ەنەم دە ات قۇلاعىندا وينايتىن شاباندوز بولعان، سوندىقتان قولداپ وتىرادى - بلوگەر اسىل احمەتوۆا
پەتروپاۆل. KAZINFORM - اۋىلداعى ءومىردى بۇكپەسىز جاريالاپ، الەۋمەتتىك جەلىدە جىلقىشى قىز رەتىندە تانىلعان اسىل احمەتوۆا قازىر سولتۇستىك قازاقستان وبلىسى لوبانوۆو ەلدى مەكەنىندە ۇستاز بولىپ ەڭبەك ەتەدى.
ومىرگە قۇشتار بويجەتكەن بيىل تۇرمىس قۇردى. ەندى جولداسىمەن بىرگە اۋىل بالالارىنا ۇلتتىق ويىنداردى - ساداق اتۋدى، سونىڭ ىشىندە جامبى اتۋدى ۇيرەتىپ جاتىر. الەۋمەتتىك جەلىدە دە بەلسەندى، ۇلتتىق بولمىسىمىزدى ناسيحاتتاپ كەلەدى.
- اسىل، الەۋمەتتىك جەلىگە قالاي كەلدىڭىز؟ العاشقى تانىمالدىلىق قاي كەزدە، قاي جازباڭىزدان كەيىن كەلدى؟
- قاتەلەسپەسەم 2020-جىل بولاتىن، TikTok جەلىسى قارقىندى دامىپ كەلە جاتتى. بىردە ءۇيدىڭ شارۋاسىن ىستەپ ءجۇرىپ، ۆيدەو ءتۇسىرىپ، الەۋمەتتىك جەلىگە سالا باستادىم. جازبالارىما جۇرتتىڭ قىزىعۋشىلىعىن بايقادىم. كەيىن ءمىنىپ جۇرگەن جىلقىممەن ءبىر ۆيدەو ءتۇسىردىم. سول بەينەجازبا كوبىنە ۇنادى. ءشوپ، سۋ تاسىپ جۇرگەن بەينەجازبالارىم بولدى، اۋىل ءومىرىن شىنايى كورسەتۋگە تىرىستىم، سولاردى كورىپ وقىرماندارىم جازا باستادى.
- جىلقىشىنىڭ قىزى بولعاندىقتان اتتىڭ قۇلاعىندا وينايسىز با، الدە باسقا سەبەبى بار ما؟ جالپى نەشە جاسىڭىزدا اتقا وتىردىڭىز؟
- نەگىزى بەس جاسىمدا اتقا وتىردىم. اكەم جانىنان قالدىرماي وزىمەن بىرگە ەرتىپ ءجۇردى. سول كەزدەن قىزىعۋشىلىعىم، جىلقى مالىنا دەگەن سۇيىسپەنشىلىگىم وياندى. مەكتەپتە وقىپ جۇرگەندە كەيدە اكەمنىڭ ورنىنا مال باعۋعا باراتىنمىن.
- بلوگەرلىكتەن باسقا تاعى قانداي حوببيىڭىز بار؟ ساداق اتاسىز، ءان ايتاسىز، موتوتسيكل جۇرگىزەسىز - ءبىز بىلمەيتىن تاعى قانداي قىرلارىڭىز بار؟
- وقىرماندارىمنان قۇپيام جوق، ولار بارلىق قىرىمدى بىلەدى. ويتكەنى بار بىلەتىنىممەن بولىسكىم كەلەدى الەۋمەتتىك جەلىدە، سوندىقتان باسقا جاسىرىپ جۇرگەن تالانتىم جوق. ساحنادا ءان ايتۋ بالا كەزدەن ارمانىم ەدى، قازىر حوببيگە اينالدى. اۋداندا ءبىر ءىس-شارالار بولعان جاعدايدا شاقىرادى، سول كەزدە ءان ايتامىن.
- بلوگەرلىك نەگىزگى قىزمەتىڭىزگە كەدەرگى كەلتىرمەي مە؟ بىردە استانادا، ەندى بىردە الماتىدا جۇرەسىز. وقۋشىلارىڭىز جالپى ءسىزدىڭ تانىمالدىعىڭىزدى قالاي قابىلدايدى؟
- ۇلتتىق ونەردى، ۇلتتىق سپورتتى ناسيحاتتاپ، بالالاردىڭ قىزىعۋشىلىعىن وياتۋىمىز كەرەك. بۇل ءبىزدىڭ ءبىر ميسسيامىز دەپ بىلەمىن. بالالار ەستىگەننەن گورى، كورگەنىن تەز جادىندا ساقتايدى. ۇلگى بولىپ، قىزىعۋشىلىق تۋدىرۋ - ماقساتىم.
ءتۇرلى فورۋمدارعا، رەسپۋبليكالىق ءىس-شارالارعا شاقىرتۋ العان كەزدە جۇمىستان سۇرانۋعا تۋرا كەلەدى. كەيىن بالالارمەن ساباقتى قۋىپ جەتۋىمىز كەرەك. ءبىراق كەدەرگىدەن گورى مەنىڭ تانىمالدىلىعىمنىڭ وڭ اسەرى بار دەپ ويلايمىن. ارىپتەستەرىم بولسىن، وقۋشىلار بولسىن ۇنەمى قولداپ تۇرادى.
- قازىر 68 مىڭ وقىرمانىڭىز بار ەكەن. ءسىزدى نەگىزىنەن كىم وقيدى؟
- كوبىنە ءوزىمىزدىڭ سولتۇستىك ءوڭىردىڭ تۇرعىندارى وقيدى. سوسىن الماتى مەن استانادان وقىرماندارىم باسىم. جاسىنا كەلەر بولساق - 18 بەن 25 جاس ارالىعىندا.
