ناشاقورلاردىڭ 50 پايىزى قازاقستاننىڭ قاي قالالارىندا تۇرادى
استانا. KAZINFORM - ق م ا ەسىرتكى قۇرالدارى مەن پرەكۋرسورلاردىڭ تارالۋى تۇرعىسىنان Telegram مەسسەندجەرىنىڭ ارنالارى، الەۋمەتتىك جەلىلەر مەن حابارلاندىرۋ سەرۆيستەرى قامتىلعان جاھاندىق جەلىگە مونيتورينگ جۇرگىزىپ جاتىر. ناتيجەسىندە مەسسەندجەرلەردەگى 300 گە جۋىق ارنا، تىيىم سالىنعان زاتتار ساتىلاتىن 4 ءىرى Darknet ماركەتپلەيس كوزگە تۇسكەن. ول تۋرالى ق م ا-نىڭ باسپا ءسوز قىزمەتى ءمالىم ەتتى.
«ەل اۋماعىندا Telegram ارنالارى ارقىلى ەسىرتكى جانە پسيحوتروپتىق زاتتاردى تۇراقتى نەگىزدە جارنامالاۋمەن جانە ساتۋمەن اينالىسقان 80 پايدالانۋشىنىڭ جەكە باسى انىقتالدى. ينتەرنەت- كەڭىستىكتىڭ قازاقستاندىق سەگمەنتىنە جۇرگىزىلگەن مونيتورينگ ناتيجەسىندە 35 مىڭعا جۋىق قاتىسۋشىسى بار ەسىرتكى ساتاتىن 3 ءىرى الاڭ، ەسىرتكى زاتتارىنىنىڭ الەۋەتتى تۇتىنۋشىلارى بولىپ تابىلاتىن 10 مىڭعا جۋىق ادامنىڭ جەكە باسى انىقتالدى»، - دەلىنگەن حابارلامادا.
ق م ا حابارلاۋىنشا، ناشاقورلاردىڭ 50 پايىزى استامى استانا مەن الماتىدا سونداي-اق الماتى وبلىسىنا تيەسىلى.
اگەنتتىك وتكەن جىلى اينالىمى 25,6 ميلليارد تەڭگەنى قۇرايتىن 36 ەسىرتكى دۇكەنىن انىقتاعان.
بيىل Telegram مەسسەندجەرىندە 60 ەسىرتكى ارناسىنا تيەسىلى 59 كارت-شوت انىقتالدى.
«قارجىلىق بارلاۋ بولىمشەسىنىڭ الدىن الا تالداۋ قورىتىندىسى بويىنشا اتالعان دۇكەندەردەگى اقشا قاراجاتىنىڭ جالپى اينالىمى 3 ميلليارد تەڭگەنى قۇرادى. اينالىمى 82 ميلليون تەڭگەنى قۇرايتىن ەسىرتكى دۇكەندەرىنىڭ ءبىرى بويىنشا ماتەريالدار ءى ءى م-گە جولداندى»، - دەپ حابارلادى ق م ا باسپا ءسوز قىزمەتى.
ق م ا ەسىرتكىنى قولدانۋ ادام دەنساۋلىعىنا جاعىمسىز اسەر ەتەتىنىن ەسكە سالادى.
«ەسىرتكى ارقىلى جاسوسپىرىمدەردىڭ دەنساۋلىعىنا قاۋىپ ءتونۋى مۇمكىن. اتا-انالاردان بالاڭىزدىڭ مىنەز-قۇلقىنا، ونىڭ دەنساۋلىق جاعدايىنا، اينالاسىنا نازار اۋدارىپ، ينتەرنەت كەڭىستىكتەگى كورىپ جۇرگەن كونتەنتىن باقىلاپ، جاساعان ساۋدا-ساتتىعىن سونداي-اق كارتوچكالىق شوتتارىنا تۇسكەن قاراجاتتىڭ كوزدەرىن باقىلاۋدى سۇرايمىز»، - دەپ ەسكەرتتى ق م ا.
ەسىرتكى قۇرالدارىن ساتىپ الۋ جانە ساقتاۋ ءۇشىن قىلمىستىق جاۋاپكەرشىلىك قاراستىرىلعانىن ەسكە سالامىز.
اۆتور
باقىتگۇل اباي قىزى
