ۇنەمدەلگەن قارجىنى قىزمەتشىلەرگە سىياقى رەتىندە بەرۋگە بولادى - جاماۋبايەۆ
استانا. KAZINFORM - پرەزيدەنت كەڭەسشىسى، بۇرىنعى قارجى ءمينيسترى ەرۇلان جاماۋبايەۆ ۇنەمدەلگەن قارجىنى مەملەكەتتىك قىزمەتشىلەرگە تىيىم سالۋعا وراي پىكىر ءبىلدىردى.
«قارجى مينيسترلىگىنىڭ جاۋاپتى حاتشىسى، قارجى ءمينيسترى بولىپ جۇمىس ىستەدىم. بۇل جەردە انىقتاپ كەتەتىن ماسەلە بار. ەگەر بيۋدجەتتە سىياقىعا قاراجات كوزدەلگەن بولسا، وندا ونى ەشكىم الىپ قويمايدى. سىياقى رەتىندە بەرىلەدى. دەگەنمەن، مەملەكەتتىك ورگاندار ساتىپ الۋ پروتسەسىن جۇرگىزگەندە ۇنەم بولادى. سول ۇنەمدى قارجى مينيسترلىگى سىياقى رەتىندە بەرمەۋ تۋرالى شەشىم قابىلداپ وتىر. ءبىراق ول ءالى زاڭداستىرىلماعان. قازىنالىق شوت بار. سودان ءبىر- بىرىنە اۋدارۋعا بوگەت قويماقشى. ارينە، وزىمدە بىلەمىن، قانشاما ادام مەملەكەتتىك قىزمەتتە. قاراپايىم قىزمەتكەرلەرگە اۋىر تيەدى. ودان ءوزىم دە وتكەنمىن. سوندىقتان دۇرىس شەشىم قابىلداۋ قاجەت»، - دەدى ەرۇلان جاماۋبايەۆ بۇگىن وتەتىن شەتەلدىك ينۆەستورلار كەڭەسى وتىرىسى اياسىندا ب ا ق وكىلدەرىنىڭ ساۋالىنا وراي.
سونىمەن قاتار ول ۇلكەن سوما ەمەس، قانداي دا ءبىر قاراجات قالسا، وندا ونى بولۋگە بولاتىندىعىن ايتادى.
«بۇل زاڭعا قايشى ەمەس. قارسىمىن دەپ ايتا المايمىن. ءبىراق ىستەلىپ جاتقان ارەكەتتى ءتۇسىنىپ وتىرمىن. سەبەبى، مەملەكەت قاراجاتىن ۇنەمدەۋ باستى ماسەلە بولىپ وتىر. دۇرىس شەشىم قابىلداۋ قاجەت»، - دەدى ول.
كەشە ءماجىلىستىڭ جالپى وتىرىسىنان كەيىن قارجى ءمينيسترى ءمادي تاكيەۆ مەملەكەتتىك قىزمەتشىلەرگە ۇنەمدەلگەن بيۋدجەت قارجىسى سىياقى تۇرىندە بەرىلمەيتىندىگىن ايتقان بولاتىن.
