ەندى وزبەكستاندىق شەنەۋنىكتەر ايىنا ءبىر رەت جۇمىسقا اۆتوبۋسپەن بارادى
تاشكەنت. KAZINFORM - وزبەكستان استاناسى تاشكەنتتە ايىنا ءبىر رەت «اۆتوكولىكسىز كۇن» جوباسى وتكىزىلەدى.
ونىڭ بارىسىندا بارلىق بيلىك ورگانىنىڭ باسشىلارى مەن قىزمەتكەرلەرى جۇمىسقا قوعامدىق كولىكپەن كەلۋى ءتيىس. اتالمىش جوبانى ۇيىمداستىرۋ تۋرالى جارلىققا وزبەكستان پرەزيدەنتى شاۆكات ميرزيەيەۆ 21- اقپان كۇنى قول قويدى. بۇل تۋرالى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار حابارلادى.
مۇنداي تالاپ زياندى كولىك گازدارىنىڭ اۋا ساپاسىنا تيگىزىپ جاتقان تەرىس اسەرىن ازايتۋ ماقساتىندا ەنگىزىلدى. بۇل باستاماعا قوعام وكىلدەرى مەن ەكوبەلسەندىلەر قولداۋ بىلدىرگەن.
وسىعان بايلانىستى كەڭسەسى تاشكەنتتە ورنالاسقان بارلىق رەسپۋبليكالىق جانە جەرگىلىكتى اتقارۋشى بيلىك ورگانىنىڭ باسشىلارى مەن وزگە دە قىزمەتكەرلەرىنە قوعامدىق كولىكپەن جۇمىسقا بارۋ ارقىلى كوپشىلىككە ۇلگى كورسەتۋ تاپسىرىلدى.
