گەنناديي گولوۆكين حالىقارالىق بوكس فەدەراتسياسىنىڭ وليمپيادالىق كوميسسياسىن باسقارادى
استانا. KAZINFORM - قازاقستان ۇلتتىق وليمپيادا كوميتەتىنىڭ پرەزيدەنتى گەننادي گولوۆكين حالىقارالىق بوكس فەدەراتسياسى (World Boxing) جاڭا وليمپيادا كوميسسياسىنىڭ ءتوراعاسى اتاندى.
ق ر ۇلتتىق وليمپيادا كوميتەتىنىڭ باسپا ءسوز قىزمەتى ءمالىم ەتكەندەي، جۇمىس بارىسىندا قازاقستان ۇ و ك باسشىسى World Boxing قىزمەتىنىڭ اشىقتىعىن قامتاماسىز ەتۋ ماسەلەلەرىنە قاتىستى حالىقارالىق سپورتتىق ۇيىمدارمەن بىرلەسە جۇمىس ىستەۋگە كوڭىل بولەدى.
سونىمەن قاتار، ونىڭ كوميسسيا باسشىسى رەتىندەگى باستى مىندەتتەرىنىڭ ءبىرى - بوكستى وليمپيادا ويىندارىنىڭ باعدارلاماسىندا قالدىرىپ، World Boxing ۇيىمىن ح و ك مويىنداۋى ءۇشىن حالىقارالىق وليمپيادا كوميتەتىمەن تىعىز ارىپتەستىك ورناتۋ بولماق.
«جەكە ءوزىم ءۇشىن، قازاقستان ءۇشىن جانە بارشا سپورت الەمى ءۇشىن بوكستى وليمپيادالىق سپورت ءتۇرى رەتىندە ساقتاپ قالۋ ماڭىزدى جانە بۇل مەنىڭ جۇمىسىمداعى ەڭ باستى باسىمدىق بولماق. سونداي-اق، بوكس وليمپيادالىق قۇندىلىقتارعا ساي، ءادىل ءارى اشىق بولۋى ءۇشىن حالىقارالىق وليمپيادا كوميتەتىمەن تىعىز ارىپتەستىك ورناتۋدى كوزدەپ وتىرمىن. مەنىڭ كاسىبي سپورتشى رەتىندە جيعان تاجىريبەم World Boxing جۇمىسىن ءبىر جۇيەگە كەلتىرەرىنە سەنەمىن جانە كۇشىمىزدى بىرىكتىرە وتىرىپ، بوكستىڭ دامۋىنا جاڭا سەرپىن بەرە الامىز. ءبىراق الدا ءبىز اتقاراتىن جۇمىس كوپ»، - دەپ اتاپ ءوتتى گەننادي گولوۆكين.
World Boxing پرەزيدەنتى بوريس ۆان دەر ۆورستتىڭ ايتۋىنشا، گەننادي گولوۆكينمەن ارىپتەستىك ورناتۋ ۇيىمنىڭ العا قويعان ماقساتتارىن ءتيىمدى ورىنداۋعا جول اشادى.
«وليمپيادالىق بوكستا دا، كاسىبي بوكستا دا ءساتتى ونەر كورسەتكەن ادام رەتىندە ول بوكستى وليمپيادالىق قوزعالىستا قالدىرۋدىڭ بۇل سپورت ءتۇرىنىڭ ءارى قاراي دامۋى ءۇشىن اسا ماڭىزدى ەكەنىن جاقسى تۇسىنەدى. بۇل اۋەسقوي بوكس ءۇشىن دە، كاسىبي بوكس ءۇشىن دە قاجەت. بوكستى وليمپيادالىق سپورت تۇرلەرى قاتارىندا قالدىرىپ، اتالعان سپورت ءتۇرىن دامىتۋداعى ورتاق ميسسيالارىمىزدى ورىنداۋ ءۇشىن ونىمەن بىرلەسە جۇمىس ىستەيتىن مۇمكىندىكتى اسىعا كۇتەمىن»، - دەپ پىكىر ءبىلدىردى بوريس ۆان دەر ۆورست.
ايتا كەتەلىك، World Boxing گەننادي گولوۆكيننىڭ كانديداتۋراسىن العاشقىلاردىڭ ءبىرى بولىپ بەكىتتى.
جاقىن ارادا وليمپيادا كوميسسياسى قۇرامىنا سپورت الەمىنىڭ وزگە دە وكىلدەرى ەنىپ، بوكستى وليمپيادالىق قوزعالىس ورتاسىندا قالدىرۋعا ارنالعان ءىرى جوسپارلاردى جۇزەگە اسىرۋعا كۇش سالادى.
ايتا كەتەيىك، World Boxing - حالىقارالىق بوكس فەدەراتسياسى. ۇيىم 2023-جىلدىڭ ساۋىرىندە قۇرىلدى. قازىرگى تاڭدا ۇيىم قۇرامىنا الەمنىڭ 44 مەملەكەتىندەگى ۇلتتىق فەدەراتسيالار ەنگەن.
اۆتور كۇنسۇلتان وتارباي
