مىسىردا 13-قازان كۇنى گازا بويىنشا بەيبىت كەلىسىمگە حاماس-سىز قول قويىلادى

استانا. KAZINFORM - گازا سەكتورىنداعى سوعىستى توقتاتۋ تۋرالى كەلىسىمگە 13-قازاندا شارم-ەش-شەيح قالاسىندا قول قويىلادى دەپ جوسپارلانىپ وتىر. حاماس ۇيىمى ءوز وكىلدەرىنىڭ راسىمگە قاتىسپايتىنىن مالىمدەدى. ولار ورنىنا دەلدالدار قاتىساتىنىن حابارلادى، دەپ جازادى DW.

حاماس دەپ تانىلعان تەرروريستىك ۇيىم سوعىستى توقتاتۋ تۋرالى كەلىسىمگە قول قويۋ راسىمىنە قاتىسپايدى. بۇل تۋرالى ولاردىڭ وكىلدەرى 11-قازان كۇنى كەشكە dpa اگەنتتىگىنە ءمالىم ەتتى.

- حاماس كەلىسىمگە قول قويۋ پروتسەسىنە قاتىسپايدى. راسىمگە تەك دەلدالدار، سونداي-اق ا ق ش پەن ءيزرايلدىڭ رەسمي وكىلدەرى قاتىسادى، - دەلىنگەن حابارلامادا.

ا ق ش پەن مىسىردان بولەك، قاتار دا كەلىسسوزدەرگە دەلدال رەتىندە قاتىسقان. يزرايل مەن حاماس اراسىندا تىكەلەي كەلىسسوزدەر جۇرگىزىلمەگەن.

شارم-ەش-شەيحتەگى گازا بويىنشا بەيبىت سامميت

11-قازان كۇنى مىسىر سىرتقى ىستەر مينيسترلىگى 13-قازاندا قىزىل تەڭىز جاعالاۋىنداعى شارم-ەش-شەيح كۋرورتتى قالاسىندا حالىقارالىق «بەيبىت سامميت» وتكىزىلەتىنىن جاريالادى. سامميت بارىسىندا گازا سەكتورىنداعى سوعىستى توقتاتۋ تۋرالى كەلىسىمگە قول قويۋ جوسپارلانعان. وتكەن اپتادا ءدال وسى قالادا يزرايل مەن حاماس اراسىندا العاشقى ۋاعدالاستىققا قول قويىلعان ەدى.

مىسىر س ءى م مالىمەتىنشە، كەزدەسۋگە ا ق ش پرەزيدەنتى دونالد ترامپ پەن مىسىر پرەزيدەنتى ابدەل فاتتاح اس-سيسي تەڭتوراعالىق ەتەدى. سامميتكە شامامەن 20 الەمدىك كوشباسشى قاتىسادى. ولاردىڭ قاتارىندا ۇلى بريتانيا پرەمەر-ءمينيسترى كير ستارمەر دە بولادى، دەپ حابارلايدى AFP اگەنتتىگى. سونداي- اق dpa اگەنتتىگى گەرمانيا كانتسلەرى فريدريح مەرتسكە دە شاقىرتۋ جىبەرىلگەنىن مالىمدەدى.

ۋيتكوفف تەل-اۆيۆتە ترامپقا العىس ايتۋعا شاقىردى

11-قازان كەشكە ا ق ش پرەزيدەنتىنىڭ ارنايى وكىلى ستيۆ ۋيتكوفف تەل-اۆيۆتەگى «تۇتقىندار الاڭىندا» وتكەن ميتينگىدە ءسوز سويلەپ، گازا سەكتورىندا بىتىمگە قول جەتكىزۋ جولىنداعى دونالد ترامپتىڭ كۇش-جىگەرىن جوعارى باعالادى.

- ءبىز ءبارىمىز پرەزيدەنت ترامپقا شەكسىز ريزامىز، - دەدى ۋيتكوفف.

Dpa اگەنتتىگىنىڭ حابارلاۋىنشا، الاڭدا شامامەن 400000 ادام جينالعان. ۋيتكوففپەن بىرگە ترامپتىڭ قىزى يۆانكا جانە كۇيەۋ بالاسى دجارەد كۋشنەر دە بولدى. ولار دا ترامپتىڭ ەڭبەگىن اتاپ ءوتتى.

