ەندى وتباسىندا جانجال شىعاراتىندار قايدا قامالادى

استانا. KAZINFORM -ىشكى ىستەر ءمينيسترىنىڭ ورىنباسارى يگور لەپەحا وتباسىندا جانجال شىعاراتىندار قايدا قامالاتىنىن ءتۇسىندىردى.

بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ماقۇلداندى.

بۇل تۇرعىدا تىلشىلەر ىشكى ىستەر ءمينيسترىنىڭ ورىنباسارىنا «وتباسىندا جانجال شىعاراتىنداردى قاماۋدا ۇستايتىن ورىندار جەتكىلىكتى بولا ما؟» دەگەن سۇراق قويدى.

«قاماۋدا ۇستايتىن ورىن تابىلادى. دەگەنمەن مۇنداي ادامداردىڭ سانى كۇرت ارتادى دەپ ايتا المايمىن. قازىردىڭ وزىندە ءبىز ولاردى ۇستاپ جاتىرمىز. اتاپ ايتقاندا، قازىر ءبىز ولاردى اكىمشىلىك زاڭناما اياسىندا ۇستاپ وتىرمىز، ال ەندى جاڭادان قابىلدانعان زاڭ نورمالارى بويىنشا قىلمىستىق زاڭناما اياسىندا ۇستالادى. كۇدىكتىلەر تەرگەۋ يزولياتورىنا قامالادى»، - دەدى ي. لەپەحا سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

پارلامەنت قابىلداعان ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ زاڭى مەملەكەتتىك وتباسى ساياساتىنىڭ قۇقىقتىق، الەۋمەتتىك، ينستيتۋتسيونالدىق جانە وزگە دە نەگىزدەرىن جەتىلدىرۋگە، سونداي-اق ايەلدەردىڭ قۇقىقتارى مەن بالالاردىڭ قاۋىپسىزدىگىن قورعاۋدى كۇشەيتۋگە، ولاردىڭ قاۋىپسىزدىگىن بۇزعانى ءۇشىن اكىمشىلىك جانە قىلمىستىق جاۋاپكەرشىلىكتى قاتاڭداتۋعا، وتباسىنداعى زورلىق-زومبىلىقتىڭ الدىن الۋعا باعىتتالعان.