ناۋرىز مەرەكەسىندە وقۋشىلار ءبىر مەزگىلدە كۇي تارتادى

استانا. قازاقپارات - 20- ناۋرىز كۇنى ساعات 11:00 دە ناۋرىز مەيرامىنا وراي بارلىق مەكتەپتە رەسپۋبليكالىق چەللەندج وتەدى، دەپ حابارلايدى وقۋ-اعارتۋ مينيسترلىگى.

شارانىڭ ماقساتى - وسكەلەڭ ۇرپاقتىڭ بويىندا رۋحاني-ادامگەرشىلىك قۇندىلىقتارىن قالىپتاستىرۋ، پاتريوتيزمدى نىعايتۋ، ۇلتتىق مادەني مۇرانى ساقتاۋ جانە بالالار اراسىندا دومبىرا ونەرىن ناسيحاتتاۋ.

- دومبىراشىلار چەللەندجى - بۇل بالالار، جاستار، پەداگوگتەر مەن اتا- انالاردىڭ مۋزىكالىق شەبەرلىگىن تانىتاتىن جانە بۇكىل ەلدى دومبىرا ۇنىمەن بىرىكتىرەتىن ەرەكشە شارا. وعان بارلىق تىلەك ءبىلدىرۋشى قاتىسا الادى. 2023 -جىلدان باستاپ چەللەندج بارلىق ءبىلىم بەرۋ ۇيىمدارىندا ۇيىمداستىرىلىپ كەلەدى جانە ول ماڭىزدى مادەني وقيعاعا اينالدى. چەللەندج «ءبىرتۇتاس تاربيە» باعدارلاماسى مەن «ناۋرىزناما» ءىس- شارالار جوسپارى اياسىندا ۇيىمداستىرىلادى، - دەيدى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى ەرلان قالماقوۆ.

ايتا كەتەيىك، ناۋرىز مەيرامىن مەرەكەلەۋ 14-23- ناۋرىز ارالىعىندا ەلىمىزدىڭ بارلىق مەكتەپتەرىندە وتەدى. بۇل كۇندەرى تاقىرىپتىق چەللەندجدەر، ەكولوگيالىق اكسيالار جانە ۇلتتىق ويىندار بويىنشا جارىستار ۇيىمداستىرىلادى.

وسىعان دەيىن مەملەكەت باسشىسى قاسىم-جومارت توقايەۆ امال كۇنىمەن قۇتتىقتاعانىن حابارلاعان ەدىك.

سونىمەن قاتار ماڭعىستاۋداعى وتپان تاۋدا «بىرلىك وتى» جاعىلعانى بەلگىلى بولدى.