مۋزىكانى جاساندى ينتەللەكتەن قورعاڭىزدار: امەريكا جۇلدىزدارى اشىق حاتقا قول قويدى
استانا. KAZINFORM - امەريكالىق 200 دەن استام ونەرپاز جاساندى ينتەللەكتى (AI) «ادام شىعارماشىلىعىنا شابۋىل جاساپ جاتىر» دەپ ايىپتاپ، اشىق حاتقا قول قويعان. بۇل تۋرالى New York Post حابارلادى.
ونەرپازدار جاساندى ينتەللەكت جاقىن ارادا ارتىستەردىڭ ءتۇپنۇسقا داۋىسىنىڭ سيفرلىق كوشىرمەسىن جاساۋى مۇمكىن دەپ الاڭداۋشىلىق ءبىلدىردى.
سوندىقتان ۇندەۋ اۆتورلارى ەلەكتروندى مۋزىكا اۆتورلارىنان نەيرون جەلىلەرىن ازىراق پايدالانۋدى سۇرايدى.
«جاڭا داۋىردە شىعارماشىلىق ادامدارى جاساندى ينتەللەكتىمەن باسەكەگە تۇسۋگە ءماجبۇر. نەيرون جەلىلەرىن ورىنسىز پايدالانۋ ناعىز مۋزىكانتتار مەن جانكۇيەرلەردىڭ قادىرىن اياق-استى ەتەدى»، - دەدى ونەرپازداردىڭ قۇقىعىن قورعاۋ اليانسىنىڭ اتقارۋشى ديرەكتورى دجەن دجەيكوبسەن.
بۇل حاتقا بيللي ايليش، Imagine Dragons ،Nicki Minaj ،Pearl Jam ،Katy Perry ،Jonas Brothers، دجۋليا مايكلس، رايان تەددەر جانە باسقا دا اكتەرلەر، انشىلەر مەن مۋزىكانتتار قول قويعان.
«ءبىز، انشىلەر مەن ءان اۆتورلارى، سونداي-اق تومەندە قول قويعاندار AI تەحنولوگياسى كومپانيالارىن، پلاتفورمالارىن جانە سيفرلىق مۋزىكا قىزمەتتەرىن باستاپقى جاساۋشىلاردىڭ قۇقىعىن بۇزۋ جانە قۇنسىزداندىرۋ ءۇشىن نەيرون جەلىلەرىن پايدالانۋدى توقتاتۋعا شاقىرامىز» دەلىنگەن حاتتا.
بەلگىلى بولعانداي، كەي كومپانيالار پروديۋسەرلىك كومپانيالاردىڭ رۇقساتىنسىز ونەرپازداردىڭ شىعارماشىلىق جۇمىسىن يەمدەنىپ، جاساندى ينتەللەكت ارقىلى وڭدەپ، كوپشىلىككە ۇسىنعان.
بۇل - تىكەلەي اۋەننىڭ ءتۇپنۇسقاسىنداعى دىبىسى مەن بەينەسىن اۋىستىرۋعا باعىتتالعان ءىس-ارەكەت، ول شوۋ-بيزنەس وكىلدەرىنىڭ تابىس كوزىنە دە كەرى اسەرىن تيگىزۋدە.
