نەلىكتەن دارىگەرلەر اق حالات كيىپ جۇرەدى؟
نەگىزىندە XIX عاسىردىڭ سوڭىنا دەيىن دارىگەرلەر دە، ءتىپتى، حيرۋرگتار دا ارنايى كيىم كيمەگەن. ولار وتا جاسايتىن بولمەگە سىرتىنان الجاپقىش ءىلىپ الىپ كۇندەلىكتى كيىممەن كىرە بەرگەن. ەندەشە، دارىگەرلەر قاشاننان باستاپ جانە نە ءۇشىن اق حالات كيىپ باستاعان؟
مەديتسينالىق قىزمەتكەرلەر العاش رەت اق حالاتتى شامامەن 1875-جىلداردان باستاپ كيگەن. سەبەبى شامامەن وسى ۋاقىتتا اعىلشىن حيرۋرگى دجوزەف ليستەردىڭ وتا الدىندا بارلىق قۇرالداردى وڭدەۋ كەرەگى جايلى تەورياسى كەڭ تاراي باستاعان.
باستاپقىدا حالاتتار مەن قالىڭ رەزەڭكە قولعاپتاردى دارىگەرلەردىڭ كومەكشىلەرى كيگەن. ولار وسىلايشا بولمەنى جانە قۇرالداردى زارارسىزداندىراتىن حيميالىق ەرتىندىلەردەن قولدارى مەن كيىمدەرىن قورعاعان. سودان سوڭ بۇل تاجىريبەنى حيرۋرگتار دا قولدانعان. الايدا باستاپقىدا بۇل قيىنعا سوققان، سەبەبى قولعاپپەن سكالپەلدى ۇستاۋ ىڭعايسىز بولدى. ءبىراق حالات دارىگەردىڭ كيىمىن قان مەن حيميالىق ەرىتىندىلەردەن جاقسى قورعادى.
دارىگەرلەردىڭ اق حالات كيۋىنىڭ سەبەپتەرى
بىرىنشىدەن، اق ماتادان قان جانە باسقا دا سۇيىقتىقتىڭ داعىن بايقاۋ وڭاي. مۇنداي داقتار ۋىتتى جانە جۇقپا تاسۋى مۇمكىن ەدى.
ەكىنشىدەن، اق ماقتا نەمەسە زىعىر ماتانى جوعارى تەمپەراتۋرادا ەش قيىندىقسىز جۋۋعا بولادى. ال بويالعان ماتانى بۇلاي جۋا بەرسە، جىلدام ءتۇسى كەتىپ قالادى.
ۇشىنشىدەن، اق ءتۇس كوزگە بىردەن تۇسەدى. مىسالى، اۋرۋحانادا ناۋقاستار دارىگەردى مۇنداي كيىممەن بىردەن تانيدى. سول سەكىلدى دارىگەرلەر دە ارىپتەستەرىن ادامدار اراسىنان جىلدام تابادى.
تورتىنشىدەن، اق - تازالىق، مەيىرىمدىلىك جانە شىنايىلىق ءتۇسى. كوپتەگەن مادەنيەتتە اق ءتۇس جاقسى نارسەلەرمەن، ال قارا، كەرىسىنشە، جامان نارسەلەرمەن ۇقساستىرىلادى.
الايدا سوڭعى كەزدەرى كەي ەلدەردىڭ دارىگەرلەرى ءداستۇرلى اق حالاتتان باس تارتىپ جاتىر. جەڭى ۇزىن اق حالاتتىڭ جەڭىنە ميكروبتار كوپ جينالادى ەكەن. سوندىقتان دارىگەرلەر جەڭى قىسقا جانە كوگىلدىر، جاسىل مەديتسينالىق كيىمگە اۋىسىپ جاتىر.
