مىسىردا I عاسىرعا جاتاتىن ريم ارىپتەرى تابىلدى
استانا. KAZINFORM - ەجەلگى ريم اسكەري باسشىلارى جازعان حاتتار جانۋارلار زيراتىنان تابىلدى. بۇل وقيعا تاريحتىڭ جاڭا پاراعىن اشپاق.
Smart-news جازعانداي، ەگيپەتتەگى ەجەلگى ءۇي جانۋارلارى زيراتى ريم تاريحىن زەرتتەۋگە ارنالعان «التىن كەنىشكە» اينالعانى قاشان. عالىمدار توبى جانۋارلار زيراتىن 2011 -جىلى تاپقان بولاتىن. جۋىردا ارحەولوگتار مىسىق، يت جانە مايمىل بەيىتتەرىنىڭ جانىنان 1900 جىل بۇرىن ريم ءجۇزباسىلارىنىڭ (اسكەري جەتەكشىلەردىڭ) قولىمەن جازىلعان حاتتاردى تاپتى.
ريم ەگيپەتتى كوپتەگەن عاسىر بويى (شامامەن 30 دان 600 گە دەيىن) باسقارعانى بەلگىلى. سايكەسىنشە، بۇل ايماقتا ريم ەسكەرتكىشتەرى ءجيى كەزدەسەدى. جىل سايىن ارحەولوگتار قازبا جۇمىستارىن تياناقتى جۇرگىزىپ كەلەدى. بۇعان دەيىن جانۋارلار جەرلەنگەن جەردەن قىش ىدىستار، ريم مونەتالارى تابىلعان بولاتىن.
زەرتتەۋشىلەر ريم لەگيوندارىنىڭ بولىمشەلەرىن باسقارعان اسكەري وفيتسەرلەردىڭ پاپيرۋسقا جازعان حاتتارىنىڭ تابىلۋى كەزدەيسوق ەكەنىن العا تارتىپ وتىر. ولاردىڭ پايىمداۋىنشا، ەجەلگى ريمدىكتەر پاپيرۋستاردى زيراتقا ىرگەلەس عيماراتتا ساقتاۋى مۇمكىن. كەيىن نىسان قيراپ، حاتتار شاشىراپ، زيراتقا تۇسكەن بولۋى مۇمكىن.
تابىلعان حاتتاردا ريم ءجۇزباسىلارىنىڭ بىرنەشە ەسىمى اتالادى: حاوسۋس، لۋتسيني جانە پەترونيي. حاتتاردىڭ بىرىندە پەترونيي تۇيەمەن جۇرەتىن ريمدىك ساربازدار بولىمشەسى ارقىلى اقشا جىبەرىپ جاتقانىن جازادى. سونداي- اق، لۋتسينيدەن ساربازدارعا بۇزاۋ ەتى مەن شاتىر تاياقتارىن بەرۋدى سۇرايدى.