شەتەلدەن جازادى، «قازاقستانعا كەلىپ، كورگىمىز كەلەدى» دەپ. الدىندا دانيادان كەلگەن قىزدى كۇتىپ الدىق. كوشپەندىلەر ويىندارى ءبىزدىڭ اۋىلدان ۇلى دالا جورىعىمەن باستالعاننان كەيىن شەتەلدىكتەر كوپ كەلدى، ولارمەن تانىستىق، سالتىمىز بەن مادەنيەتىمىزدى كورسەتتىك.
- وسى كوشپەندىلەر ويىنىن ءبىزدىڭ ەلدە وتكىزۋدى كەزىندە ءسىز ۇسىنعان ەكەنسىز. ءدۇبىرلى دودا كوڭىلىڭىزدەن شىقتى ما؟
- وسىدان ەكى جىل بۇرىن زەرەندىدە وتكەن فورۋمدا كوشپەندىلەر ويىنىن بىزدە وتكىزۋ تۋرالى يدەيانى ايتقان ەدىم، سول كەزدە جوعارى دەڭگەيدە وتكىزە الامىز با دەگەن وي بولدى. 2024-جىلعا دەيىن ۇلگەرەمىز بە، قاي قالادا وتەدى دەگەن سۇراقتار مازالادى. استانا مەن تۇركىستان قالالارىنىڭ اراسىندا تاڭداۋ تۇردى. ماعان ءبارى ۇنادى. اشىلۋىندا دا بولدىم، بارلىعى قازاق تىلىندە ءوتتى. العاش رەت ۇيىمداستىرىلعاندىقتان مۇمكىن كەمشىلىكتەر بولعان شىعار، ءبىراق ءوزىم بايقامادىم. ەڭ باستىسى - قازاقستانىمىزدى كوپتەگەن ەلدەر كوردى، قوناقتاردىڭ بارىنە ۇنادى.
- تۇرمىس قۇرعانىڭىزدى بىلەمىز. وتباسىلىق ومىرگە بايلانىستى بۇرىنعى ءومىر ءسۇرۋ سالتىڭىزدى وزگەرتۋ ويىڭىزدا جوق پا؟
- جولداسىم مەنى وسى ىستە قولدايدى. ول دا جىلقى مالىن جاقسى كورەدى، كوكپار وينايدى. قازىر ەكەۋمىز بىرگە ساداق اتۋ ۇيىرمەسىن اشىپ جاتىرمىز. مەملەكەتتەن دا، جەرگىلىكتى اتقارۋشى بيلىكتەن دە، مەكتەبىمنەن دە قولداۋ بار. جامبى اتۋدى، اۋدارىسپاق ويىنىن ۇيرەتەمىز، بالالار بوس جۇرمەسىن دەگەن ماقسات. ەنەم دە ات قۇلاعىندا وينايدى، كەزىندە قىز قۋۋ ويىندارىنا قاتىسقان. سوندىقتان مەنى ول دا ۇنەمى قولدايدى. كەيبىر ءىس-شارالارعا بارمايمىن دەسەم، كەرىسىنشە قاتىسقانىمدى تىلەپ، ايتىپ وتىرادى.
- ءبىر بەينەجازبادا شاۋىپ كەلە جاتقان اتتىڭ ۇستىندە تىك تۇرعانىڭىزدى كوردىم، مۇنداي قاۋىپتى جاتتىعۋلاردى جاساۋعا قورىقپايسىز با؟
- اتقا ءار مىنگەن سايىن قورقامىن. نە دەگەنمەن جانۋار عوي، ۇركۋى مۇمكىن، سوندىقتان ساق وتىرۋ قاجەت. تازىم بار، لايكا تۇقىمداس «مويناق» اتتى ءيتىم بار. جالپى جان-جانۋاردى جاقسى كورەمىن.
- ءبىر سۇحباتتا ءوز شارۋاشىلىعىمدى قۇرعىم كەلەدى دەگەن ەكەنسىز، جالپى قانداي ارمانىڭىز بار؟
- قازىر كوپشىلىك ءوزى ۇناتقان كاسىبىن اشىپ جاتىر. مەن دە ءوز شارۋاشىلىعىمنىڭ بولعانىن قالايمىن. ۇلتتىق سپورت، سونىڭ ىشىندە جىلقىمەن بايلانىستى سپورتقا كەتكىم كەلەدى. جىلقى مالىن كوبەيتىپ، شاكىرت تاربيەلەۋ ويىمدا بار. قازىر وقۋشىلارعا ارناپ ءۇش جىلقى ۇستاپ وتىرمىز. قازىر مەن مەكتەپتەن بولىك كوللەدجدە دە ەڭبەك ەتەمىن. وسى كوللەدجدە باسقا اۋداننان، وڭىرلەردەن كەلگەن بالالار وقيدى. قازاقستاننىڭ باتىسىنان كوپ. وقۋشىلاردىڭ دا، ستۋدەنتتەردىڭ دە قازاقى ونەرگە قىزىعۋشىلىعى جوعارى. ۇيرەنەم، اتقا وتىرامىن دەگەن بالانىڭ بەتىن قاقپاي، ءبارىن ۇيىرمەگە الىپ جاتىرمىز. بۇيىرتسا جارىستارعا شىعۋ دا جوسپارىمىزدا بار.
اۆتور اقەركە داۋرەنبەك قىزى
