گەننادي گولوۆكين رينگكە قايتا ورالۋى تۋرالى مالىمدەمە جاسادى

  استانا. KAZINFORM - قازاقستاندىق بوكسشى گەننادي گولوۆكين Los Angeles Times باسىلىمىنا بەرگەن سۇحباتىندا شارشى الاڭعا قايتا ورالۋ مۇمكىندىگى تۋرالى ايتتى، دەپ حابارلايدى Sports.kz.

«مەن زەينەتكەر ەمەسپىن. وتباسىممەن باقىتتى ساتتەردى وتكەرىپ جاتىرمىن. مەنىڭ جاڭا قىزمەتىم بار، الايدا سپورتپەن شۇعىلدانۋدى توقتاتقان ەمەسپىن، سەبەبى ودان ءلاززات الامىن، ال سپورتتاعى مانسابىمنىڭ اياقتالعانى تۋرالى ەشقاشان جاريالاعان ەمەسپىن. مەن ءۇشىن ءومىر - ۋاقىت ماسەلەسى: ىڭعايلى مۇمكىندىك تۋىنداپ جاتسا، شارشى الاڭعا قايتا ورالۋىم بەك مۇمكىن» ، - دەدى گولوۆكين.

ەسكە سالا كەتسەك، گەننادي گولوۆكين (42-2-1، 37 ك و) سوڭعى جەكپە- جەگىن 2022 -جىلدىڭ قىركۇيەگىندە وتكىزدى - بۇل ونىڭ مەكسيكالىق ساۋل «كانەلو» الۆارەسپەن (61-2-2، 39 ك و) ءۇشىنشى جەكپە-جەگى بولدى، وندا قازاقستاندىق بوكسشى تورەشىلەردىڭ ءبىراۋىزدان قابىلداعان شەشىمىمەن جەڭىلىسكە ۇشىرادى. سودان بەرى گولوۆكين رينگكە شىققان جوق. كەيىن ول قازاقستان ۇلتتىق وليمپيادا كوميتەتىنىڭ باسشىسى بولىپ سايلاندى.