ەندى سپورتشىلاردىڭ دىنشىلدىك ماسەلەسى زاڭمەن قارالادى
استانا. KAZINFORM - ءماجىلىس دەنە شىنىقتىرۋ جانە سپورت، سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا زاڭدى ەكىنشى وقىلىمدا قابىلدادى.

بايانداما جاساعان دەپۋتات نارتاي ارالباي ۇلىنىڭ ايتۋىنشا، جوعارى جەتىستىكتەر سپورتىنا جاتاتىن سپورت تۇرلەرىن شەكتەۋ ۇسىنىلادى. وسى ماقساتتا وليمپيادا، پاراليمپيادا، سۋردليمپيادا، ازيا جانە پاراازيادا ويىندارىنىڭ باعدارلاماسىنا ەنگىزىلگەن سپورت تۇرلەرىن سارالاۋ الىنىپ تاستالادى.
بۇل رەتتە تۋريزم جانە سپورت مينيسترلىگى حالىقارالىق جارىستاردا جەڭىپ العان مەدالداردىڭ قورىتىندىسى بويىنشا باسىمدىق بەرىلەتىن سپورت تۇرلەرىن بەكىتەدى. ۇلتتىق سپورت تۇرلەرى ەندى باسىم سپورت تۇرلەرىنىڭ قاتارىنا ەنەدى.
زاڭدا سپورت فەدەراتسيالارىن اككرەديتتەۋدىڭ ساتىلى مودەلىن قۇرۋ كوزدەلگەن. ياعني، ەندى جەرگىلىكتى اككرەديتتەلگەن سپورت فەدەراتسيالارىنىڭ رەسپۋبليكالىق نەمەسە وبلىستىق سپورت فەدەراتسياسىنا مۇشە بولۋى تالاپ ەتىلەدى.
سونداي-اق زاڭدا سپورت فەدەراتسيالارىنىڭ ءدىني ەكسترەميزم مەن تەرروريزمنىڭ الدىن الۋ شارالارىن قابىلداۋ مىندەتى قاراستىرىلعان. تۋريزم جانە سپورت مينيسترلىگىنىڭ جەكە قۇزىرەتتەرىن شامادان تىس زاڭنامالىق رەتتەۋ نورمالارىن الىپ تاستاۋ كوزدەلگەن. تۋريزم، دەنە شىنىقتىرۋ جانە سپورت سالاسىنداعى قىزمەتتى مەملەكەتتىك رەتتەۋدىڭ نەگىزگى قاعيداتتارى، ماقساتتارى مەن مىندەتتەرى ناقتىلاندى.
ايتا كەتەيىك، بۇعان دەيىن تۋريزم جانە سپورت ءمينيسترى ەربول مىرزابوسىنوۆ ۇكىمەت ۇيىندە باسپا ءسوز ماجىلىسىندە ءدىن ماسەلەسى بويىنشا ارنايى جول كارتاسى ازىرلەنگەنىن ايتقان ەدى.