ەنەرگەتيكالىق سۋسىنعا تاۋەلدىلىكتەن قالاي قۇتىلۋعا بولادى - دارىگەر كەڭەسى
استانا. KAZINFORM - Kazinform اگەنتتىگىنىڭ «ءبىزدىڭ ورتا» اتتى پودكاستىندا ەلىمىزدە 21 جاسقا تولماعان جاسوسپىرىمدەر مەن جاستارعا ەنەرگەتيكالىق سۋسىن ساتۋعا تىيىم سالۋ ماسەلەلەرى تالقىلاندى.

اڭگىمە بارىسىندا دارىگەر دىنمۇحاممەد باقتيار ۇلىنان ەنەرگەتيكالىق سۋسىنعا تاۋەلدىلىكپەن كۇرەس تۋرالى سۇراعان ەدىك.
- ورگانيزمگە ءۇش-اق نارسە كەرەك - ۇيقى، دۇرىس تاماقتانۋ جانە فيزيكالىق بەلسەندىلىك. ەگەر وسىلاردى دۇرىس پايدالانعان جاعدايدا، ادامدار ارتىق ەشتەڭە قاجەت ەپتەيدى. مەن ءقازىر مەكتەپ جاسىنداعى بالالارعا جىنىستىق ساۋاتتىلىق بويىنشا لەكتسيالار، ساباق وتەمىن. جىنىستىق جەتىلۋ كەزىندەگى ماڭىزدى جايتتاردى ايتامىن، ونىڭ ىشىندە ۇيقىنىڭ ماڭىزدىلىعى بار. كۇندەلىكتى ءومىرىمىزدىڭ 8 ساعاتىن ۇيقىمەن وتكىزەمىز، دەمەك 60 جىل جاساساق، 20 -جىلىمىز ۇيقىمەن كەتەدى، بۇل ءبىز ءۇشىن ماڭىزدى، ويتكەنى ورگانيزم قالپىنا كەلۋى كەرەك. تۇندە ساعات 22:00- دە ۇيىقتاۋ كەرەك دەپ ايتادى، ءبىراق تەلەفون قارايدى، باسقا نارسەلەر جاسايدى، ءسويتىپ تۇنگى ساعات 2-3-تە ۇيىقتايدى دا 8 ساعاتىن تولتىرادى، ول دۇرىس ۇيقى ەمەس. ويتكەنى، ورگانيزمدە بەلگىلى ءبىر ۋاقىتتا بولىنەتىن گارموندار بار، ونىڭ ۇستىنە جاسوسپىرىمدەر ءۇشىن ماڭىزدى، - دەدى دىنمۇحاممەد باقتيار ۇلى اڭگىمە بارىسىندا.
ماماننىڭ ايتۋىنشا، جاس ءوسپىرىمنىڭ جەتىلۋىندە ءوسۋ گارمونى ماڭىزدى ءارى باستى ءرول اتقارادى.
- وسى ۋاقىتتا ۇيقى دۇرىس ەمەس بولسا، بويدىڭ ءوسۋى، سالماقتىڭ جينالۋى بويىنشا پروبلەمالار تۋىندايدى. بىزدە تاڭعا جاقىن كورتيزول گورمونى وسەدى، ول كۇيزەلىس گورمونى ول دا ورگانيزمنىڭ وسۋىنە كەرى اسەر ەتەدى. ونى باسۋ ءۇشىن سالقىن سۋمەن شايىنۋعا بولادى، ول ەنەرگەتيكالىق سۋسىننىڭ ورنىن باسادى جانە پايدالى. بارلىق ءريتمدى رەتتەپ وتىرعاندا عانا ورگانيزمگە سىرتتان ەشتەڭە كەرەك ەمەس. دۇرىس تاماقتانۋ دا ماڭىزدى، ەنەرگەتيكتەن بولەك بىزدە ءىشىپ-جەيتىن اس كوپ. بۋرگەردىڭ قۇرامى قانت پەن كومىرسۋ. كومىرسۋلار ورگانيزمدى ارتىق سالماققا الىپ كەلەدى، ارتىق سالماق قىسىمنىڭ كوتەرىلۋىنە، تەستوستەروننىڭ تومەندەۋىنە، ۇيقىنىڭ قانباۋىنا، جۇمىس ىستەۋگە نيەتتىڭ بولماۋىنا الىپ كەلەدى. ودان كەيىن فيزيكالىق قوزعالىس، ادام اپتاسىنا 150 مينۋت اەروبيكالىق جاتتىعۋلار، 2 رەت كۇش جاتتىعۋلارىن جاساپ تۇرۋى ءتيىس، بۇل بازا، - دەيدى ول.
دارىگەر كەلتىرگەن زەرتتەۋلەرگە سۇيەنسەك، جاسوسپىرىمدەردىڭ %80، ەرەسەكتەردىڭ %46 اتالعان بازالىق جاتتىعۋلاردى جاسامايدى.
بۇدان بۇرىن جاس ءوسپىرىم اپپاراتتان ەنەرگەتيكالىق سۋسىن ساتىپ السا، جاۋاپكەرشىلىك كىمگە جۇكتەلەتىنى انىقتالدى.