنشا سىياقى ەسەپتەمەي مىندەتتى تۇردە مەرزىمدى كەيىنگە قالدىرۋدى ۇسىنۋ جونىندەگى تالاپتى ەنگىزۋ.
بارلىق بانكتىك قارىز شارتتارى بويىنشا داۋلاردى رەتتەۋ جونىندە بانك ومبۋدسمەننىڭ وكىلەتتىكتەرى كەڭەيتىلدى، سونداي-اق ميكروقارجى ومبۋدسمەن ينستيتۋتى ەنگىزىلدى.
كامەلەتكە تولماعان بالالارى بار وتباسىلاردى، سونداي-اق 1 جانە 2-توپتاعى مۇگەدەكتىگى بار ادامدار تۇراتىن وتباسىلاردى جىلىتۋ ماۋسىمىندا جالعىز باسپاناسىنان شىعارۋعا تىيىم سالۋدى ەنگىزۋ.
بانكتەرگە قارىز الۋشىنىڭ شوتتارىنداعى 2 ەڭ تومەنگى كۇنكورىس دەڭگەيىنەن اسپايتىن قاراجات قالدىعىنان تولەم تالاپتارىنىڭ نەگىزىندە كرەديت بويىنشا بەرەشەكتى وتەۋ شوتىنا ءوندىرىپ الۋعا تىيىم سالۋ.
بانكتەردىڭ، م ق ۇ- نىڭ، كوللەكتورلىق اگەنتتىكتەردىڭ جانە قارىز الۋشىلاردىڭ اراسىنداعى داۋلاردى تورەلىك سوتتارىندا قاراۋعا تىيىم سالۋ.
كرەديتورلارعا كرەديتتىك بيۋرولارعا ناقتى ۋاقىت رەجيمىندە بانكتىك قارىز نەمەسە ميكروكرەديت الۋ بويىنشا كەلىپ تۇسكەن وتىنىشتەر تۋرالى اقپاراتتى جىبەرۋگە تالاپ قويۋ.
جەكە تۇلعانىڭ كرەديت راسىمدەۋدەن ەرىكتى تۇردە باس تارتۋى بولعان جاعدايدا راسىمدەلگەن كرەديتتەردى ەسەپتەن شىعارۋ.
سونداي-اق اگەنتتىك 2025-جىلى نەسيە الۋعا قاتىستى مىناداي جاڭا وزگەرىستەر تالقىلاناتىنىن حابارلادى:
بانكتەر مەن مقۇ ءۇشىن كليەنتتەردىڭ جولدانىمدارىن قاراۋ مەرزىمىن 15 كۇن دەپ بەلگىلەۋ؛
اگەنتتىك بەلگىلەگەن نەگىزدەر بويىنشا بانكتەردىڭ جانە م ق ۇ- نىڭ ازاماتتاردىڭ قارىزدارى بويىنشا مەرزىمدى 3 ايعا كەيىنگە قالدىرۋدى ۇسىنۋى؛
قارجى ۇيىمدارىنىڭ ۇلتتىق ستاندارتىن ەسكەرە وتىرىپ، مۇگەدەكتىگى بار ادامدارعا قىزمەت كورسەتۋ، ونىڭ ىشىندە سەنىم بىلدىرىلگەن ادام ارقىلى قىزمەت كورسەتۋ راسىمدەرىن بەلگىلەۋ؛
اگەنتتىككە قارجى ۇيىمدارىنىڭ قارجىلىق ونىمدەرىنە قويىلاتىن تالاپتاردى بەلگىلەۋ قۇزىرەتىن بەرۋ.
