مينيسترلىك جاڭا كودەكستە سۋ ۇنەمدەۋگە ەرەكشە ەكپىن قويىلعانىن جاريالادى

استانا. KAZINFORM - بۇگىن ماجىلىستە جاڭا سۋ كودەكسىنىڭ جوباسى تانىستىرىلدى.

«جاڭا كودەكستىڭ جوباسىن ازىرلەۋ كەزىندە حالىقارالىق تاجىريبەلەر زەردەلەنىپ، ەلىمىزدىڭ وڭىرلەرىندەگى جاعداي زەرتتەلدى. كودەكستىڭ ماقساتى - ەكونوميكانىڭ تۇراقتى دامۋىن قامتاماسىز ەتۋ، ازاماتتاردىڭ ءومىر ءسۇرۋ جاعدايلارىن جاقسارتۋ جانە قورشاعان ورتانى قورعاۋعا مۇمكىندىك بەرەتىن سۋدى پايدالانۋدىڭ ءقاۋىپسىز دەڭگەيىنە قول جەتكىزۋ جانە قولداۋ. جاڭا كودەكستە باستى نازار ەلدىڭ سۋ-رەسۋرستىق الەۋەتىن قامتاماسىز ەتۋ ءۇشىن سۋ رەسۋرستارىن سارقىلۋدان جانە لاستانۋدان قورعاۋعا باعىتتالعان. جاڭا سۋ كودەكسىنىڭ جوباسى 6 بولىمنەن، 14 تاراۋدان جانە 121 باپتان تۇرادى. قازاقستان رەسپۋبليكاسىنىڭ قولدانىستاعى سۋ كودەكسى 2003-جىلى قابىلداندى. 20 جىل ىشىندە وعان 272 وزگەرىس ەنگىزىلىپ، كوپتەگەن نورمالار دەكلاراتيۆتى نەمەسە ولاردى جۇزەگە اسىرۋ مەحانيزمى بەلگىلەنبەگەن. بۇدان باسقا، گيدروتەحنيكالىق قۇرىلىس قاۋىپسىزدىگى، سۋارۋ جانە درەناج، اۋىز سۋمەن جانە سۋمەن جابدىقتاۋ ماسەلەلەرى شەشىلمەگەن»، - دەدى ق ر سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.

ونىڭ ايتۋىنشا، جاڭا سۋ كودەكسىنىڭ جوباسىندا نورمالار جۇيەلەنگەن جانە دەكلاراتيۆتى قايتالاناتىن نورمالار جويىلعان.

ءبىرىنشى بولىمدە ماقساتتار مەن مىندەتتەر ينتەگراتسيالانعان باسقارۋدى دامىتۋعا، رەسۋرستاردى باسقارۋ ماسەلەلەرىن شەشۋدە جۇرتشىلىقتى تارتۋعا، سالاداعى عىلىمدى دامىتۋعا، باسقارۋدىڭ ەكونوميكالىق تەتىكتەرىن قولدانۋعا، ەلدى مەكەندەردى سۋمەن جابدىقتاۋ جانە سۋ بۇرۋ سالاسىنداعى قىزمەتتى رەتتەۋگە، سۋ ۇنەمدەۋدى ەنگىزۋگە، ونىڭ ىشىندە تازارتىلعان سارقىندى سۋلاردى پايدالانۋعا باعىتتالعان ەرەجەلەرمەن تولىقتىرىلدى.

«قولدانىستاعى رەداكتسيادا بولماعاندىقتان، جاڭا سۋ كودەكسىندە قازاقستان رەسپۋبليكاسىنىڭ سۋ قاۋىپسىزدىگىن قامتاماسىز ەتۋ تەتىكتەرى (6-باپ) جانە ەكونوميكانىڭ سۋ سەكتورىن كليماتتىڭ وزگەرۋىنە بەيىمدەۋ جونىندەگى تەتىكتەر (7-باپ) ايقىندالعان»، - دەدى ۆيتسە-مينيستر.

