ناۋرىزدان باستاپ باقىلاۋ-كاسسالىق ماشينالاردىڭ ۋاقىتى وزگەرە مە

استانا. KAZINFORM - مەملەكەتتىك كىرىستەر كوميتەتى 1- ناۋرىزدان باستاپ ەلىمىزدىڭ ءبىرىڭعاي ۋاقىت بەلدەۋىنە كوشەتىنىنە بايلانىستى سالىق تولەۋشىلەردىڭ نازارىنا حابارلاندىرۋ جاريالادى.

قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتى ۇكىمەتتىڭ 2024-جىلعى 19- قاڭتارداعى 20- قاۋلىسىنا سايكەس قازاقستان رەسپۋبليكاسىنىڭ بۇكىل اۋماعىندا 5-ساعات بەلدەۋى قولدانىلاتىنىن، سونداي-اق 2024-جىلعى 29- اقپاننان باستاپ 2024-جىلعى 1- ناۋرىزعا قاراعان ءتۇنى (ساعات 00:00 دە) جەرگىلىكتى ۋاقىت قازاقستان رەسپۋبليكاسىنىڭ بارلىق اۋماعىندا 1 ساعات كەيىن اۋىستىرىلاتىنىن حابارلايدى.

«اپپاراتتىق-باعدارلامالىق كەشەن سانالاتىن باقىلاۋ-كاسسالىق ماشينالارىندا ۋاقىت اۆتوماتتى رەجيمدە وزگەرەدى. ال اپپاراتتىق-باعدارلامالىق كەشەن سانالمايتىن، ياعني «تەمىر» باقىلاۋ-كاسسالىق ماشينالاردىڭ ۋاقىتىن تۇتىنۋشى ءوز بەتىنشە پايدالانۋ جونىندەگى نۇسقاۋلىققا («كۇن مەن ۋاقىتتى باعدارلامالاۋ» ءبولىمى) سايكەس 2024-جىلعى 29- اقپاننان كەيىن جۇرگىزۋ قاجەت»، - دەلىنگەن حابارلاندىرۋدا.

ۆيدەو نۇسقاۋلىقپەن مەملەكەتتىك كىرىستەر كوميتەتىنىڭ press_kyzmet_kgd ، kgd.gov.kz، kgdmfrk رەسمي رەسۋرستارى ارقىلى تانىسۋعا بولادى.

سۇراقتار تۋىنداعان جاعدايدا باقىلاۋ-كاسسالىق ماشينالاردى سۇيەمەلدەۋ شارتتارى شەڭبەرىندە تەحنيكالىق قىزمەت كورسەتۋ ورتالىقتارىنان، مەملەكەتتىك كىرىستەر باسقارمالارىنان نەمەسە 1414 (3) تەلەفون ءنومىرى ارقىلى تەگىن كەڭەس الۋعا بولادى.