مۇز استىنا قۇلاپ كەتسەڭىز نە ىستەۋ كەرەك - قۇتقارۋشىلار كەڭەسى

وسكەمەن. KAZINFORM - شىعىس قازاقستان وبلىسىنىڭ قۇتقارۋشىلارى مۇز استىنا قۇلاپ كەتكەن جاعدايدا نە ىستەۋ كەرەكتىگىن ءتۇسىندىردى.

مۇزداعى قاۋىپسىزدىكتى قامتاماسىز ەتۋ ماقساتىندا ش ق و ت ج د قۇتقارۋشىلارى ەرىكتىلەر جانە پوليتسيا قىزمەتكەرلەرىمەن بىرلەسىپ 260 تان استام رەيد جۇرگىزدى. تۇراقتى تۇردە بريفينگتەر وتكىزىپ، 2 جارىم مىڭنان استام ۇگىت-ناسيحات پاراقشاسىن تاراتتى.

بۇگىندە وڭىردەگى سۋ قويمالارىندا 64 ەسكەرتۋ جانە تىيىم سالۋ بەلگىسى ورناتىلعان. قىس باستالعالى ا ق ب ت ك-نىڭ 412-بابىن بۇزعان 2 بالىقشى اكىمشىلىك جاۋاپكەرشىلىككە تارتىلدى.

«بالىقشى سۋ قويمالارىنداعى قاۋىپسىزدىك ەرەجەلەرىنە سايكەس قالىڭدىعى 25 سانتيمەتردەن اسپايتىن مۇزعا شىققاندا وزىمەن بىرگە ىسقىرىق، قۇتقارۋ كەۋدەشەسى مەن ارقان الىپ ءجۇرۋى كەرەك. ۇيالى تەلەفونىن سۋ وتكىزبەيتىن قاپقا سالۋى قاجەت»، - دەپ حابارلادى دەپارتامەنتتىڭ باسپا ءسوز قىزمەتىنەن.

ال ەگەر مۇز استىنا قۇلاپ كەتسەڭىز:

- ۇرەيلەنبەڭىز. وقىس قيمىل جاساماڭىز، دەمىڭىزدى تۇراقتاندىرىڭىز.

- قولدارىڭىزدى ەكى جاققا كەڭىرەك سوزىپ، دەنەڭىزگە اعىس باعىتىندا كولدەنەڭ پوزيتسيا بەرىپ، مۇزدىڭ شەتىنە ىلىنۋگە تىرىسىڭىز.

- كەۋدەڭىزدى مۇزدىڭ شەتىنە اقىرىن قويىپ كورىڭىز جانە ءبىر اياعىڭىزدى، سودان كەيىن ەكىنشى اياعىڭىزدى مۇزعا لاقتىرىڭىز.

- ەگەر مۇز سىنباسا، باياۋ جورعالاڭىز نەمەسە جاعاعا قاراي دومالاڭىز.

- قاي جاقتان كەلدىڭىز سول جاققا قاراي جىلجىڭىز، ويتكەنى ونداعى مۇزدىڭ بەرىكتىگى تەكسەرىلگەن.

اۆتور
تالعاتجان مۇحامەتبەك ۇلى