مىسىردا تۋريستەر مىنگەن ياحتا سۋعا باتىپ كەتتى
استانا. KAZINFORM - دۇيسەنبى كۇنى تۋريستەر مىنگەن Sea Story ياحتاسى قىزىل تەڭىزدەگى مىسىردىڭ مارسا الاما قالاسىنىڭ جاعالاۋىنداعى تۋر كەزىندە سۋعا باتىپ كەتتى. كەمە جولاۋشىلارى مەن ەكيپاجى ءىز-ءتۇزسىز جوعالىپ، قۇزىرلى ورگاندار ولاردى ىزدەۋگە كىرىستى.
مىسىردىڭ قىزىل تەڭىز پروۆينتسياسى گۋبەرناتورىنىڭ ايتۋىنشا، Sea Story جەرگىلىكتى ۋاقىت بويىنشا 05:30 دا مارسا الامانىڭ سولتۇستىگىندەگى راس-ساتاە مارجان ريفىنىڭ ماڭىندا سۋعا باتقان. ول جەكسەنبىدە پورتو-گاليبادان شىعىپ، 29-قاراشادا حۋرگادا-ماريناعا ورالۋى كەرەك ەدى.
ۇزىندىعى 44 مەترلىك ياحتانىڭ بورتىندا 31 تۋريست پەن 14 ەكيپاج مۇشەسى تانىمال ورىنداردىڭ بىرىنە كوپكۇندىك تۋر جاساۋ ءۇشىن اشىق تەڭىزگە شىققان.
- كەمەنىڭ اپاتقا ۇشىراعانى تۋرالى حابارلاما دۇيسەنبى كۇنى تاڭەرتەڭ ءتۇستى. ىزدەستىرۋ-قۇتقارۋ جۇمىستارى ەگيپەت اسكەري-تەڭىز كۇشتەرى مەن اسكەري-اۋە كۇشتەرىنىڭ قاتىسۋىمەن جۇرگىزىلىپ جاتىر، - دەپ حابارلادى جەرگىلىكتى بيلىك.
كەيىن مىسىر بيلىگى سۋعا باتقان تۋريستەر ياحتاسىنان 28 ادامنىڭ قۇتقارىلعانىن، تاعى 17 ادامدى ىزدەۋ جۇمىستارى جالعاسىپ جاتقانىن حابارلادى.
پروۆينتسيا گۋبەرناتورى امر حانافي مارسا-الامانىڭ وڭتۇستىگىندەگى ۆادي ەل-گەمال ايماعىندا تابىلعان امان قالعانداردىڭ كەيبىرى ەمدەلۋگە تىكۇشاقپەن جەتكىزىلگەنىن، ال باسقالارىنىڭ مىسىر اسكەري كەمەسى الىپ كەتۋدى كۇتىپ تۇرعانىن ايتتى. ول سونداي-اق اۋە جانە تەڭىز كۇشتەرى ءىز-ءتۇزسىز جوعالعانداردى ىزدەۋدى جالعاستىرىپ جاتقانىن تىلگە تيەك ەتتى.
بۇل وقيعا مىسىردىڭ جەرورتا تەڭىزى جاعالاۋىندا ەكى قايىق سوقتىعىسىپ، كەم دەگەندە ەكى ادام قازا تاۋىپ، بىرنەشە ادام جارالانعاننان ءبىر اي وتكەن سوڭ بولىپ وتىر.
ايتا كەتەيىك، ەگيپەتتەگى قىزىل تەڭىز كۋرورتتارى مەن جاعاجايلارى تۋريستەر اراسىندا تانىمال، ءبىراق كولىك قاۋىپسىزدىگى تۇرعىسىنان اسا بەدەلدى ەمەس.
