ناريمان قۇربانوۆتىڭ پرەزيدەنتپەن كەزدەسۋگە نەگە كەلمەگەنى بەلگىلى بولدى
استانا. قازاقپارات - بۇگىن مەملەكەت باسشىسى قاسىم-جومارت توقايەۆ پاريج وليمپياداسىنىڭ جۇلدەگەرلەرىن قابىلدادى.
ءبىراق كەزدەسۋدە كۇمىس جۇلدەگەر ناريمان قۇربانوۆ بوي كورسەتپەدى. كوپشىلىك مۇنداي ماڭىزدى كەزدەسۋگە سپورتشىنىڭ نەگە كەلمەي قالعانىن سۇراپ، الاڭداۋشىلىق ءبىلدىردى. وسىعان وراي پرەزيدەنتتىڭ باسپا ءسوز حاتشىسى بەرىك ءۋالي سپورتشىنىڭ كەلمەي قالۋ سەبەبىن ايتتى، دەپ جازادى Tengri Sport.
«بۇگىن اقوردادا پرەزيدەنت قاسىم-جومارت توقايەۆ پاريجدەگى وليمپيادا ويىندارىندا جۇلدە العان سپورتشىلارعا مەملەكەتتىك ناگرادالاردى تاپسىردى. وكىنىشكە وراي وليمپيادانىڭ كۇمىس جۇلدەگەرى ناريمان قۇربانوۆ اۋىرىپ قالۋى سەبەپتى سالتاناتتى شاراعا كەلە المادى. وعان تەزىرەك جازىلىپ كەتۋىن، بيىك بەلەستەردى باعىندىرۋىن تىلەيمىز» - دەدى بەرىك ءۋالي.
پرەزيدەنت پەن وليمپيادا جۇلدەگەرلەرىنىڭ كەزدەسۋى ەرتەرەك ءوتۋى كەرەك بولاتىن. ءبىراق كەيبىر سپورتشىلاردان كوۆيد انىقتالعاندىقتان، كەزدەسۋ كەيىنگە قالدىرىلعان ەدى.
