داكەبايەۆتىڭ سوتىن اشىق جۇرگىزىپ، قاتاڭ جازا تاعايىنداۋ قاجەت - ەلنۇر بەيسەنبايەۆ

Парламент
سۋرەت: parlam.kz

وسى كۇنگە دەيىن دەپۋتاتتىق كورپۋس بىرنەشە رەت مەديتسينا جۇيەسىنىڭ قىزمەتكەرلەرىن قورعاۋ ءۇشىن ارنايى ستاتۋس بەكىتۋدى ۇسىنسا دا، ۇكىمەت ءالى كۇنگە دەيىن شەشىم قابىلداماعان.

پارلامەنت ماجىلىسىندەگى «AMANAT» فراكسياسىنىڭ جەتەكشىسى ەلنۇر بەيسەنبايەۆ ادامنىڭ جەكە باسىنا قاۋىپ توندىرەتىن، ءتىپتى ونىڭ ءومىرىن قياتىن قىلمىستاردىڭ جيىلەگەنىن ايتىپ، ناقتى شارا قابىلداۋدى ۇسىندى. دەپۋتاتتىڭ ساۋال جولداۋىنا قاراعاندىداعى نۇربولات داكەبايەۆتىڭ وقيعاسى تۇرتكى بولعان.

وكىنىشكە قاراي، سوڭعى كەزدە زاڭدى بەلدەن باسىپ، ويىنا كەلگەنىن ىستەيتىن بەتىمەن كەتكەندەر كوبەيدى. كۇنى كەشە قاراعاندىدا بولعان وقيعا - سونىڭ ايقىن دالەلى. ايدىڭ كۇننىڭ امانىندا ءوز قىزمەتىن ادال اتقارىپ جۇرگەن جەدەل جاردەم جۇرگىزۋشىسىن قانجوسا ەتىپ سوققىعا جىعۋ - بارىپ تۇرعان باسسىزدىق. قۇقىقبۇزۋشى نۇربولات داكەبايەۆتىڭ بۇل ارەكەتى - ءجاي عانا قىلمىس ەمەس، بۇكىل قوعامعا، زاڭ مەن تارتىپكە اشىق قارسىلىق، نە ىستەي الاسىڭ دەگەن ءدوڭايبات. ءوزىن بەينەتاسپاعا ءتۇسىرىپ جاتقانىن ءبىلىپ تۇرسا دا، ەشقانداي ايىلىن جيماي جۇدىرىق سىلتەپ، قىزمەتتەگى ادامدى قانعا بوكتىرۋى - ابدەن شەكتەن شىققاندىق، ناعىز قانىپەزەرلىك. 1 جاسار سابيگە كومەككە كەلگەن مەديتسينا قىزمەتكەرلەرىن، اشىقتان-اشىق، كۋاگەرلەردىڭ كوزىنشە ۇرىپ-سوعۋ نە دەگەن سۇمدىق؟ - دەدى دەپۋتات.

وسى كۇنگە دەيىن دەپۋتاتتىق كورپۋس بىرنەشە رەت مەديتسينا جۇيەسىنىڭ قىزمەتكەرلەرىن قورعاۋ ءۇشىن ارنايى ستاتۋس بەكىتۋدى ۇسىنسا دا، ۇكىمەت ءالى كۇنگە دەيىن شەشىم قابىلداماعان.

ادام ءومىرىن ساقتاۋ ءۇشىن ارپالىساتىن اقحالاتتى جانداردى ارنايى قىزمەت كورسەتۋشى وكىل رەتىندە زاڭمەن قورعاۋىمىز كەرەك. بۇل ۋاقىت كۇتتىرمەيتىن شەشىم. بۇل ءبىر عانا وقيعا ەمەس. الماتىدا اۆتوبۋس جۇرگىزۋشىسىن سوققىعا جىعۋدىڭ قانداي قايعىلى جاعدايعا سوقتىرعانىنا ءبارىمىز كۋا بولدىق. بۇل جاريا بولعاندارى عانا. جابۋلى قازان جابۋلى كۇيىندە قالعاندارى قانشاما. سوندىقتان مۇنداي جاعدايعا مۇلدەم جول بەرۋگە بولمايدى. وتكەندە بيشىمبايەۆ، بۇگىن داكەبايەۆ، ەرتەڭ كىم بولادى سوندا؟! - دەدى ەلنۇر بەيسەنبايەۆ.

ەڭ الدىمەن، ءتيىستى ورگانداردىڭ ءوز جۇمىسىنا سالعىرت قاراپ، قۇقىق بۇزۋشىلىقتاردىڭ الدىن الۋ شارالارىن دۇرىس ۇيىمداستىرماعانى ماسەلەنىڭ ءتۇپ-تامىرى ەكەنىن ايتقان دەپۋتات ءبىرقاتار ۇسىنىس تا ايتتى.

ەكىنشىدەن، كوپشىلىك قاراپايىم عانا قۇقىقتىق قاعيدالاردى بىلمەيتىنىن بايقاتادى. ولار ءوز قۇقىعىن بىلاي قويعاندا، زاڭ الدىنداعى مىندەتتەرى مەن جاۋاپكەرشىلىگىنەن دە حابارسىز. زاڭ مەن ءتارتىپ بارىنە بىردەي قاعيداتىن ۇستانۋ ءاربىرىمىزدىڭ مىندەتىمىز.

ۇشىنشىدەن، ۇلتتىق قۇندىلىقتاردان ادا، ادەپ پەن ار-ۇياتتى ارتتا قالۋشىلىق دەپ سانايتىن، ادامشىلىققا جات ويلارمەن ساناسى ۋلانعان ازاماتتار قالىپتاسىپ كەلەدى. بۇل ەشقانداي جاقسىلىققا اپارمايدى. سالدارىن كورىپ وتىرمىز. ءبىز زاڭ مەن ءتارتىپ ۇستەمدىك ەتەتىن، ءاربىر ازاماتتىڭ قۇقىعى قورعالعان، ءوز ءومىرى مەن دەنساۋلىعىنا قاۋىپتەنبەيتىن ادىلەتتى قازاقستاندى قالايمىز جانە ونى قۇرامىز.

سوندىقتان ۋاكىلەتتى ورگاندارعا كەلەسى شارالاردى قولعا الۋدى ۇسىنامىز:

  1. قۇقىق قورعاۋ ورگاندارى قىلمىس جاساعان داكەبايەۆتى تەزارادا تابۋى ءتيىس.
  2. نۇربولات داكەبايەۆتىڭ سوتىن اشىق جۇرگىزىپ، قاتاڭ جازا تاعايىنداۋ جانە ونىڭ بارىسى مەن قورىتىندىسى تۋرالى بۇقارالىق اقپارات قۇرالدارى ارقىلى حالىقتى تۇگەل حاباردار ەتۋ.
  3. سوڭعى ۋاقىتتارى ادامنىڭ جەكە باسىنا قاۋىپ توندىرەتىن، ءتىپتى ونىڭ ءومىرىن قياتىن قىلمىستار قوعامدىق سيپات الۋدا. سوندىقتان، تەزارادا كەز كەلگەن قىلمىستارعا قوعامدى مۇلدەم توزبەۋشىلىك مادەنيەتىن جاپپاي قالىپتاستىرۋىمىز قاجەت، - دەدى ەلنۇر بەيسەنبايەۆ.
سوڭعى جاڭالىقتار