ناۋرىز ايىندا وتەتىن ۇ ب ت باستالدى

استانا. KAZINFORM - بۇگىن ناۋرىز ايىندا وتەتىن ۇ ب ت باستالدى، ول 6-ساۋىرگە دەيىن جالعاسادى.

عىلىم جانە جوعارى ءبىلىم مينيسترلىگى ۇلتتىق تەستىلەۋ ورتالىعىنىڭ مالىمەتىنشە,163 مىڭعا جۋىق ادام ۇ ب ت-عا قاتىسۋعا ءوتىنىش بەرگەن. ولاردىڭ %76 ى قازاق تىلىندە، %23,9 ى ورىس تىلىندە، 162 ادام اعىلشىن تىلىندە تەستىلەۋدەن وتۋگە ءوتىنىش ءبىلدىردى.

تالاپكەرلەر ءوتىنىش بەرۋ بارىسىندا ولار تەستىلەۋ كۇنىن، ۋاقىتىن جانە پۋنكتىن وزدەرى تاڭدادى. تەستىلەۋدىڭ ءبىرىنشى كۇنى ەلىمىز بويىنشا 775 ادام ۇبت تاپسىرادى.

ەڭ كوپ تاڭدالعان بەيىندىك پاندەر كومبيناتسياسى - «بيولوگيا- حيميا»، ياعني تالاپكەرلەردىڭ %17,5 ى مەديتسينا، پەداگوگيكا جانە اۋىل شارۋاشىلىعى ماماندىقتارىنا ءتۇسۋدى جوسپارلاعان. ال %17,1 ى «ماتەماتيكا- فيزيكا»، %10,5 ى «ماتەماتيكا- ينفورماتيكا» پاندەرىن تاڭدادى، سايكەسىنشە بولاشاق ينجەنەرلەر مەن IT- ماماندارى.

ۇ ب ت- داعى پاندەردىڭ سانى وزگەرىسسىز قالادى، ياعني ۇشەۋى مىندەتتى جانە ەكەۋى تاڭداۋ بويىنشا. ۇبت تاپسىرمالار سانى - 120. ونىڭ ىشىندە «قازاقستان تاريحىنان» 20 تاپسىرما، «وقۋ ساۋاتتىلىعىنان» 10 تاپسىرما، «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرمادان. جوعارى بال - 140.

تەستىلەۋ ۋاقىتى - 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.

ەستەرىڭىزگە سالا كەتسەك، ناۋرىزداعى ۇ ب ت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان.

وتكەن جىلعى مەكتەپ جانە كوللەدج تۇلەكتەرى، ق ر ازاماتى بولىپ تابىلمايتىن ۇلتى قازاق تۇلعالار، سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.