نەلىكتەن 100 دەن استام سپورتشى پاريج وليمپياداسىنىڭ مەدالدارىن كەرى قايتاردى؟
استانا. قازاقپارات - 2024 -جىلعى پاريج وليمپياداسىنىڭ مەدالدارى ساپاسىز بولىپ شىقتى. 100 دەن استام سپورتشى وزدەرىنىڭ ماراپاتتارىنىڭ ءبۇلىنىپ، توزىپ كەتكەنىنە شاعىمداندى. حالىقارالىق وليمپيادا كوميتەتى (ح و ك) بۇل جاعداي ءۇشىن كەشىرىم سۇراپ، مەدالداردى اۋىستىرۋعا ۋادە بەردى.

فرانسيانىڭ La Lettre باسىلىمى حابارلاعانداي، مەدالداردىڭ بۇلىنۋىنە لاك سەبەپ بولعان. بۇرىنعى لاك قۇرامىندا كانسەروگەندى زات - حروم تريوكسيدى بولعاندىقتان، ونى قاۋىپسىز بالاماعا اۋىستىرعان. الايدا، بۇل جاڭا لاك مەدالداردىڭ ۇزاق مەرزىمدى ساقتالۋىنا كەرى اسەر ەتتى. اسىرەسە، قولا مەدالدار قاتتى بۇلىنگەن.
ح و ك مالىمدەمەسىندە: «بۇلىنگەن مەدالدار پاريج مونەت سارايىندا قايتادان جاسالىپ، سپورتشىلاردىڭ سۇراۋى بويىنشا اۋىستىرىلادى. بۇل پروتسەسس 2025 -جىلدىڭ ءبىرىنشى توقسانىندا باستالادى»، - دەلىنگەن. پاريج مونەتا سارايى دا جاعدايدى باقىلاۋدا ۇستاپ وتىرعانىن جانە العاشقى اۋىستىرۋ وتىنىشتەرىن تامىز ايىندا قابىلداعانىن راستادى.
فرانسيالىق جۇزۋشىلەر يوان ندو- برۋار مەن كلەمان سەككي، سونداي-اق بريتاندىق سۋعا سەكىرۋشى ياسمين حارپەر مەدالداردىڭ ساپاسىنا پاريجدەن كەتكەنگە دەيىن-اق شاعىمدانعان. اۆستراليالىق ۆەلوشاباندوز ناتاليا ديمنىڭ قولا مەدالى نەبارى ءبىر اپتادا بۇلىنگەنى بەلگىلى بولدى.
وليمپيادا مەدالى - سپورتشىنىڭ ەڭ ۇلكەن جەتىستىگىنىڭ سيمۆولى. حوك بۇل جاعدايدىڭ بولاشاق وليمپيادالارعا دەگەن سەنىم مەن دەمەۋشىلەردىڭ قىزىعۋشىلىعىنا كەرى اسەر ەتپەۋىن قاداعالايتىنىن مالىمدەدى.