نەلىكتەن ايناعا قاراي بەرۋ زيان؟

ەرتەدە ادامدار اينانىڭ سيقىرلى قاسيەتى بار ەكەنىنە سەنگەن. سوندىقتان ايناعا ءجيى جانە ۇزاق قاراۋدىڭ قاۋىپتى ەكەنىن ەسكەرتەتىن ىرىمدار دا بار. مىسالى، قاراڭعىدا ايناعا قاراۋعا، ايناعا قاراپ ۇيىقتاۋعا جانە سىنىق ايناعا قاراۋعا بولمايتىنىن ەستىگەن بولارسىز. بۇگىنگى ماتەريالدا عىلىم جانە پسيحولوگيا تۇرعىسىنان نە ءۇشىن ايناعا ءجيى قاراۋعا بولمايتىنىن تۇسىندىرەمىز.

بولماشى كەمشىلىكتەرگە اسا ءمان بەرەسىز

ادام ايناعا قاراعاندا فوكۋستى بەتى مەن دەنەسىنە قويادى. اسىرەسە، بىزگە ءمىنسىز كورىنەتىن جەرلەرگە اسا ءمان بەرەمىز. سوندىقتان ايناعا وتە ءجيى قاراساڭىز، وزىڭىزگە تىم قاتال بولۋىڭىز جانە سىرت كەلبەتىڭىزدەگى بولماشى كەمشىلىكتەرگە نەمەسە ەرەكشەلىكتەرگە اسا ءمان بەرۋىڭىز مۇمكىن. الايدا باسقالار ادامنىڭ سىرت كەلبەتىنە جالپىلاي قارايدى دا، ۇساق-تۇيەكتەرگە ءمان بەرمەيدى.

بوياۋدى ارتىق جاعىپ قوياسىز

ايناعا ءجيى قاراۋ ادەتى شاش ۇلگىسى مەن ماكياجدى تۇزەي بەرۋگە اكەلەدى. ايناعا ءار قاراعان سايىن ەرىن دالابى قانىق ەمەس سەكىلدى، ال تونالدى كرەم جۇقا جاعىلعانداي كورىنەدى. سەبەبى ادام ايناعا ءجيى قاراسا، كوزىنە ءتۇرى ۇيرەنىپ قالادى دا، كەلبەتىندە بىردەڭە جەتىسپەي تۇرعانداي كورىنەدى. الايدا وسىلاي ءجيى ماكياجىڭىزدى تۇزەي بەرسەڭىز، ونى بۇزىپ الۋىڭىز مۇمكىن. اسىرەسە، ءۇستى- ۇستىنە كوسمەتيكا جاعا بەرسەڭىز، سىرت كەلبەتىڭىز عانا ەمەس، تەرىڭىزدىڭ جاعدايىنا دا زارداپ شەگەدى.

مازاسىزدىق پايدا بولادى

مازاسىزدىق - ايناعا ءجيى قارايتىن ادامدار شالدىعاتىن تاعى ءبىر پروبلەما. ادام ءوزىنىڭ قانشالىقتى جاقسى كورىنىپ تۇرعانىن تەكسەرە بەرسە، ويىن جانە نازارىن باسقا نارسەگە قويا المايدى. جاعىمدى كەزدەسۋدەن نەمەسە قانداي دا ءبىر قويىلىمنان ءلاززات الۋدىڭ ورنىنا ول ءار 5 مينۋت سايىن ايناعا قاراي بەرەدى. ادامنىڭ بۇل ادەتى ونىمەن كەزدەسۋگە كەلگەن نەمەسە اڭگىمەلەسۋشى ادامعا دا ىڭعايسىزدىق تۋدىرادى.

ديسمورفوفوبيا پايدا بولۋى مۇمكىن

بۇل كەزدە ادام ءوزىنىڭ دەنەسىن دۇرىس باعالاي المايدى جانە ءوزى ويدان شىعارعان كەمشىلىكتەردى تۇزەتۋ ءۇشىن بارىنە بارادى. ديسمورفوفوبيامەن قينالاتىن ەرلەر مەن ايەلدەر پلاستيكالىق حيرۋرگيامەن جانە ديەتالارمەن اۋەستەنەدى. ديسمورفوفوبيانى وزدىگىنەن جەڭۋ قيىنعا سوعۋى مۇمكىن، بۇل كەزدە پسيحياتر جانە پسيحوتەراپيەۆت كومەگى قاجەت بولادى.