ەندى ۇشاقتاردا جاڭا ورىندىقتار ورناتىلادى
استانا. قازاقپارات - ۇشاقتا جولاۋشىلارعا بوس كەڭىستىكتى ۇلعايتۋ جانە كرەسلو سانىن كوبەيتۋ ماقساتىندا اۋە كومپانيالارى ءتۇرلى تاسىلدەردى قولدانۋدا. امەريكالىق Southwest Airlines ەندى جۇقا ورىندىقتاردى سىناپ كورمەكشى.
Quartz سايتىندا جۇقا كرەسلو ورناتۋ اۋە كومپانيالارىنىڭ تابىسىن قالاي وسىرەتىنى تۋرالى تالداۋ ماقالاسىن جاريالادى. وسى ماقالانىڭ نەگىزىندە Aikyn.kz ۇشاققا كوبىرەك جولاۋشىلار سىيدىرۋ ماقساتىن كوزدەيتىن شەشىمنىڭ ەكونوميكالىق جانە تەحنيكالىق سەبەپتەرىن تۇسىندىرەدى.
امەريكالىق بيۋدجەتتىك Southwest Airlines اۋە كومپانياسىنىڭ تاپسىرىسىمەن جاسالعان جاڭا Recaro كرەسلولارى كەلەسى جىلى اۆياكومپانيانىڭ Boeing 737 Max 8 ۇشاقتارىنا ورناتىلماقشى. Recaro ورىندىقتارى بار قايتا جوبالانعان سالوندار تازا، زاماناۋي ديزاينمەن ەرەكشەلەنەدى. ولاردىڭ باستى ەرەكشەلىگى كرەسلولار تاقتا سياقتى جۇقا.
پەنوپلاستان جاسالعان كرەسلونىڭ ارقالىعى «Recaro-نىڭ اۆتوموبيلدەرگە قويىلعان كرەلوسلاردىڭ تاجىريبەسىن ەسكە تۇسىرەدى» دەيدى ءوندىرۋشى كومپانيا. دەگەنمەن ۇشاقتىڭ سالونىنداعى كەڭىستىكتى ۇلعايتۋ جانە بورتتا كوبىرەك جولاۋشىلاردى ورنالاستىرۋ ءۇشىن كرەسلولاردى جۇقا جاساۋ ءۇردىسى جالعاسۋدا.
بۇل جاڭا كرەسلولار Southwest Airlines كومپانياسىنىڭ جاڭا Boeing 737 Max 8 ۇشاعىندا 2025 -جىلدىڭ باسىندا پايدا بولادى.
2025 -جىلى قويىلاتىن Recaro BL3710 ورىندىقتارى مۇمكىندىگىنشە از ورىن الاتىنداي ەتىپ جاسالعان. جاساندى بىلعارىدان تىگىلگەن كرەسلولاردىڭ الدىڭعى جاعىندا جۇقا پەنوپلاست قاباتى بار.
كوپتەگەن زاماناۋي ەكونوم كلاستاعى ورىندىقتار سياقتى، بورتتاعى ويىن-ساۋىق جۇيەسى «جەكە قۇرىلعى ۇستاعىشىمەن» اۋىستىرىلعان. ۇستاعىش - بۇل سمارتفوندى نەمەسە پلانشەتتى ىڭعايلى ەتىپ ۇستاۋعا ارنالعان ۇزىنىراق ناۋا. سونىمەن قاتار، ءۇش قاتاردا قويىلاتىن كرەسلولاردىڭ ەنى 43 سانتيمەتردەن 45 سانتيمەترگە ۇلعايتىلعان.
جولاۋشى ۇشاقتارىنداعى اياق ارالىعى ادەتتە ورىندىق قادامىمەن ولشەنەدى، بۇل ءبىر ورىندىقتاعى نۇكتەدەن ونىڭ ارتىنداعى ورىندىقتىڭ سول نۇكتەسىنە دەيىنگى قاشىقتىق. ەكونوم كلاسس ءۇشىن امەريكالىق ءىرى تاسىمالداۋشىلاردىڭ (Delta, American, United) ۇشاقتارىندا ستاندارتتى قادام 81 س م بولدى. جاڭا جۇقا ورىندىقتار اياققا كوبىرەك ورىن نەمەسە ۇشاق بورتىندا تاعى بىرنەشە قوسىمشا قاتار ورنالاستىرۋعا كەڭىستىك بەرەدى.
كەيبىر تاسىمالداۋشىلار قوسىمشا اقىعا ارنايى «پرەميۋم ەكونوم» ورىندار ۇسىنادى. مىسالى، Delta Air Lines ۇشاقتارىندا قوسىمشا اقىعا اياق قوياتىن ورىننىڭ كەڭىستىگى 86 س م بولاتىن ورىنداردى تاڭداۋعا بولادى. اۋە كەمەسىندە ءاربىر سانتيمەتر ماڭىزدى.
فەدەرالدىق اۆياتسيا اكىمشىلىگى 2022 -جىلى مىندەتتى ورىندىق ولشەمدەرىن ەنگىزۋدى كوزدەگەن بولاتىن. ءبىراق ودان ەشتەڭە شىقپادى. اۋە كومپانيالارى ءار رەيستەن مۇمكىندىگىنشە كوپ تابىس الۋ ءۇشىن جۇقا، جەڭىل ورىندارعا ۇمتىلۋدى جالعاستىرۋدا.