الايدا، ۋيتكوفف ءسوز اراسىندا يزرايل پرەمەر-ءمينيسترى بينيامين نەتانياحۋدىڭ ءرولىن ەرەكشە اتاپ وتكەندە، قوشەمەت اياسىندا جاپپاي نارازىلىق دىبىستارى ەستىلە باستادى، دەپ جازادى dpa.

يزرايل مەن حاماس اراسىنداعى كەلىسىم

10 قازان كۇنى ساعات 12:00-دە يزرايل مەن حاماس اراسىندا وق اتۋدى توقتاتۋ رەجيمى كۇشىنە ەندى.

ترامپ ازىرلەگەن جانە ەكى تاراپ قولداعان گازا بويىنشا العاشقى جوسپار مىناداي نەگىزگى شارتتاردى قامتيدى:

قالعان 48 يزرايلدىك تۇتقىن بوساتىلۋى ءتيىس؛

جاۋاپ رەتىندە يزرايل ءومىر بويىنا سوتتالعان 250 پالەستينالىقتى جانە 2023 -جىلعى 7-قازاننان بەرى ۇستالعان شامامەن 1700 ادامدى بوساتادى؛

يزرايل ارمياسى گازادا الدىن الا كەلىسىلگەن شەكارالىق سىزىققا شەگىنەدى؛

گازا سەكتورىنا گۋمانيتارلىق كومەك جەتكىزىلەدى.

ترامپتىڭ ايتۋىنشا، تۇتقىنداردى بوساتۋ ءراسىمى 13-قازاندا وتەدى جانە ول وعان قاتىسۋى مۇمكىن.

2023 -جىلعى 7-قازانداعى حاماس شابۋىلى

2023 -جىلعى 7-قازاندا ە و مەن ا ق ش-تا تەرروريستىك ۇيىم دەپ تانىلعان حاماس يزرايلگە شابۋىل جاسادى. ولار راكەتالىق سوققى بەرىپ، ەل اۋماعىنا باسىپ كىرىپ، يزرايل تاريحىنداعى ەڭ اۋقىمدى بەيبىت تۇرعىندارعا قارسى قاندى شابۋىل ۇيىمداستىردى. شامامەن 1200 ادام قازا تاۋىپ، 250 گە جۋىق ادام تۇتقىنعا الىنىپ، گازاعا اكەتىلدى.

كەيىن ولاردىڭ ءبىر بولىگى بوساتىلدى نەمەسە ايىرباستالدى، ال قالعاندارى قازا تاپتى.

جاۋاپ رەتىندە يزرايل حاماس-قا سوعىس جاريالاپ، گازا سەكتورىنا اۋە جانە قۇرلىق شابۋىلدارىن باستادى. حاماس-تىڭ باقىلاۋىنداعى پالەستينا دەنساۋلىق ساقتاۋ مينيسترلىگىنىڭ مالىمەتىنشە، 67 مىڭنان استام پالەستينالىق قازا تاۋىپ، 169 مىڭنان استامى جارالانعان. الايدا بۇل ستاتيستيكادا ناقتى ساناق قالاي جۇرگىزىلگەنى جايلى ناقتى دەرەك جوق. مىسالى، قازا تاپقانداردىڭ ىشىندە قانشا يسلاميست سودىر بولعانى بەلگىسىز، سونداي-اق اۋرۋحانالاردا تابيعي سەبەپتەرمەن كوز جۇمعان پالەستينالىقتار بۇل ستاتيستيكاعا ەنگەن-ەنبەگەنى دە انىق ەمەس.

قىركۇيەك ايىنىڭ سوڭىندا ا ق ش پرەزيدەنتى دونالد ترامپ ۆاشينگتونعا يزرايل پرەمەر-ءمينيسترى بينيامين نەتانياحۋدى شاقىرىپ، گازا بويىنشا بەيبىت جوسپارىن ۇسىنعان. نەتانياحۋ جوسپاردى قولدادى. قازان ايىنىڭ باسىندا حاماس وكىلدەرى دە جوسپاردىڭ كەيبىر تارماعىن قولدايتىنىن ءبىلدىردى.

6-قازاندا مىسىردا يزرايل مەن حاماس اراسىندا دەلدالدار ارقىلى العاشقى كەلىسسوزدەر وتكەن.