ناعىز باۋىر وسىنداي بولادى - ازەربايجان پرەزيدەنتى قازاقستانعا العىسىن ءبىلدىردى
استانا. قازاقپارات - ازەربايجان پرەزيدەنتى قازاقستانعا العىسىن ءبىلدىردى. 29-جەلتوقساندا يلحام اليەۆ ازەربايجان تەلەارناسىنا حالىقارالىق اۋەجايدا سۇحبات بەرىپ، اقتاۋ ماڭىنداعى ۇشاق اپاتىنا قاتىستى پىكىر ءبىلدىردى.
«ءبىرىنشى كەزەكتە پرەزيدەنت توقايەۆقا العىسىمدى ءبىلدىرۋ ءۇشىن قوڭىراۋ شالدىم. ءبىز اپاتتان كەيىن قازاقستاندىق قۇتقارۋشىلار وقيعا ورنىنا جەدەل جەتىپ، قيراعان ۇشاقتان ادامداردى شىعارا باستاعانىن بىلدىك، اقپارات الدىق»، - دەدى ول.
يلحام اليەۆ قۇتقارۋشىلار ءوز ومىرلەرىنە قاۋىپ توندىرگەنىن ايتتى.
«ولار تاعى ءبىر جارىلىس بولىپ-بولمايتىنىن بىلمەدى. ۇشاقتىڭ ءبىر بولىگى ورتەنىپ كەتتى، ال ءورت باسقا بولىككە تارالۋى مۇمكىن ەدى. ءبىراق سوعان قاراماستان ولار ناعىز ەرلىك كورسەتتى. سونداي-اق مەديتسينالىق قىزمەتكەرلەردىڭ ارەكەتتەرىن دە اتاپ وتكىم كەلەدى. جارالانعان جولاۋشىلار دەرەۋ مەديتسينالىق مەكەمەلەرگە جەتكىزىلدى. سوندىقتان پرەزيدەنت توقايەۆقا العىسىمدى ءبىلدىردىم»، - دەدى پرەزيدەنت اليەۆ.
«ءبىزدىڭ قازاقستاندىق باۋىرلارىمىزدىڭ ىنتىماقتاستىعى ازەربايجان حالقىنىڭ جۇرەگىندە ۇلكەن ءىز قالدىردى»، - دەدى پرەزيدەنت يلحام اليەۆ.
ول قازاقستاننىڭ قاراپايىم ازاماتتارى ازەربايجاننىڭ اقتاۋداعى كونسۋلدىعىنا كەلىپ، گۇل شوقتارىن قويىپ، كوڭىلگە دەمەۋ بولعانىن ايتتى.
«مىنە، شىنايى دوستىق پەن باۋىرلاستىق. سونىمەن قاتار پرەزيدەنت توقايەۆپەن اڭگىمەلەسۋ بارىسىندا ازەربايجاننىڭ تەرگەۋ بويىنشا ۇستانىمىن بايانداپ، ءبىز حالىقارالىق ساراپتامانى قولدايتىنىمىزدى، ءبىراق بۇل ءىستى مەملەكەتارالىق اۆياتسيا كوميتەتىنىڭ قاراۋىنا بەرە المايتىنىمىزدى ايتتىم. ول بۇل ۇستانىمدى تۇسىنىستىكپەن قابىلدادى. ارينە، ءبىزدىڭ مەملەكەتتىك قۇرىلىمداردىڭ وكىلدەرى، كوميسسيا مۇشەلەرى، باسشىلار، سونداي-اق پروكۋراتۋرا وكىلدەرى ۇنەمى بايلانىستا. قازاقستان ءوز كەزەگىندە مەملەكەتتىك كوميسسيا قۇردى، بۇل تۋرالى پرەزيدەنت توقايەۆ اڭگىمەلەسۋ بارىسىندا ايتتى»، - دەدى ازەربايجان پرەزيدەنتى.
اقتاۋداعى ۇشاق اپاتى تۋرالى نە بەلگىلى؟
ەسكە سالايىق، 25-جەلتوقساندا اقتاۋ ماڭىندا باكۋدەن گروزنىيعا ۇشىپ بارا جاتقان ۇشاق اپاتقا ۇشىرادى. بۇل - Azerbaijan Airlines اۋەكومپانياسىنا تيەسىلى ەمبراەر 190 ۇشاعى. الدىن الا اقپارات بويىنشا ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.
