مىسىقتىڭ ءبىر جىلى ادامنىڭ جەتى جىلىنا تەڭ ەكەنى راس پا؟
جەلىدە «مىسىقتىڭ ءبىر جىلى ادامنىڭ جەتى جىل ومىرىنە تەڭ» دەگەن اقپارات تارادى. «پروۆەرەنو» فاكتچەكەرلەرى مۇنىڭ قانشالىق دۇرىس ەكەنىن تەكسەرىپ كوردى، - دەپ حابارلايدى Factcheck.kz.

الدىمەن قاراپايىم لوگيكامەن ەسەپتەپ كورەلىك: مىسىقتىڭ ءبىر جاسى ادامنىڭ جەتى جىلىنا تەڭ كەلەتىنى راس بولسا، وسى ۋاقىتتا ونىڭ ءسۇت تىستەرى تۇراقتى تىسكە اۋىسىپ ۇلگەرۋى كەرەك. ءبىراق مارعاۋدىڭ ءسۇت تىستەرى ءۇش-ءتورت ايىندا ءتۇسىپ، التى ايىندا تۇراقتى تىستەرى شىعا باستايدى. ال ادام تەك 13-14 جاسىندا تۇراقتى تىستەرگە يە بولا باستايدى. تاعى ءبىر ءادىس بويىنشا سالىستىرىپ كورەيىك: مىسىق ءتورت ايىنان باستاپ جىنىستىق تۇرعىدا جەتىلىپ، بەس ايىنان تۋا الادى. ال ادامدا بۇل پروتسەسس جىنىسىنا قاراي ءارتۇرلى. مىسالى، قىزداردا سەگىز جارىم، ۇلداردا ون جاسىنان باستالادى. قاي ادىسپەن قاراساق تا، بۇل - قاتە.
امەريكالىق ۆەتەرينارلىق مەديتسينا قاۋىمداستىعى مارعاۋدىڭ ءومىرىنىڭ ءبىر جىلىن ادامنىڭ 15 جىلى دەپ ساناۋدى ۇسىنادى. ءۇي جانۋارىنىڭ ەكىنشى جىلى ادامنىڭ توعىز جىلىنا تەڭ. بىلايشا ايتقاندا، ەكى جاستاعى مىسىق 24 تەگى اداممەن جاستى. ءۇشىنشى جىلدان باستاپ كوەففيتسيەنت 1x4 كە تەڭ بولادى. مىسىقتىڭ جاسىن ەسەپتەۋدىڭ بۇل الگوريتمى - دۇنيەجۇزىندەگى ۆەتەريناريانىڭ ستاندارتى.
2017-جىلى عالىمدار امەريكالىق ۆەتەرينارلىق مەديتسينا قاۋىمداستىعىنىڭ مىسىقتىڭ جاسىن ەسەپتەۋگە قاتىستى دايىنداعان كەستەسىن ازداپ ناقتىلادى. جاڭا ەسەپتەۋلەر بويىنشا، مىسىقتىڭ ءومىرىنىڭ ءبىرىنشى جىلى ەندى ادامنىڭ 16,6364 جىلىنا تەڭ. ءبىر جارىم جاسىنان كەيىن مىسىقتىڭ ءار جىلى 4,134 كە كوبەيتىلەدى جانە وعان 15 جىل قوسىلادى. بايقاعانىڭىزداي، ەسەپتەۋ ءادىسى اسا وزگەرە قويمادى. مىسالى، مىسىقتىڭ 12 جىلى ادامنىڭ 64 جىلىنا، 20 جىلى 96 جىلىنا تەڭ.
وسىلايشا، مىسىق ءومىرىنىڭ ءبىر جىلى ادامنىڭ جەتى جىلىنا تەڭ دەگەن پىكىر تۇبەگەيلى دۇرىس ەمەس. ءۇي جانۋارىنىڭ جاسىن دالىرەك ەسەپتەۋ ءۇشىن ساراپتامالىق ەسەپتەۋلەرگە نەگىزدەلگەن باسقا ادىستەردى قولدانۋ كەرەك. مىسالى، مىسىقتىڭ العاشقى ەكى جىلىن 24 جاس دەپ ەسەپتەپ، سودان كەيىن ءومىر سۇرگەن ءار جىل ءۇشىن تاعى ءتورت جاس قوسۋ كەرەك.