نۇرالى ءالىپ «مانچەستەر يۋنايتەدكە» اۋىسا ما - رەسمي جاۋاپ

فۋتبولدان قازاقستان قۇراماسىنىڭ قورعاۋشىسى نۇرالى ءالىپتىڭ وكىلدەرى وعان «مانچەستەر يۋنايتەد» كومانداسى تاراپىنان قىزىعۋشىلىعى جونىندە پىكىر ءبىلدىردى، دەپ حابارلايدى Kazinform.

قازاقستاندىق ب ا ق بەتتەرىندە ەۋروپالىق كوشباسشى كوماندا سكاۋتتارىن ۇلتتىق قۇرامانىڭ سلوۆەنياعا قارسى ماتچىنا جىبەرگەنى جونىندە اقپارات تاراتقان ەدى. بۇدان كەيىن جانكۇيەرلەر اعىلشىندىق كلۋبتىڭ Instagram-اككاۋنتىنا كەڭ كولەمدە پىكىرىن جازدى.

«بۇل جونىندە اگەنتتىككە ەشكىم جۇگىنگەن جوق، قالعانى اۆتورلاردىڭ ار-وجدانىنا بايلانىستى... قازىرگى ۋاقىتتا ول «زەنيتكە» تيەسىلى، كلۋبتىڭ چەمپيون اتانۋىنا كۇش سالىپ جاتىر»، - دەپ جازىلعان اتالعان حابارلامادا.

23 جاستاعى نۇرالى ءالىپتىڭ ترانسفەرلىك باعاسى 2 ميلليون يەۆروعا باعالانىپ وتىر. ونىڭ «زەنيتپەن» كەلىسىم-شارتى 2025-جىلدىڭ 30- ماۋسىمىنا دەيىن جارامدى.

ەسكە سالساق، قازاقستان قۇراماسى 20- قاراشادا ەۋروپا چەمپيوناتى ىرىكتەۋ ساتىسىنداعى ونىنشى تۋردا سلوۆەنياعا قارسى ويىن وتكىزىپ، قارسىلاسىنا 1:2 ەسەبىمەن جول بەردى.

ەندى ەل قۇراماسى ۇلتتار ليگاسى پلەي-وفف ساتىسىندا گرەكيامەن شەبەرلىك بايقاسادى.