نۇرجان نۇرجىگىتوۆ سۋ تاريفىنە قاتىستى تۇسىنىك بەردى

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سۋ تاريفىنە قاتىستى تۇسىنىك بەردى، دەپ حابارلايدى Kazinform.

«1- قاڭتاردان باستاپ ەگىستىكتەرگە ارنالعان سۋدىڭ ورتاشا ولشەنگەن تاريفى 1 تەڭگەگە وسەدى. ءبىز اۋىز سۋ تاريفتەرىن كوتەرۋ ماسەلەسىن قاراستىرىپ جاتقان جوقپىز»، - دەدى نۇرجان نۇرجىگىتوۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

بۇل تۇرعىدا مينيستر سۋ ۇنەمدەۋ باعىتىندا جوسپارلانعان ءىس-شارالارعا توقتالدى.

«جالپى، سۋ رەسۋرستارى تۋرالى ايتاتىن بولساق، قازاقستاندا جىل سايىن 100 تەكشە شاقىرىمنان استام سۋ جينالادى. ونىڭ 54 پايىزى قازاقستان اۋماعىنان، 46 پايىزىن ترانسشەكارالىق وزەندەردەن الامىز. بۇل نەگىزىنەن وڭتۇستىك، شىعىس جانە باتىس ايماقتار. قازىر ءبىز 25 تەكشە شاقىرىم سۋدى پايدالانامىز، ونىڭ 65 پايىزى اۋىل شارۋاشىلىعىنا، 25 پايىزى ونەركاسىپكە جانە 5 پايىزدان ءسال استامى كوممۋنالدىق-تۇرمىستىق سالاعا باعىتتالادى. سۋدىڭ جەتىسپەۋى ماسەلەسىنە قاتىستى كوپ ايتىلىپ ءجۇر. سۋ تاپشىلىعىن بولدىرماۋ ءۇشىن مينيسترلىك ءار وبلىسپەن بىرلەسە جاڭا سۋ قويمالارىن سالۋ، جۇمىس ىستەپ تۇرعان گيدروتەحنيكالىق نىسانداردى قالپىنا كەلتىرۋ، سۋارۋ جۇيەلەرىن جوندەۋ، اۋىل شارۋاشىلىعىنداعى سۋ ۇنەمدەۋ تەحنولوگيالارىنىڭ ۇلەسىن ۇلعايتۋ تۇرعىسىندا كەشەندى جوسپاردى ازىرلەدى. بۇل ءىس-قيمىلدار 2030-جىلعا قاراي 10 مىڭ تەكشە شاقىرىمعا دەيىن سۋدى جيناقتاپ، ۇنەمدەۋگە مۇمكىندىك بەرەدى»، - دەدى نۇرجان نۇرجىگىتوۆ.