NASA ايعا جۇك جەتكىزۋ باعدارلاماسىنا قاتىساتىن سەگىز كومپانيانى تاڭدادى

سونىڭ ءبىرى - ايعا جۇك جەتكىزۋ ميسسيالارىنا قاتىساتىن سەگىز كومپانيانى ىرىكتەۋ، دەپ حابارلايدى «شينحۋا» اگەنتتىگى.

تاڭدالعان سەگىز كومپانيانىڭ قاتارىندا Blue Origin، Firefly Aerospace، Intuitive Machines, iSpace US، Lockheed Martin, Northrop Grumman, SpaceX جانە Voyager Technologies بار.

NASA بۇل تۋرالى فلوريدا شتاتىنداعى كەننەدي عارىش ورتالىعىندا وتكەن MAX POWER اەروعارىش كورمەسى مەن اۆياشوۋ بارىسىندا مالىمدەدى.

Commercial Lunar Payload Services 2 (CLPS 2) دەپ اتالاتىن جاڭا باعدارلاما اياسىندا كومپانيالار ايعا جۇك جەتكىزۋ قىزمەتىن كورسەتەدى. ولار NASA نىڭ عىلىمي زەرتتەۋلەرگە، تەحنولوگيالىق ازىرلەمەلەرگە جانە ينفراقۇرىلىمعا ارنالعان جۇكتەرىن ايعا تاسىمالدايتىن قونۋ اپپاراتتارىن باسقارۋ، قۇراستىرۋ جانە پايدالانۋمەن اينالىسادى.

NASA سونىمەن قاتار يادرولىق ەنەرگيامەن جۇمىس ىستەيتىن Polar Rover for Observation, Mapping, and In-Situ Exploration اتتى اي روۆەرين ازىرلەۋ جۇمىستارىن جالعاستىراتىنىن حابارلادى.

التى دوڭعالاقتى روۆەر ايدىڭ وڭتۇستىك پوليۋسىنە قونىپ، ونىڭ بەتكى قاباتى مەن جەر قويناۋىن زەرتتەيدى. سونداي-اق تابيعي رەسۋرستاردىڭ الەۋەتىن باعالاپ، بولاشاقتا قونۋ الاڭدارىن تاڭداۋ، ينفراقۇرىلىمدى دامىتۋ جانە زەرتتەۋ جۇمىستارىن جوسپارلاۋ ءۇشىن قاجەتتى دەرەكتەر جينايدى.

NASA مالىمەتىنشە، يادرولىق قۋاتپەن جۇرەتىن روۆەر ايداعى ۇزاق تۇندەردە جانە ۇنەمى كولەڭكەدە بولاتىن ايماقتاردا دا جۇمىس ىستەي الادى. عالىمدار مۇنداي جەرلەردە مۇز قورى بولۋى مۇمكىن دەپ ەسەپتەيدى. بۇل مۇمكىندىك ايدا ادامنىڭ ۇزاق ۋاقىت بويى تۇراقتى بولۋىن قامتاماسىز ەتۋ ءۇشىن اسا ماڭىزدى سانالادى.

اي بەتىندەگى ينفراقۇرىلىمنىڭ مۇمكىندىكتەرىن كەڭەيتۋ ماقساتىندا NASA شاعىن بايلانىس جانە كۇن ەنەرگياسى مۇناراسىنا ارنالعان كوممەرتسيالىق كومپونەنتتەردى ساتىپ الۋدى جوسپارلاپ وتىر. ولاردىڭ قاتارىندا كۇن پانەلدەرى، اككۋمۋلياتورلار جانە سىمسىز ەنەرگيا بەرۋ جابدىقتارى بار.

ايتا كەتەيىك، بۇعان دەيىن NASA نىڭ Swift عارىش وبسەرۆاتورياسى عارىشتا 20 جىل بولعاننان كەيىن جەرگە قۇلاعانىن حابارلاعان ەدى.

ال وعان دەيىن اتالعان عارىش وبسەرۆاتورياسىن قۇتقارۋ وپەراتسياسى اياسىندا NASA وربيتاعا العاشقى روبوتىن ۇشىرعان ەدى.

سونداي-اق NASA مارستا سۋدىڭ بىرنەشە رەت بولعانىن دالەلدەيتىن بەلگىلەر تابىلعانىن مالىمدەدى.