ەندى اسكەري ينستيتۋت تۇلەكتەرى ەكى ديپلوم الا الادى

استانا. قازاقپارات - راديوەلەكترونيكا جانە بايلانىس اسكەري-ينجەنەرلىك ينستيتۋتى ءتورت جىلدىق ءبىلىم بەرۋ باعدارلاماسىنا تولىق كوشتى، - دەپ حابارلايدى قورعانىس مينيسترلىگى.

ينستيتۋت باسشىسى، گەنەرال-مايور قايرات ءداۋتوۆتىڭ پىكىرىنشە، جاڭا وقۋ باعدارلاماسى ءبىلىم ساپاسىن ارتتىرۋعا مۇمكىندىك بەرەدى.

«ءتورت جىلدىق وقۋ مەرزىمىنە كوشۋ ينستيتۋتقا حالىقارالىق ءبىلىم بەرۋ ستاندارتتارىنا سايكەس بولۋعا مۇمكىندىك بەرەدى. مۇنداي شەشىم جوعارى بىلىكتى مامانداردى دايىنداۋ پروتسەسىن جەدەلدەتەدى، - دەدى باسشى.

بيىل ينستيتۋت ەكى جاڭا ماماندىق ەنگىزىپ وتىر. ونىڭ ءبىرى - «جۋرناليستيكا جانە اسكەري ىستەگى قوعاممەن بايلانىس» ماماندىعى.

سيفرلىق تەحنولوگيالار مەن اقپاراتتىق سوعىس داۋىرىندە اسكەري جۋرناليستىڭ ءرولى بارعان سايىن ماڭىزدى بولا باستادى. بۇل ماماندىقتىڭ كۋرسانتتارى ساپالى كونتەنت قۇرۋ، قوعامدىق پىكىردى قالىپتاستىرۋ جانە زاماناۋي مەديامەن جۇمىس ىستەۋ ءادىسىن ۇيرەنىپ شىعادى.

«اسكەري ىستە ديريجەرلىق ەتۋ» ماماندىعىنا وقۋعا تۇسكەن كۋرستانتتار جوعارى كاسىبي دەڭگەيدە ءتۇرلى ءىس-شارالاردى، شەرۋلەر مەن راسىمدەردى مۋزىكالىق سۇيەمەلدەۋدى ىسكە اسىراتىن اسكەري وركەسترلەردى باسقارۋدى ۇيرەنەدى. بۇل ماماندىق كۋرسانتتارعا اسكەري ورتادا شىعارماشىلىق جاعىنان دا، ءوزىن-ءوزى دامىتۋ جاعىنان دا جاڭا مۇمكىندىكتەر اشادى.

تۇلەكتەر تاڭداعان ماماندىعىنا قاراي اسكەري ينستيتۋت پەن سەرىكتەس جوعارى وقۋ ورىندارى - ءال-فارابي اتىنداعى قازاق ۇلتتىق ۋنيۆەرسيتەتىن نەمەسە قۇرمانعازى اتىنداعى قازاق ۇلتتىق كونسەرۆاتورياسىن بىتىرگەنى تۋرالى ەكى ديپلوم الىپ شىعادى.

جاڭا ماماندىقتارعا وقۋعا تۇسۋگە نيەت بىلدىرگەن تالاپكەرلەر ءۇشىن بيىل 20-ماۋسىمنان 7-شىلدەگە دەيىن شىعارماشىلىق ەمتيحاندارعا تىركەلۋ جۇرگىزىلەدى. ول 8-15-شىلدە ارالىعىندا وتەدى.