نەلىكتەن كولىكتى قىستا نەمەسە كۇزدە ساتىپ الۋ كەرەك؟

پايدالانىلعان اۆتوكولىكتى ساتىپ العاندا جىلدىڭ قاي مەزگىلى ماڭىزدى ءرول اتقاراتىنىن بىلەسىز بە؟

كولىك ساتىپ الۋ پروتسەسى تەك تەحنيكالىق سيپاتتامالارعا عانا ەمەس، اۋا رايىنا جانە ماۋسىمدىق سۇرانىسقا دا بايلانىستى. قاي مەزگىلدە ءتيىمدى ۇسىنىستار بار ەكەنىن Massaget.kz ءتىلشىسى انىقتاپ كوردى.

ءسىز جىلدىڭ كەز كەلگەن ۋاقىتىندا جۇرىلگەن اۆتوكولىكتى ساتىپ الا الاسىز، ءبىراق ءار ماۋسىمنىڭ وزىندىك ارتىقشىلىقتارى مەن كەمشىلىكتەرى بار ەكەنىن ەسكەرگەن ءجون. قاي جىل مەزگىلىندە كولىك ساتىپ الۋ ءتيىمدى ەكەنىن قاراستىرايىق.

كولىك ساتىپ الۋدىڭ ەڭ ءتيىمدى ۋاقىتى - جاڭا جىلدىق مەرەكەلەر الدىنداعى جەلتوقسان ايى. بۇل ۋاقىتتا ەسكى كولىكتەرگە دەگەن سۇرانىس تومەندەيدى، سوندىقتان ولاردىڭ باعاسى باسقا ايلارمەن سالىستىرعاندا ارزاندايدى. ەسكى اۆتوكولىكتىڭ باعاسىنا اسەر ەتەتىن تاعى ءبىر فاكتور - شىعارىلعان جىلى. جاڭا جىلدىڭ باستالۋىمەن كولىك ءبىر جىلعا ەسكىرەدى، بۇل ونىڭ قۇنىنىڭ تومەندەۋىنە اكەلەدى. قاڭتاردا جاڭا جىلدىق مەرەكەلەردەن كەيىن الىم-ساتىق تومەندەيتىن ۋاقىت، سول كەزدە ساتۋشىلار سۇرانىستىڭ ازايۋىنان باعانى تومەندەتۋى مۇمكىن. سونىمەن قاتار ايازدى اۋا رايىندا قوزعالتقىشتىڭ سۋىق كۇندە قالاي ىسكە قوسىلاتىنىن تەكسەرۋگە بولادى، بۇل - جاڭا جىل قارساڭىندا كولىك ساتىپ الۋدىڭ تاعى ءبىر ارتىقشىلىعى.

كوكتەم

كوكتەمدە اۆتوكولىك ساتىپ الۋعا كوپ ادامداردىڭ ىنتاسى ويانادى. ماۋسىمنىڭ سوڭىنا دەيىن سۇرانىس شارىقتايدى، سوندىقتان كولىكتىڭ باعاسى بۇل ماۋسىمدا ەش تومەندەمەيدى. سونىمەن قاتار كوكتەمگى لاي-بالشىق كەزدەر اۆتوكولىكتى تولىق تەكسەرۋدە قيىندىق تۋعىزادى، سوندىقتان كولىك كاڭقاسىنداعى اقاۋلاردى بايقاماي قالۋىڭىز مۇمكىن.

جاز

جازدا جۇرىلگەن اۆتوكولىكتى ساتىپ الۋ ىڭعايلى، ويتكەنى تەكسەرۋدى اسىقپاي، ىڭعايلى جاعدايدا جۇرگىزۋگە بولادى. كۇن شۋاقتى اۋا رايىندا شۇڭقىرلار مەن سىزاتتار انىق كورىنەدى. دەگەنمەن ساتۋشىلار جەڭىلدىك جاساۋعا سيرەك بارادى، ال تامىزعا قاراي سۇرانىس ءسال تومەندەپ، باعا دا تومەندەي باستايدى.

كۇز

كۇزدە اۆتوكولىككە دەگەن سۇرانىستىڭ تومەندەۋى جالعاسادى، بۇل ساتىپ الۋشىلاردىڭ شىعىندارىن قايتا جوسپارلاپ، جاڭا جىلدىق مەرەكەلەرگە دايىندالۋىنا بايلانىستى. كەيبىرەۋلەر كولىك ساتىپ الۋدى كەيىنگە قالدىرىپ، قىسقى ماۋسىمعا دايىندىق جاسايدى. ەسىڭىزدە بولسىن، كەز كەلگەن مەزگىلدە، سونىڭ ىشىندە كۇزدە دە اۆتوكولىكتى كۇندىزگى تابيعي جارىقتا تەكسەرۋ قاجەت. سونىمەن قاتار اۆتوموبيلدىڭ كورپۋسى مەن بولىكتەرى تازا بولۋى كەرەك. وسىلايشا، قالپىنا كەلتىرىلگەن جانە قايتا بويالعان اۆتوكولىكتى ساتىپ الۋ قاۋپىنەن ساقتاناسىز.

كۇزدە جۇرىلگەن اۆتوكولىكتى ساتىپ الۋعا اۋا رايى دا اسەر ەتەدى. جاڭبىرلى نەمەسە ايازدى كۇندەرى سۇرانىس ازايادى، سوندىقتان ساتۋشى باعانى تومەندەتۋگە ءماجبۇر بولۋى مۇمكىن، بۇل كولىك ساتىپ الۋعا ىڭعايلى ۋاقىت سانالادى.

اۆتوكولىك ساتىپ الۋدىڭ ەڭ جاقسى ۋاقىتى تۋرالى ويلاعاندا، ايىرباس باعامىن دا ەسكەرۋ قاجەت. كەيدە كولىك قۇنى شەتەل ۆاليۋتاسىمەن كورسەتىلەدى جانە ساتۋشىلار باعانى بىردەن وزگەرتپەۋى مۇمكىن. سوندىقتان ءساتتى ۋاقىتتى تاپساڭىز، اۆتوكولىك ساتىپ الۋدا ايتارلىقتاي ۇنەمدەۋگە بولادى. بۇل ەرەجەلەر جاڭا كولىكتەرگە دە، ەسكى كولىكتەرگە دە قاتىستى.