نارەستە كىندىگىنەن قان الىپ، وسكەنىندە ەمگە پايدالانۋ جوباسى زەرتتەلىپ جاتىر
اقتوبە. KAZINFORM - ءبىلىم، عىلىم جانە تاجىريبەنى قاتار الىپ ءجۇرۋ ءۇشىن اقتوبەدەگى مەديتسينا ۋنيۆەرسيتەتى بىرنەشە زەرتتەۋ جۇمىسىن قولعا العان.
كوروناۆيرۋس ينفەكتسياسىنان كەيىنگى اسقىنۋلار، ونكولوگيالىق اۋرۋدى ەرتە انىقتاۋ، حرومنىڭ اعزاعا اسەرى سەكىلدى ءبىرقاتار باعىتتا عىلىمي جوبالار بار. سونىمەن بىرگە الەم كوز تىگىپ وتىرعان جاسۋشا تەحنولوگياسى، ياعني ءسابيدىڭ كىندىگىنەن قان الىپ، كەيىن وسكەندە دەرتىنەن ايىقتىرۋ ءۇشىن قولدانۋ جوباسى دا زەرتتەلە باستادى. بۇل تۋرالى مارات وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ رەكتورى اسەت قاليەۆ Kazinform تىلشىسىنە ايتىپ بەردى.
«بىرىنشىدەن، ۋنيۆەرسيتەتتىڭ ءوزى عىلىمي جوبالاردى قولدايدى. ەكىنشىدەن، عىلىم جانە جوعارى ءبىلىم مينيسترلىگى گرانت بەرەدى. بىلتىر ءتورت گرانت ۇتىپ الدىق. بۇل جەردە نەگىزىنەن ەكولوگيالىق ماسەلەلەر، ونىڭ ىشىندە حرومنىڭ اعزاعا زيانى زەرتتەلىپ جاتىر. سونىمەن بىرگە كوروناۆيرۋس ينفەكسياسىنان كەيىنگى اسقىنۋلار، ونكولوگيالىق اۋرۋلاردى ەرتە انىقتاۋ باعىتتارى قامتىلدى. قازىر عىلىممەن اينالىسامىن دەگەن جاستار ءۇشىن 22 ستۋدەنتتىك ۇيىرمە جۇمىس ىستەپ تۇر. ستۋدەنتتەردىڭ ءبىر ءىلىمدى تەرەڭ مەڭگەرۋى ءۇشىن كىتاپحانا جاساقتالعان. وندا 600 مىڭنىڭ استام كىتاپ قورى بار. ءوزىم دە عىلىممەن اينالىسامىن»، - دەيدى اسەت قاليەۆ.
اتاپ ايتقاندا، قازىر جاسۋشا تەحنولوگياسى، ياعني الەم قىزىعىپ وتىرعان سالاداعى جوبالار قولعا الىنعان.
«جاڭا تۋعان ءسابيدىڭ كىندىگىنەن قان الىپ، قاتىرىپ، وسكەندە بەلگىلى ءبىر اۋرۋ پايدا بولسا، سول جاسۋشانى ەگۋ ارقىلى باۋىردى ءوسىرىپ، ۇيقى بەزىن قالپىنا كەلتىرۋگە بولادى. زەرتتەۋدى يراننان كەلگەن امين تامودونمەن بىرگە باستاپ، جىل سوڭىنا دەيىن بەلگىلى ءبىر ناتيجەگە جەتكىمىز كەلەدى»، - دەيدى.
اسەت قاليەۆ مەديتسينانىڭ تاجىريبەگە نەگىزدەلگەن سالا ەكەنى ەسكەرىلۋى قاجەتتىگىن ايتادى، ياعني تەوريا مەن پراكتيكا قاتار ءجۇرۋى كەرەك. وسى رەتتە ءوزى دە اۋرۋحانا حيرۋرگياسىنان قول ۇزبەي، وتا جاساپ ءجۇر.
«ستۋدەنتتەر ءبىرىنشى كۋرستان باستاپ- اق العاشقى مەديتسينالىق كومەك كورسەتۋ، ەمحاناعا كەلگەن ناۋقاستاردى قابىلداپ، ولاردى تىركەۋ، ينە شانشۋ، تامىرعا ينە سالۋ سەكىلدى جۇمىستاردى مەڭگەرەدى. سودان كەيىنگى كۋرستاردا جاۋاپكەرشىلىك تە ارتا تۇسەدى. ماسەلەن، بىزگە ءۇش كلينيكا، اتاپ ايتار بولساق، ستوماتولوگيا، ونكولوگيالىق ورتالىق پەن وتباسىلىق ەمحانا باسەكەگە قابىلەتتى، بىلىكتى مامان دايىنداۋدا سەپتىگىن تيگىزىپ وتىر. ءبىلىم، تاجىريبە، عىلىم ۇشتىگى بىرلەسىپ، سۇرانىسقا يە كادر دايىنداۋعا مۇمكىندىك بەرەدى. سونىمەن بىرگە ب ق و، اتىراۋ، ماڭعىستاۋداعى ۇلكەن كلينيكالاردىڭ ءبارى ءبىزدىڭ وقۋ- تاجىريبە بازامىز بولىپ ەسەپتەلەدى. ينتەرندەر قاجەتتى پراكتيكادان سول جەردە وتەدى. وسىنداعى ونكولوگيالىق ورتالىقتى عىلىمي ينتەگراتسيالانعان اكادەميالىق ورتالىققا اينالدىرعىمىز كەلەدى. الداعى ۋاقىتتا اقىلدى وپەراتسيا ورتالىعىن اشساق دەگەن وي بار. سوندا ستۋدەنتتەر قاشىقتان وتىرىپ، وتانىڭ قالاي ءجۇرىپ جاتقانىن كورە الادى»، - دەيدى اسەت قاليەۆ.
