ۆەنس ۋكراينا پرەزيدەنتىن ا ق ش-قا قۇرمەتسىزدىك تانىتتى دەپ ايىپتادى

استانا. KAZINFORM - اق ۇيدە ۋكراينا پرەزيدەنتى ۆلاديمير زەلەنسكي مەن ا ق ش پرەزيدەنتى دونالد ترامپتىڭ كەزدەسۋى ءوتىپ جاتىر.

جۋرناليستەردىڭ ايتۋىنشا، ۆلاديمير زەلەنسكي، ا ق ش ۆيتسە-پرەزيدەنتى دجەي دي ۆەنس پەن دونالد ترامپ داۋلاستى.

ۆەنس زەلەنسكيدى قۇرمەتسىزدىك تانىتتى دەپ ايىپتادى. ترامپ وسىدان سوڭ ۋكراينا باسشىسىنىڭ «ءۇشىنشى دۇنيەجۇزىلىك سوعىسپەن ويناپ وتىرعانىن» ايتتى.

- ا ق ش-قا كەلىپ، ءوزىڭىزدىڭ ەلىڭىزدىڭ قيراۋىنىڭ الدىن العالى وتىرعان مەملەكەتتىڭ اكىمشىلىگىنە شابۋىلداۋدى ءسىز قۇرمەتكە لايىقتى دەپ ەسەپتەيسىز بە؟ - دەپ سۇرادى ۆەنس.

ترامپ:

- ءسىز قازىر ىڭعايلى پوزيتسيادا ەمەسسىز، ءسىزدىڭ كوزىرىڭىز جوق. ال بىزبەن بىرگە سىزدە كوزىر بولادى. ءسىز ميلليونداعان ادامنىڭ ءومىرىن تاۋەكەلگە تىگىپ وتىرسىز. ءسىز ءۇشىنشى دۇنيەجۇزىلىك سوعىستىڭ تۇتىنۋىنا قاۋىپ تۋدىرىپ وتىرسىز. 

كەزدەسۋدىڭ العاشقى جاريا بولىگى ترامپتىڭ زەلەنسكيدى جەتكىلىكتى ريزاشىلىق بىلدىرمەي وتىرعانىن سىناۋىمەن اياقتالدى.

- بۇل تەلەۆيزيا ءۇشىن كەرەمەت شوۋ بولاتىن بولدى، - دەپ قوستى ول.

ال ۋنيان اگەنتتىگى ۆەنستىڭ «سىزدە ادام، ەرلەر جەتىسپەيدى» دەگەن سوزىنە نازار اۋداردى.

- ءسىز كەلىپ، ءوز كوزىڭىزبەن كورىڭىز، - دەپ جاۋاپ قاتتى زەلەنسكي.

- ءسىز راحمەت ايتۋىڭىز كەرەك، قولىڭىزدا قاجەتتى كارتا جوق، ءسىزدىڭ اسكەرىڭىز بىتۋگە تاياۋ، - دەگەن ترامپ اتىستى توقتاتۋدى تاباندى تالاپ ەتتى.

ا ق ش باسشىسىنىڭ بۇل سوزىنە زەلەنسكي ءوزىنىڭ كارتا ويناۋ ءۇشىن كەلىپ وتىرماعانىن العا تارتتى.

وسىعان دەيىن ترامپ رەسەي اسكەرىن شىعارۋ ماسەلەسىنە قاتىستى جاۋاپ بەرگەن ەدى.