ەندى كوزى ءتىرى تۇلعالارعا ەسكەرتكىش قويىلمايدى

استانا. KAZINFORM - مونۋمەنتتەردى ورناتۋ قاعيدالارى وزگەرەدى. بۇل تۋرالى ق ر مادەنيەت جانە اقپارات ءمينيسترىنىڭ بۇيرىق جوباسىندا جازىلعان، دەپ حابارلايدى El.kz اقپارات اگەنتتىگى.

قازاقستان رەسپۋبليكاسىنىڭ «تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى» زاڭىنا سايكەس مونۋمەنتتىك ونەر قۇرىلىستارىن ورناتۋ جونىندەگى جۇمىستى وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ جەرگىلىكتى اتقارۋشى ورگاندارى جۇرگىزەدى.

جەرگىلىكتى اتقارۋشى ورگانداردىڭ مونۋمەنتتىك ونەر قۇرىلىستارىن ورناتۋى بيۋدجەت جانە بيۋدجەتتەن تىس قاراجات ەسەبىنەن جۇزەگە اسىرىلادى. مونۋمەنتتىك ونەر قۇرىلىستارىن ورناتۋ قازاقستان رەسپۋبليكاسى ۇكىمەتىنىڭ 1999 -جىلعى 28-قىركۇيەكتەگى №1465-قاۋلىسىمەن ايقىندالعان كورنەكتى تۇلعالاردىڭ مەرەيتويلىق جانە اتاۋلى كۇندەرىنە، ماڭىزدى تاريحي وقيعالارعا ورايلاستىرىلادى.

مونۋمەنتتىك ونەر قۇرىلىستارى رەسپۋبليكالىق ونوماستيكا كوميسسياسى بەكىتكەن تاريحي تۇلعالار تىزىمىندە كورنەكتى ءتۇلعانىڭ بولۋىن ەسكەرە وتىرىپ ورناتىلادى. قۇرىلىس مەملەكەت تاۋەلسىزدىگىن نىعايتۋعا قوسقان، قاھارماندىق پەن ەرلىك كورسەتكەن ەرەكشە جاعدايلاردى قوسپاعاندا، اسا كورنەكتى تۇلعالار قايتىس بولعان جانە (نەمەسە) تاريحي وقيعالار بولعان كۇننەن باستاپ بەس جىلدان ەرتە قارالمايدى، - دەلىنگەن بۇيرىق جوباسىندا.

قۇرىلىستىڭ جۇرتشىلىققا قول جەتىمدىلىگىن قامتاماسىز ەتۋ ماقساتىندا جەكە ۇيىمداردىڭ اۋماقتارىندا جانە جەكەلەگەن مەنشىك يەلەرى مەن پايدالانۋشىلارعا تيەسىلى ۋچاسكەلەردە قۇرىلىستى ورناتۋعا جول بەرىلمەيدى.