ەندى تەرى مەن ءجۇن ەكسپورتتايتىن شارۋالار كەدەندىك باج سالىعىن تولەمەيدى
استانا. KAZINFORM - ەلىمىزدە مال تەرىسى مەن ءجۇنىن شەتەلگە شىعارۋعا قويىلعان كەدەندىك باج سالىعى جويىلادى. بۇل تۋرالى اۋىل شارۋاشىلىعى مينيسترلىگى حابارلايدى.
ۆەدومستۆونىڭ اقپاراتىنا سايكەس، 2025 -جىلعى 16- ساۋىردەگى سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ شەشىمىمەن اۋىل شارۋاشىلىعى مال تەرىسى مەن ءجۇنىن ەكسپورتتاۋعا سالىناتىن كەدەندىك باج سالىعىن الىپ تاستاۋ ماقۇلداندى. بۇل جەڭىلدىك 3 جىل مەرزىمگە ەنگىزىلىپ، كەيىن قايتا قاراۋ مۇمكىندىگى ساقتالادى.
شەشىمگە كەلۋدىڭ سەبەبى - ىشكى نارىقتا اتالعان شيكىزاتقا ايتارلىقتاي سۇرانىس جوق. اتاپ ايتقاندا، تەرى مەن ءجۇندى وڭدەۋ جانە ەكسپورتتاۋ دەڭگەيى ءالى دە تومەن دەڭگەيدە قالىپ وتىر.
اۋىل شارۋاشىلىعى تاۋارىن وندىرۋشىلەردى ىنتالاندىرۋ جانە وڭدەۋ كاسىپورىندارىنىڭ جۇكتەمەسىن قامتاماسىز ەتۋ ماقساتىندا، وڭدەۋگە وتكىزىلگەن شيكىزاتقا سۋبسيديا بەرۋ تۇرىندە مەملەكەتتىك قولداۋ شارالارى قاراستىرىلىپ جاتىر.
تەرى مەن جۇنگە سالىناتىن ەكسپورتتىق باج سالىعىن الىپ تاستاۋ، ەڭ الدىمەن، ءىرى جانە ۇساق مال وسىرەتىن فەرمەرلەردىڭ شىعىندارى مەن قالدىقتاردى جويۋعا جۇمسالاتىن شىعىستى ازايتۋعا، وندىرىستىك- ءبولۋ تىزبەكتەرىن دامىتۋعا، وتكىزۋ نارىعىن كەڭەيتۋگە، سونداي- اق اۋىل شارۋاشىلىعى شيكىزاتىن ءوندىرۋشى جانە ەكسپورتتاۋشى وتاندىق كاسىپكەرلەردىڭ باسەكەگە قابىلەتتىلىگىن ارتتىرۋعا ىقپال ەتەدى.
قازىر ۇلتتىق ەكونوميكا ءمينيسترىنىڭ 2016 -جىلعى 27 -اقپانداعى بۇيرىعىنا سايكەس، قولدانىستاعى ەكسپورتتىق باج سالىعى مولشەرى مىناداي:
• ءىرى جانە ۇساق مال تەرىلەرى مەن باسقا دا وڭدەلمەگەن تەرىلەردىڭ ەكسپورتىنا — تونناسىنا 200 ەۋرو؛
• ءجۇن ەكسپورتىنا — %10، ءبىراق تونناسىنا كەمىندە 50 ەۋرو.
ىشكى نارىق قاجەتتىلىگى مەن تەرى- ءجۇن ەكسپورتى اراسىنداعى تەڭگەرىمدى ساقتاۋ ماقساتىندا اۋىل شارۋاشىلىعى مينيسترلىگى جاعدايدى تۇراقتى باقىلاۋدا ۇستاپ وتىرادى جانە قاجەت بولعان جاعدايدا وڭدەۋ سالاسىنداعى ينۆەستيتسيالىق جوبالاردى ەسكەرە وتىرىپ، ءتيىستى شارالاردى جەدەل تۇردە قابىلدايدى.
ايتا كەتسەك، جىل باسىندا ەلىمىزدە ءىرى قارا مال تەرىسىنىڭ %78 ى وڭدەلمەيتىنى جانە ول ماسەلەنى شەشۋ جولى جايلى جازعان ەدىك.
ودان بولەك، قازاقستاننىڭ مال تەرىسىن قاي ەلدەرگە ەكسپورتتاپ وتىرعانىنا شولۋ جاسادىق.
