نازاربايەۆ ۋنيۆەرسيتەتىنىڭ باسشىلىق قۇرامىندا قازاقستاندىقتار نەگە از - ساياسات نۇربەكتىڭ جاۋابى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ءماجىلىس دەپۋتاتى اسحات ايماعامبەتوۆتىڭ نازاربايەۆ ۋنيۆەرسيتەتىندەگى كادر ساياساتىنا بايلانىستى جازعان سىنىنا پىكىر ءبىلدىردى.

- اسحات قانات ۇلىنىڭ ايتقان ءسوزىنىڭ جانى بار. قازىرگى تاڭدا نازاربايەۆ ۋنيۆەرسيتەتى - اۆتونومدى، تاۋەلسىز فورماداعى ۇيىم. تىكەلەي مينيسترلىك تە، ۇكىمەت تە جۇمىسىنا ارتىق ارالاسا المايدى. وزدەرىنىڭ زاڭدارى بار. ياعني، ىشكى اۆتونومياسى بار. دەگەنمەن ءبىز ۋنيۆەرسيتەت باسشىلىعىمەن كەزدەسىپ، ءدال وسىنداي ۇسىنىستاردى ايتتىق. قازىر نازاربايەۆ ۋنيۆەرسيتەتىندە اياقتان تۇرىپ، مىقتى ءوسىپ كەلە جاتقان سۇراعان دوربەتحان، دوس سارباسوۆ سياقتى جەرگىلىكتى بۋىن بار. ال ءسىز ايتقانداي، باسشىلىق قۇرامداعى جالعىز قازاقستاندىق ايدا قىستاۋباي قىزى قازىر ۆيتسە-پروۆوست بولىپ تاعايىندالدى - ەكىنشى لاۋازىمى بار. ءبىزدىڭ ۇسىنىستارىمىزدى ەسكەرەمىز دەپ ءسوز بەردى، - دەدى ول ۇكىمەت وتىرىسىنان كەيىن وتكەن باسپا ءسوز ءماسليحاتىندا.

ايتۋىنشا، ۋنيۆەرسيتەتتىڭ قۇرامىنان اشىلاتىن كوللەدجدەردى باسقارۋعا قازاقستاندىق ماماندار كوبىرەك تارتىلماق.

- قازىر ۋنيۆەرسيتەتتىڭ ءۇش جىلدىق ستراتەگياسى بەكىتىلدى. جاڭا جىلدان باستاپ جاڭا قۇرىلىمدىق جۇيەگە كوشەدى - كوللەدجدەر بولادى. سول جەردە جەرگىلىكتى كادرلاردى ەسكەرەمىز دەگەن ءسوز بەرگەن بىزگە، - دەدى ساياسات نۇربەك.

ايتا كەتۋ كەرەك، ءماجىلىس دەپۋتاتى اسحات ايماعامبەتوۆ Facebook تەگى پاراقشاسىندا نازاربايەۆ ۋنيۆەرسيتەتىنىڭ كادر ساياساتىن سىناعان بولاتىن.