مىسىر ترامپتىڭ گازا تۇرعىندارىن كوشىرمەۋ تۋرالى شەشىمىن جاقتادى

استانا. KAZINFORM - بۇعان دەيىن ا ق ش پرەزيدەنتى پالەستينا انكلاۆى تۇرعىندارىن ونىڭ شەكاراسىنان تىس جەرلەرگە كوشىرۋ مۇمكىندىگىن قاراستىرعان بولاتىن.

بەيسەنبى كۇنى كاير ا ق ش پرەزيدەنتى دونالد ترامپتىڭ گازالىقتاردىڭ انكلاۆتان كەتۋىن تالاپ ەتپەيتىنى تۋرالى ءسوزىن جوعارى باعالايتىنىن مالىمدەدى. بۇل تۋرالى مىسىر سىرتقى ىستەر مينيسترلىگىنىڭ مالىمدەمەسىندە ايتىلعان.

ترامپ سارسەنبى كۇنى يرلانديانىڭ پرەمەر-ءمينيسترى مايكل مارتينمەن اق ۇيدە كەزدەسۋدە سۇراققا جاۋاپ بەرىپ: «ەشكىم پالەستينالىقتاردى گازادان قۋىپ جاتقان جوق»، - دەدى.

حاماس وكىلى حازەم كاسەم دە ترامپتىڭ ءسوزىن قۇپتاپ، ونى «وڭشىل سيونيستەردىڭ» كوزقاراسىنا قوسىلۋدان باس تارتۋعا شاقىردى.

- ەگەر ترامپ مالىمدەمەسى گازا سەكتورىنىڭ تۇرعىندارىن كوشىرۋ تۋرالى كەز كەلگەن يدەيادان باس تارتۋدى بىلدىرسە، وندا ونى قۇپتاۋعا بولادى، - دەدى كاسەم.

اقپان ايىندا ترامپ ا ق ش- قا گازا سەكتورىن باقىلاۋعا الۋدى، پالەستينالىقتاردى ءبىرجولا قۋىپ شىعۋدى جانە انكلاۆتى «تاياۋ شىعىستاعى ريۆەراعا» اينالدىرۋدى ۇسىندى. قونىس اۋدارۋ ورىندارى رەتىندە يوردانيا مەن ەگيپەت ۇسىنىلدى. بۇقارالىق اقپارات قۇرالدارىنىڭ حابارلاۋىنشا، بۇگىنگە دەيىن ترامپ سەكتور تۇرعىندارىن قونىستاندىرۋ مۇمكىندىگىن جوققا شىعارماعان.

سونىمەن قاتار سارسەنبى كۇنى كاتار استاناسىندا كەلىسسوزدەر ءوتىپ، وندا اراب ەلدەرىنىڭ سىرتقى ىستەر مينيسترلەرى ا ق ش- تىڭ تاياۋ شىعىستاعى ارنايى وكىلى ستيۆەن ۋيتكوففپەن ەگيپەتتىڭ گازا سەكتورىن سوعىستان كەيىنگى باسقارۋ جوسپارىنا قاتىستى كونسۋلتاتسيالاردى جالعاستىرۋعا كەلىستى.

ساۋد ارابياسى، بىرىككەن اراب امىرلىكتەرى، قاتار، مىسىر جانە يوردانيانىڭ سىرتقى ىستەر مينيسترلەرىمەن كەلىسسوزگە پالەستينا پرەزيدەنتىنىڭ باس كومەكشىسى حۋسەين ءال-شەيح تە قوسىلدى.

دوحاداعى كەلىسسوزدەردەن كەيىن ۋيتكوفف رەسەيگە بەت الدى. ماسكەۋ دجيدداداعى ۋكراين-امەريكا كەزدەسۋلەرىنەن كەيىن ۋكراينا بويىنشا كەلىسسوزدەرگە دايىن ەكەنىن ءبىلدىردى.

ايتا كەتەيىك، اراب سامميتى مىسىردىڭ گازا سەكتورى بويىنشا جوسپارىن قولدادى.