ەندى مەملەكەتتىك ناگرادالار جۇيەسىنە 9 جاڭا قۇرمەتتى اتاق ەنگىزىلدى
استانا. KAZINFORM - بۇل تۋرالى قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين Telegram ارناسىندا جازدى.
ونىڭ سوزىنشە، مەملەكەت باسشىسى ۇلتتىق قۇرىلتايدا سويلەگەن سوزدەرىندە ەڭبەكقورلىق پەن كاسىبيلىك قۇندىلىقتارىن دارىپتەۋ قاجەتتىگى تۋرالى ۇنەمى ايتىپ ءجۇر.
- ەلىمىزدە جۇمىسشى ماماندىقتارىنىڭ مارتەبەسى بىرتىندەپ ارتىپ كەلەدى. مۇعالىمدەر مەن دارىگەرلەردىڭ جالاقىسى كەزەڭ-كەزەڭىمەن ءوسىپ جاتىر. ءوندىرىس وزاتتارى مەن ەڭبەك ديناستيالارىنىڭ وكىلدەرىنە تۇراقتى تۇردە مەملەكەتتىك ناگرادالار بەرىلەدى. كاسىبي مەرەكەلەر كەڭىنەن اتالىپ وتىلەتىن بولدى، - دەپ جازدى ول.
سونىمەن قاتار، ەرلان قارين مەملەكەتتىك ناگرادالار جۇيەسىنە (بۇرىننان بار 6 قۇرمەتتى اتاققا) 9 جاڭا قۇرمەتتى اتاق ەنگىزىلگەنىن اتاپ ءوتتى.
- بۇگىن پرەزيدەنت قاسىم-جومارت توقايەۆ ءتيىستى زاڭعا قويدى. ەندى مەملەكەتتىك ناگرادالار جۇيەسىنە (بۇرىننان بار 6 قۇرمەتتى اتاققا) 9 جاڭا قۇرمەتتى اتاق ەنگىزىلدى. اتاپ ايتقاندا، عالىمدار مەن ونەرتاپقىشتارعا، ينجەنەرلەرگە، ساۋلەتشىلەرگە جانە قۇرىلىسشىلارعا، كەنشىلەر مەن شاحتەرلەرگە، گەولوگتارعا، ونەركاسىپ، كولىك، اۋىل جانە سۋ شارۋاشىلىعى سالاسىنىڭ قىزمەتكەرلەرىنە بەرىلەتىن قۇرمەتتى اتاقتار قوسىلدى. قاجىرلى ەڭبەكتىڭ مەملەكەتتىك دەڭگەيدە باعالانۋى بارشا كاسىپ يەسىنە ەرەكشە شابىت بەرەدى جانە ەڭبەك ادامىنىڭ بەدەلىن ودان ءارى كوتەرۋگە سەپتىگىن تيگىزەدى. بۇل زاڭعا مەملەكەت باسشىسى «جۇمىسشى ماماندىقتار جىلى» دەپ جاريالاعان جاڭا 2025 -جىلدىڭ قارساڭىندا قول قويىلۋىنىڭ سيمۆولدىق ءمانى بار، - دەپ تۇيىندەدى قارين.
ەسكە سالساق، مەملەكەت باسشىسى قاسىم-جومارت توقايەۆتىڭ جارلىعىمەن 2025 -جىل جۇمىسشى ماماندىقتارىنىڭ جىلى دەپ جاريالاندى. پرەزيدەنت 27-جەلتوقساندا ءتيىستى جارلىققا قول قويدى.
