ناننيندە قازاقستان مەن قىتايدىڭ بىرلەسكەن عىلىم جانە تەحنولوگيا مەكتەبى اشىلدى

استانا. KAZINFORM – ق ح ر ءبىلىم مينيسترلىگى قازاقستان مەن قىتايدىڭ بىرلەسكەن عىلىم جانە تەحنولوگيا مەكتەبىن رەسمي تۇردە تىركەدى.

بۇل تۋرالى «قىتاي ءتىلى كوپىرى» بايقاۋىنىڭ اشىلۋىندا ە ۇ ۋ پرورەكتورى دۋمان ايتماعامبەتوۆ ايتتى.

- الدىڭعى كۇنى ءبىز جاقسى حابار الدىق. ل. ن. گۋميليەۆ اتىنداعى ە ۇ ۋ مەن ناننين ۋنيۆەرسيتەتىنىڭ بىرلەسكەن ينستيتۋتى - ناننين پەداگوگيكالىق ۋنيۆەرسيتەتى جانىنداعى ەۋرازيالىق عىلىم جانە تەحنولوگيا مەكتەبى ق ح ر ءبىلىم مينيسترلىگى تاراپىنان رەسمي تۇردە اككرەديتاتسيادان ءوتىپ، قىتايدا ستۋدەنتتەردى مەملەكەتتىك قابىلداۋ جوسپارىنا ەنگىزىلدى، - دەدى ە ۇ ۋ پرورەكتورى دۋمان ايتماعامبەتوۆ.

مالىمەتكە ساي، مەكتەپ قىتاي اۋماعىندا باكالاۆر دارەجەسى بويىنشا مامان دايارلايتىن بولادى، جالپى ستۋدەنت سانى 300 گە جەتەدى.

- بۇل - قازاقستان تاريحىندا العاش رەت قىتاي اۋماعىندا اشىلىپ وتىرعان، قازاقستاننىڭ باستاماسىمەن جۇزەگە اسقان فيليال. بۇگىندە قازاقستان قىتايدىڭ 30 دان استام جەتەكشى ۋنيۆەرسيتەتىمەن سەرىكتەستىك بايلانىس ورناتقان. سونداي-اق قوس ديپلومدى باعدارلامالاردى، اتاپ ايتقاندا اكادەميالىق جانە بىرلەسكەن ديپلوم بەرۋدى جۇزەگە اسىرىپ جاتىر، - دەپ اتاپ ءوتتى ول.

پرورەكتوردىڭ ايتۋىنشا، ماگيسترانتتاردى دايارلاۋ بويىنشا دا جاقسى جاڭالىق بار.

- ءبىز ق ح ر ءبىلىم مينيسترلىگىنەن ەكى باعدارلاما بويىنشا اككرەديتاتسيا الدىق: ەكونوميكا جانە حالىقارالىق بيزنەس، سونداي-اق شاڭحاي ۋنيۆەرسيتەتىمەن بىرلەسىپ جۇزەگە اسىرىلاتىن ستراتەگيالىق ساۋدا باقىلاۋى. بۇل باعدارلامالار قىتاي اۋماعىندا ماگيسترانتتار دايارلاۋعا باعىتتالعان، - دەدى پرورەكتور.

ايتا كەتەيىك، بۇگىن استانادا قىتاي تىلىنەن الەمدىك بايقاۋدىڭ رەسپۋبليكالىق كەزەڭى ءوتىپ جاتىر.