ۆەنگريا قازاقستاندا تۇقىم وندىرەتىن زاۋىت سالۋعا نيەتتى

استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ ۆەنگريانىڭ توتەنشە جانە وكىلەتتى ەلشىسى وتتو يۆان رونمەن كەزدەستى. بۇل تۋرالى ق ر ا ش م باسپا ءسوز قىزمەتى مالىمدەدى.

ۆەنگريا دەلەگاتسياسىنىڭ قۇرامىنا ۆەنگريا ەلشىلىگىنىڭ ساۋدا كەڭەسشىسى زولتان نيتراي، قۇرمەتتى كونسۋل، «LAC Holding» پرەزيدەنتى لاسلو حورۆات، پرەزيدەنتتىڭ كەڭەسشىلەرى پيتەر ميشكۋتسا جانە لايوش وچاي كىردى.

«كەزدەسۋ بارىسىندا تاراپتار قازاقستاندا تۇقىم شيكىزاتىن قايتا وڭدەۋ جونىندەگى تۇقىم زاۋىتىن، مال شارۋاشىلىعىنا قاجەتتى جەمشوپ بازاسىن ءوندىرۋ جونىندەگى ۇلگىلى شارۋاشىلىقتاردى، اگرارلىق سالانى دامىتۋ ءۇشىن قازاق-ۆەنگريا بىرلەسكەن قورىن قۇرۋ ماسەلەلەرىن تالقىلادى»، - دەلىنگەن حابارلامادا.

ايداربەك ساپاروۆ ۆەنگريا تاراپىمەن باسقا دا باسىم باعىتتاردا ىنتىماقتاسۋعا دايىن ەكەندىگىن اتاپ ءوتتى.

«ا و ك سالاسىنداعى بىرلەسكەن جوبالاردى ىسكە اسىرۋداعى ىنتىماقتاستىق ءبىز ءۇشىن ۇلكەن قىزىعۋشىلىق تۋدىرادى. ينۆەستورلارعا جان - جاقتى قولداۋ كورسەتىلەدى»، - دەدى مينيستر.

 

«LAC Holding» كومپانياسىنىڭ پرەزيدەنتى لاسلو حورۆات اۋىل شارۋاشىلىعىن دامىتۋداعى ءوزارا ءىس-قيمىل جوسپارلارى تۋرالى حابارلادى.

اتاپ ايتقاندا، ق ر ا ش م ۆەنگريا اۋىل شارۋاشىلىعى ۋنيۆەرسيتەتىمەن تاجىريبە الماسۋ تۋرالى ۋاعدالاستىققا قول جەتكىزدى. وسى جۇمىس اياسىندا ۆەنگر اگرونوم ماماندارى قازاقستاندىق اگرارشىلارمەن ءوز بىلىمدەرى مەن جەتىستىكتەرىمەن بولىسەدى.