ناۋرىز مەرەكەسى قارساڭىندا تۇركىستان قالاسىنا كەلۋشىلەر كوبەيدى

Наурыз
فوتو: تۇركىستان وبلىسى اكىمدىگى

تۇركىستان. KAZINFORM - تۇركى الەمىنىڭ استاناسى اتانعان كيەلى شاھارعا 17-24-ناۋرىز ارالىعىندا كەلەتىن تۋريستەر سانى 20 مىڭنان اسادى دەپ جوسپارلانىپ وتىر. 7 تاۋلىككە نەگىزدەلگەن الدىن الا مالىمەتكە سۇيەنسەك، كيەلى شاھارداعى قوناق ۇيلەردە قازىر بوس ورىن جوق.

تۇركىستان قالاسىندا نومىرلىك قورى 1240 بولمە 59 ورنالاستىرۋ ورنى جۇمىس ىستەيدى. وعان ءبىر مەزەتتە 2671 ادام ورنالاسادى. مەرەكەلىك اپتادا تۇركىستان قالاسىنداعى ورنالاستىرۋ ورىندارى 100 پايىز تولىپ تۇر. ياعني، قوناق ۇيلەردە بوس ورىن جوق. سونداي-اق، اۋە رەيستەرى دە %85 تولعان.

E-qonaq جۇيەسىنىڭ دەرەكتەرىنە سايكەس بيىلعى 2-ايدىڭ قورىتىندىسى بويىنشا وڭىرگە 2228 شەتەلدىك تۋريست كەلگەن. اتالعان كورسەتكىشتى وتكەن جىلدىڭ سايكەس كەزەڭىمەن سالىستىرار بولساق 4,7 ەسە ارتقانىن كورەمىز. ياعني، 2023 -جىلدىڭ 2 ايىندا نەبارى 475 شەتەلدىك قوناق بولعان.

Наурыз
فوتو: تۇركىستان وبلىسى اكىمدىگى

جالپى، تۇركىستانعا كەلگەن تۋريستەر ەكى كۇن بويى ناۋرىز مەرەكەسىنە ارنالعان دۋماندى ءىس-شارالاردى تاماشالاي الادى.

اتاپ ايتار بولساق، 21 ناۋرىز كۇنى ساعات 12:00-18:00 ارالىعىندا «جەڭىس» ساياباعىندا «نۇر جاۋعىزعان ءاز- ناۋرىز» شاراسى وتەدى. وندا تەاترلاندىرىلعان قويىلىمدار، مەرەكەلىك كونسەرتتەر، سپورتتىق جارىستار ۇيىمداستىرىلماق. كەشكى ساعات 19:30-دا «كونگرەسس حول» كەشەنىندە حالىقارالىق «NAURYZ BIG FEST» فەستيۆالى وتەدى دەپ جوسپارلانىپ وتىر.

تۇركىستان قالاسىنىڭ تۇرعىندارى مەن قوناقتارى 22-ناۋرىزدا ساعات 11:00-دە «كەرۋەن ساراي» كەشەنىندە «ارمىسىڭ، ءاز-ناۋرىز!» اتتى مەرەكەلىك سالتاناتتى ءىس-شارانى تاماشالايدى. وندا تەاترلاندىرىلعان قويىلىمدار، كونسەرتتىك باعدارلامالار، قولونەر شەبەرلەرى مەن سۋرەتشىلەر كورمەسى، ۇلتتىق تاعامدار كورمەسى، ۇلتتىق سپورتتىق ويىندار سايىسى ۇيىمداستىرىلادى. ال كەشكى ساعات 19:30 دا «كەرۋەن ساراي» كەشەنىندە مەرەكەلىك گالا-كونسەرت وتەدى. بۇدان بولەك، 22-23-ناۋرىز كۇندەرى تۇركىستان مۋزىكالىق دراما تەاترىندا «بورتە» سپەكتاكلى ساحنالانادى.

سوڭعى جاڭالىقتار