ونىڭ سوزىنە قاراعاندا، قۇجات جوباسىندا سۋ وبەكتىلەرىنىڭ سارقىلۋىن بولدىرماۋ ءۇشىن «ەكولوگيالىق اعىن» ۇعىمى ەنگىزىلەدى. قولدانىستاعى سۋ كودەكسىندە «ەكولوگيالىق اعىن» ۇعىمى جانە ونىڭ كولەمىن انىقتاۋ بويىنشا عىلىمي- زەرتتەۋ جۇمىستارىن جۇرگىزۋ تۋرالى تالاپتار جوق.

سونىمەن قاتار، سۋدىڭ كولەڭكەلى نارىعىن جويۋ جونىندەگى شارالاردى كۇشەيتۋ بولىگىندە مەملەكەتتىك باقىلاۋ مەن قاداعالاۋ جۇرگىزۋ جونىندەگى تالاپتار كۇشەيتىلدى. بۇدان باسقا، باسسەيندىك كەڭەستەردىڭ ءرولى مەن مارتەبەسى جوعارىلايدى.

«سۋ قورعاۋ ايماقتارى مەن بەلدەۋلەرىن بەلگىلەۋ ماسەلەلەرى جۇيەلەندى. اتاپ ايتقاندا، زاڭ دەڭگەيىندە سۋ قورعاۋ ايماقتارى مەن بەلدەۋلەرىنىڭ ەڭ از مولشەرى بەلگىلەندى (76-باپ)، سونداي-اق اكىمدىكتەرگە 2 جىل ىشىندە سۋ قورعاۋ ايماقتارى مەن بەلدەۋلەرىن بەلگىلەۋ تالابى كوزدەلگەن (120-باپ). قولدانىستاعى رەداكتسيادا مۇنداي نورمالار قاراستىرىلماعان»، - دەدى بولات بەكنياز.

كودەكس جوباسىنىڭ ماڭىزدى قۇرامداس بولىگى - سۋ ۇنەمدەۋدى ىنتالاندىرۋ. ءبىرىنشى كەزەكتە سۋدى پايدالانۋ ليميتتەرى مەن نورمالارى سياقتى مەحانيزمدەرى پىسىقتالعان.

«سۋدى پايدالانۋعا ارنالعان بارلىق رۇقسات بەرۋ قۇجاتتارى (ارنايى سۋ پايدالانۋعا ارنالعان رۇقساتتار) سۋدى الۋ مەن ىسىراپ ەتۋ كولەمىن قىسقارتۋ، اينالىمدى نەمەسە قايتا سۋمەن جابدىقتاۋعا كەزەڭ-كەزەڭىمەن (كەمىندە بەس جىل) كوشۋ، قولدا بار وزىق تەحنولوگيالاردى ەنگىزۋ جونىندەگى ءىس-شارالار جوسپارى بولعان كەزدە سۋدى پايدالانۋدىڭ بەكىتىلگەن نورمالارى مەن ليميتتەرى ەسكەرىلە وتىرىپ بەرىلەدى. وتپەلى ەرەجەلەردە وسى جوسپارلار جاڭا سۋ كودەكسى قولدانىسقا ەنگىزىلگەن كۇننەن باستاپ ەكى جىلدان كەشىكتىرىلمەي ازىرلەنۋگە ءتيىس دەگەن شارت تا كوزدەلگەن.

ارينە، بۇل مەحانيزم سۋدى ۇنەمدەيتىن تەحنولوگيالاردى ەنگىزۋدى تالاپ ەتەتىن اكىمشىلىك شارا سانالادى. بۇل نارىقتا وسىنداي جۇيەلەرگە سۇرانىس تۋعىزۋى كەرەك جانە مۋلتيپليكاتيۆتى اسەر رەتىندە ءبىز عىلىمي جانە جوبالىق ۇيىمداردىڭ بەلسەندى قاتىسۋىن كۇتەمىز»، - دەدى ول.

جاڭا سۋ كودەكسىنىڭ جوباسى جەكەلەگەن ەرەجەلەرى ەلدىڭ سۋ سالاسىنا ينۆەستيتسيالار تارتۋدى ىنتالاندىرۋدى جانە سۋ رەسۋرستارىن قورعاۋ مەن پايدالانۋ سالاسىنداعى عىلىمي-زەرتتەۋ جانە عىلىمي-تەحنيكالىق جۇمىستاردى مەملەكەتتىك قولداۋدى ەسكەرىپ وتىر.