ەندى ءار قۇرىلىستىڭ ءوز «ج س ن»-ى بولادى

استانا. KAZINFORM - ونەركاسىپ جانە قۇرىلىس ءمينيسترى ەرسايىن ناعاسپايەۆ قۇرىلىس نىسانىنىڭ بىرەگەي ءنومىرى نە ءۇشىن ەنگىزىلەتىنىن ءتۇسىندىردى.

- نىساننىڭ بىرەگەي ءنومىرى دەگەن شىنىمەن دە جاڭاشىلدىق دەپ ايتۋعا بولادى. كۇندەلىكتى ومىرمەن سالىستىرساق، نىساننىڭ بىرەگەي ءنومىرى دەگەن ءار ادامدا بار ج س ن-گە ۇقسايدى. بىرەگەي ءنومىر نىسانعا مەملەكەتتىك قالا قۇرىلىسى كاداسترىندا جوبالاۋ كەزەڭىندە بەرىلەدى. ول ءنومىر اۆتوماتتى تۇردە بەرىلەدى جانە نىساننىڭ بۇكىل «ءومىر» تىزبەگىندە ونىمەن بىرگە جۇرەدى - جوسپارلاۋ كەزەڭىندە، ساراپتاما كەزەڭىندە، قۇرىلىس كەزەڭىندە، ءتىپتى ۋتيلدەۋ كەزەڭىندە بىرگە بولادى، - دەدى مينيستر ءماجىلىس دەپۋتاتىنىڭ سۇراعىنا بەرگەن جاۋاپتا.

ونىڭ سوزىنشە، بۇل قۇرىلىس ساپاسىن قاداعالاۋعا دا وڭتايلى.

- مىنانداي مىسال كەلتىرەيىن. قازىر كەيبىر نىسان قولدانىسقا بەرىلگەننەن كەيىن مەنشىك يەسى ونى جەتىلدىرگىسى كەلسە، قانداي دا ءبىر وزگەرتۋ ەنگىزگىسى كەلسە، باستاپقى قۇجاتتارىن تابا الماي جاتادى. ويتكەنى قۇرىلىس بىتكەن سوڭ وتكىزگەن قۇجاتتار جوعالعان بولىپ شىعادى. ەندى نىساندى بەلگىلى ءبىر ۋاقىت وتكەننەن كەيىن جاڭعىرتقىڭىز كەلسە، بىرەگەي ءنومىر بويىنشا جۇيەدەن بۇكىل قۇجاتىن تابا الاسىز. باستاپقى جوباسى قانداي بولعانىن، قانداي ماتەريالدار مەن تاسىلدەر قولدانىلعانىن كورە الاسىز. وسى بىرەگەي ءنومىر ارقىلى سيفرلىق فورماتتا نىساندى قاداعالاپ وتىرۋعا بولادى، - دەدى ەرسايىن ناعاسپايەۆ.

ايتا كەتەيىك، ءدال قازىر ءماجىلىس قۇرىلىس قىزمەتىن قاعازباستىلىقتان ارىلتاتىن قۇجاتتى قاراپ جاتىر.