مەيرامحانادا جانجال شىعارعان بلوگەر 850 مىڭ تەڭگە وتەماقى تولەدى
اتىراۋ. KAZINFORM - اتىراۋدا بلوگەر الدىمەن دۇكەندە جانجال شىعارعان. كەيىن مەيرامحانادا كامەلەتكە تولماعان جاسوسپىرىمدەر جۇمىس ىستەيتىنىن كورسەتكەن سوڭ توي بولماي قالعان. توي وتكىزۋشى مەيرامحانا يەسىنە جالداۋ قۇنىن تولەۋدەن باس تارتقان.
اتىراۋ قالالىق سوتىندا دۇكەن مەن مەيرامحانانىڭ يەلەرىنىڭ شاعىمىنا بايلانىستى ازاماتتىق ءىس قارالدى. ەكى تالاپ قويۋشى بلوگەرگە ار- نامىسى مەن ءقادىر- قاسيەتىن، ىسكەرلىك بەدەلىن قورعاۋ، مورالدىق زيان وتەماقىسىن ءوندىرۋ، جاۋاپكەردى الەۋمەتتىك جەلىلەردە رۇقساتسىز جاريالانعان فوتو مەن بەينەجازبالاردى ءوشىرۋدى مىندەتتەۋ تۋرالى تالاپ قويۋ ارىزىن بەرگەن.
«بلوگەر تالاپ قويۋشىعا تيەسىلى دۇكەندە تاۋارلارعا قاتىستى جانجال شىعارىپ، بارلىعىن بەينەجازباعا تۇسىرگەن. بىرنەشە رەت تالاپ قويۋشىنى ۇرعان. تالاپ قويۋشى بلوگەردىڭ قولىنان ۇرعان. بولعان جاعدايدىڭ بارلىعىن تالاپ قويۋشىنىڭ قىزى بەينەجازباعا ءتۇسىرىپ، الەۋمەتتىك جەلىگە جۇكتەگەن. ناتيجەسىندە ەكى ايەل ادام بۇزاقىلىق ءۇشىن اكىمشىلىك جاۋاپتىلىققا تارتىلعان»، - دەپ حابارلادى سوتتىڭ باسپا ءسوز قىزمەتى.
كەيىن بلوگەر توي سالتاناتى ءوتىپ جاتقان مەيرامحاناعا كەلىپ، تىكەلەي ەفيرگە شىققان.
«مەيرامحانادا كامەلەتكە تولماعاندار جۇمىس ىستەيدى دەپ كورسەتكەن. وسىنىڭ سالدارىنان توي بولماي، قوناقتار تاراپ كەتكەن. ال، تاپسىرىس بەرۋشى تالاپ قويۋشىعا تولەم جاساۋدان باس تارتقان. سوت بلوگەردەن تالاپ قويۋشىنىڭ پايداسىنا 850 مىڭ تەڭگە مورالدىق زيان وتەماقىسىن ءوندىرىپ، مەيرامحانادا كامەلەتكە تولماعاندار جۇمىس ىستەيدى دەگەن جالعان اقپاراتتى الەۋمەتتىك جەلىدە تىكەلەي ەفير ارقىلى تەرىسكە شىعارۋدى مىندەتتەدى.
ال، بلوگەر تالاپ قويۋشىنىڭ قىزى دۇكەندە بولعان جانجالدىڭ بەينەجازباسىن ءوزىنىڭ رۇقساتىنسىز جۇكتەگەنىن كورسەتىپ، تالاپ قويۋشىلارعا مورالدىق زياندى ءوندىرۋ، جالعان مالىمەتتەردى تەرىسكە شىعارۋ تۋرالى قارسى تالاپ قويۋ جولداعان.
«️بلوگەردىڭ قارسى تالاپ قويۋى ءىشىنارا قاناعاتتاندىرىلدى. ونىڭ كەلىسىمىنسىز الەۋمەتتىك جەلىدە جاريالانعان سۋرەتتى زاڭسىز پايدالانعانى ءۇشىن تالاپ قويۋشىلاردان 250 مىڭ تەڭگە مورالدىق زيان وتەماقىسى ءوندىرىلدى» ، - دەپ ءمالىم ەتتى اتالعان سوتتان.
سوت شەشىمى زاڭدى كۇشىنە ەنگەن جوق.
ەسكە سالا كەتەلىك، بۇعان دەيىن اتىراۋدا بلوگەرلەرگە كۇش قولدانعان جىگىتكە 461 مىڭ تەڭگە ايىپپۇل سالىنعانىن جازعان بولاتىنبىز.
اۆتور
جولداسبەك شوپەعۇل
